Зуны олимпийн XXXIII наадмын хөлбөмбөгийн тэмцээнийг энэ удаа базвал:

ЭРЭГТЭЙ:

Олимпын наадмын хөлбөмбөгийн эрэгтэйчүүдийн тэмцээнд 23 нас хүртэлх тамирчин оролцох журамтай ч нэг багт 3 хүртэлх 23-аас дээш настай тоглогч авахыг зөвшөөрдөг. Хэдийгээр хөлбөмбөгийн бүх шилдгүүд Олимпын наадамд тэр болгон оролцдоггүй ч Месси "Бээжин-2008", Нэймар "Рио 2016" өөр өөрийн улсынхаа олимпийн багт тоглож, алтан медаль авахад хувь нэмрээ оруулж байсан билээ.

Энэ удаа Францын од Мпаббе эх орондоо болж буй олимпод оролцохыг ихээхэн хүсч байсан ч шинэ баг нь болох "Реал Мадрид" нь зөвшөөрөөөгүй юм.

Гэхдээ энэ олимпод Аргентиний Хулиан Алварес, Отаменди нарын дэлхийн аваргууд, Францын Лаказетте, Олисе, Мароккогийн Хакими гээд олны танил олон тоглогч олимпод "тоосоо өргөж" байна.

Эрэгтэйчүүдийн тэмцээнд 16 баг ордог бөгөөд 4 хэсэгт хуваагдан тоглодог.

Энэ удаа сүүлийн хоёр олимпын аварга Бразил болон 2016 оны олимпын финалд үлдэж байсан Герман, 1936 оны олимпын аварга Итали гээд томоохон хөлбөмбөгийн гүрнүүд Олимпын эрхээ авч чадаагүй.

Шөвгийн наймд Марокко АНУ-ыг 4:0- ээр, Испани Японыг 3:0-ээр тус тус уншсан бол Египет -Парагвай хоёр үндсэн болон нэмэлт цагт 1:1-ээр тэнцэж, "пенальти"-аар 5:4-өөр Египет хожив. Шөвгийн наймын хамгийн сонирхолтой тоглолт Аргентин-Францын хооронд болж, тоглолтын эхэнд (5 мин) Францын Матетагийн ( Английн премьер лигийн "Кристал палэс" багт тоглодог) оруулсан гоол энэ тоглолтын хувь заяаг шийдлээ.

Хагас шигшээ тоглолт наймдугаар сарын 5-нд болох бөгөөд Марсель хотноо Марокко-Испани, Лион хотноо Франц-Египетийн багууд өрсөлдөнө.

Хагас шигшээд хожигдсон багууд наймдугаар сарын 8-нд Нант хотноо хүрэл медалийн төлөө, харин хожсон багууд наймдугаар сарын 9-нд Парисын алдарт "Парк де пренс" цэнгэлдэхэд Олимпийн аваргын алтан медалийн төлөө тоглох юм.

Хагас шигшээд үлдсэн дөрвөн багаас Испани(1992), Франц (1984) хоёр олимпийн аварга болж байсан бол Египет, Марокко хоёр олимпын медаль авч байгаагүй билээ.

ЭМЭГТЭЙ:

Олимпын эмэгтэйчүүдийн хөлбөмбөгийн тэмцээн ямар нэг насны хязгаарлалт байхгүй. Мөн тоглогчдын клубууд ч "чөлөө өгөхдөө" сайн. Тиймээс Олимпын эмэгтэйчүүдийн хөлбөмбөгт хамгийн шилдэг багууд, хамгийн шилдэг тоглогчид цугладаг билээ. Эмэгтэйчүүдийн 12 шилдэг баг олимпод оролцдог журамтай.

"Парис-2024"-т Бразилийн домогт хөлбөмбөгч Марта 6 дахь олимпдоо оролцож байгаа нь тодотгол нь.

Хэсгийн тоглолтийн дараа Шинэ Зеланд, Австрали, Замби, Нигерийн багууд хасагдсан бол тэмцээнийг -6 оноотой эхлүүлсэн Канадын бүсгүйчүүд гурван хожил авч шөвгийн наймд багтаж чадсан нь гайхалтай. Харамсалтай нь "Токио-2020" олимпийн аваргууд ( Канад) өнөөдөр болсон хасагдах шатанд Германы багтай үндсэн болон нэмэлт цагт 0:0 -ээр тэнцэж, 11 метрийн торгуулийн цохилтоор 2:4-өөр хожигдон нутаг буцахаас өөр аргагүй боллоо.

Шөвгийн наймын 4 тоглолтын хоёр нь торгуулийн цохилтоор ялагчаа тодруулж, нэг тоглолтод нэмэлт цаг дээр хожлын гоол орж, нэг үгээр үнэхээр ширүүн " тулаанууд" боллоо.

Дэлхийн аварга Испани бүсгүйчүүд Колумбын багт 0:2-ээр хожигдож яваад 90+7 дахь минутад тоог тэнцүүлж, улмаар нэмэлт цагийн дараа "пенальтиар" 4:2-оор хожив.

Испанийн Бонмати, Эрмоса, Ольга, Путельяс гээд бүх томчууд нь тоглож байгаа гэхэд зүдэрч байж л хагас шигшээд үлдлээ.

Олимпын дөрвөн удаагийн аварга( 1996,2004,2008,2012) АНУ-ын хүүхнүүд Лондонгийн олимпын мөнгөн медальт Японыг нэмэлт цагт (105+2 мин) ялж, хагас шигшээд үлдлээ.

Хэсгийн сүүлчийн тоглолтод улаан "жавтий" хүртсэн Бразилийн багийн ахлагч Марта талбайн эзэн Францтай хийсэн тоглолтыг үзэгчдийн суудлаас харлаа. Тун тэнцүүхэн өрнөсөн (109 минут үргэлжилсэн) тоглолтын шийдвэрлэх гоолыг Бразилийн Габи Портильогийн 82 дахь минутад хийлээ.

Наймдугаар сарын 6-нд хагас шигшээ тоглолтод Лион хотноо АНУ-Герман, Марсель хотноо Бразил-Испани тоглож, хожигдсон багууд наймдугаар сарын 9-нд Лион хотноо хүрэл медалийн төлөө, харин хожсон багууд наймдугаар сарын 10-нд Парист "Парк де пренс"-т алтан медалийн төлөө өрсөлдөнө.

Эх сурвалж: Ц.Энхтүвшин Таван цагариг сонин