ӨНӨӨДӨР: Эмийн үнийг ил тод мэдээлэх системийг Эрүүл мэндийн яамнаас танилцуулна

Өнөөдөр буюу 2025 оны 10 дугаар сарын 7-ны Мягмар /Өлзийт/ гарагт болох зарим үйл явдлыг тоймлон танилцуулж байна.

Төрийн ордонд: УИХ-ын Байнгын хороодын хурал болно.

09:00 цагт: Дэлхийн Банкны “Зүүн Ази, Номхон далайн бүсийн Эдийн засгийн тойм” тайланг олон нийтэд цахимаар танилцуулна.

11:00 цагт Улаанбаатар цэцэрлэгт хүрээлэнд: “Бидний ус-Бидний ирээдүй” нээлттэй өдөрлөгийн хүрээнд “Хаягдал ус ба ус дахин ашиглалт” сэдэвт илтгэл тавина.

11:00 цагт Эрүүл мэндийн яамны байранд: Эмийн үнийг ил тод мэдээлэх системийг танилцуулна.

11:30 цагт Д.Сүхбаатарын талбайд: Эмч, эмнэлгийн ажилтнуудын цалинг 3.5 сая төгрөг болгож нэмэхийг шаардах жагсаалыг зохион байгуулна.

13:00 цагт Г.Занабазарын нэрэмжит Дүрслэх урлагийн музейд: МУЭ-ийн гишүүн зураач Д.Тайванжаргалын “Үзэсгэлэнт 4 улирал” судалбар зургийн үзэсгэлэнг нээнэ.

13:00 цагт Боловсролын яамны хурлын танхимд: Японы Чиба технологийн их сургуулийнхан Монгол Улсын боловсролын хүртээмж, мэдээллийн технологийн чадавхыг дэмжих зорилгоор 800 ширхэг iPad-ыг үнэ төлбөргүй хандивлах ёслолын ажиллагааг зохион байгуулна.

16:00 цагт: Манай улс “Mental Health First Aid” /Сэтгэл зүйн эрүүл мэндийн анхны тусламж”/ хөтөлбөрийг хэрэгжүүлэх эрхээ авсан 46 дахь орон болсонтой холбогдуулан “Туушин” зочид буудлын "Executive lounge"-д Австралийн “MHFA International”-ийн дэд захирал Жак Барнфийлд, соёлын нутагшуулалт хариуцсан ахлах багш Клайри Келли нар сургалт зохион байгуулна.

Дэлхийн хөвөнгийн өдөр тохиож байна.

Нийгмийн даатгалын ерөнхий газраас шимтгэл төлөгч аж ахуйн нэгж, байгууллагын тогтвортой үйл ажиллагааг дэмжих, даатгуулагчид тэтгэвэр, тэтгэмж тогтоож олгоход хамтран ажиллах зорилготой “Итгэлцлийн аян” үргэлжилж байна.

Архангай аймагт: Төрийн байгууллагын ажлын зохион байгуулалт, архив, албан хэрэг хөтлөлтийн төв комиссын улсын үзлэг үргэлжилж байна.

Өвөрхангай аймагт: 2025 оны II ээлжийн цэрэг татлага үргэлжилж байна.

Баян-Өлгий аймагт: Засгийн газрын Бүсийн хөгжлийг дэмжих бодлого, Хөгжлийн бэрхшээлтэй иргэдийн хөдөлмөр эрхлэлтийг дэмжих жилийн хүрээнд Баруун бүсийн зөвлөгөө мэдээллийн цогц үйл ажиллагаа М.Хурманханы талбайд болно.

Дархан-Уул аймгийн “Дархан Юнайтед Арена”-д: МСБХ-ны дээд лигийн хүрээнд Улаанбаатар Амазонс-АОДЭ Винкс, Дархан Юнайтед-Ховд Шонхорууд багийн тоглолт болно.

Завхан аймагт: “Living in Space” буюу “Сансарт амьдрахуй” агуулгын хүрээнд “Дэлхийн сансрын 7 хоног”-ийг тэмдэглэж байна.