.png){kind=logo}
Мэргэжлийн сүмо бөхийн их аварга, 45 түрүүлсэн рекорд амжилтын эзэн Хакүхо өнөөдөр Токио хотын нэгэн зочид буудалд хэвлэлийн бага хурал хийлгэж, цаашдын зорилгынхоо тухай ярилаа. Тэрээр өнөөдөр Сүмо бөхийн холбооноос албан ёсоор гарч байгаа юм.
Хакүхо дэлхий дахинд сүмо бөхийг хөгжүүлэх төслөө танилцуулж, энэхүү төслийг хэрэгжүүлэх шинэ компанийн төлөөлөгч болсноо зарлав. Хуралд түүний хамт хуучин Исэгахама ояката буюу шинэ Миягино ояката, өмгөөлөгч, зөвлөх гэсэн 5 хүн байлцлаа.
Миягино ояката “Юуны өмнө Хакүхо Шёо өнөөдрөөс эхлэн сүмо бөхөөс зодог тайлж байгааг мэдэгдэж байна. Энэ их рекорд амжилтыг тогтоосон гавьяатай аварга холбоонд байвал олон сайн шавь төрүүлнэ дээ хэмээн бодож байсан ч Хакүхогийн холбоог орхих шийдвэр нь өөрчлөгдөхгүй, хатуу байлаа. Түүнийг үлдээж чадаагүйдээ бөхийн хорхойтнуудаас хүлцэл өчиж байна. Хакүхо сүмо бөхөд олсон амжилтаараа бахархдаг. Сүмогоор дамжуулан, нийгэмд хувь нэмрээ өгөх, сүмо бөхийн ертөнцөд ач хариулах хүсэлтэй байгаа. Гэхдээ холбооноос гадуур сүмо бөхийн төлөө зүтгэх хүсэлтэй байгаа” гэж ярилаа.
Харин Хакүхо “Өнөөдөр хүрэлцэн ирсэнд баярлалаа. Сүмо бөхөд дурлаж, сүмод хайрлагдсан 25 жил байлаа. Өнөөдрөөс эхлэн холбооноос гарч, шинэ мөрөөдлөө биелүүлэхээр зорих болно гэдгээ мэдэгдье. Одоогийн нөхцөл байдалд сүмо бөхийн төлөө холбооноос гадна байр сууринаас хичээн зүтгэсэн нь дээр байна. Энэ бол миний шийдвэр. Сүмо бөхийнхөө төлөө зүтгэсэн хэвээр байх болно. Өсвөрийн сүмо бөхийн “Хакүхо Цом” тэмцээнээ улам өргөжүүлнэ. Мөн дэлхийн Их Дуулга тэмцээн зохион байгуулна. Шавь нартаа Зуны тэмцээний дараа гарах гэж байгаагаа дуулгасан. 20 шавьтай байсны 9 нь зодог тайлсанд харамсаж байна” гэж мэдээллээ.
Хакүхо Миягино ояката холбооноос гарах хүртэлх он цагалбар
2021.09.30 – Их аварга Хакүхо зодог тайлж, Магаки ояката нэрээр холбоонд үлдлээ. Их аваргын ёсоор өөрийн нэрээр дэвжээ нээх ёстой байсан ч холбоо зөвшөөрсөнгүй. Бүр “Тангаргийн бичиг” бичүүлж байж, ояката болох зөвшөөрөл өгч байлаа.
2022.07.28 – Миягино нэрийг авч, тус дэвжээг өвлөн авлаа.
2022.08.21 – Хуучин Азүмасэки дэвжээнд нүүж, шинэ дэвжээгээ сэтгүүлчдэд танилцууллаа. Нихонбашид дэвжээний шинэ барилга барих төлөвлөгөөтэй гэдгээ илэрхийлжээ.
2023.01.25 – Очиай буюу одоогийн Хакүоохо макүшитагаас ганц башё барилдаад жюүрёод дэвшиж, түүхэн амжилт тогтоов.
2023.01.28 – Зодог тайлах ёслолоо хийж, хоёр орны алдартнууд цугларлаа.
2024.02.21 – Миягино дэвжээний маэгашира асан Хокүсэйхо хоёр залуу бөхөд хүчирхийлэл үйлдсэн хэрэг гарлаа.
2024.02.23 – Холбооноос Хакүхог хоёр шат буулган шийтгэж, цалингийн 20 хувиар гурван сар торгох шийтгэл оноов.
2024.02.28 – Миягино дэвжээг удирдах ажлаа өгч, Магаки ояката дэвжээг удирдах боллоо.
2024.03.28 – Миягино дэвжээ хаагдаж, дэвжээний 19 хүн Исэгахама дэвжээнд шилжлээ.
2024.04.28 – Исэгахама дэвжээнд нэгдэн, өөрөө маваши углан, бөхчүүдтэй бэлтгэл хийж эхлэв.
2024.05.29 – Миягино дэвжээнд байсан 4 залуу бөх өөр дэвжээнд барилдах хүсэлгүй хэмээн зодог тайлжээ.
2025.06.02 – Холбоонд өгсөн байсан ажлаас гарах өргөдлийг Сүмо бөхийн холбоо хүлээн авснаар энэ сарын 9-нд гарахаар боллоо.
2025.06.07 – Монголоос Токиод эргэн ирж, 9-нд болох хэвлэлийн хурал дээр бүгдийг ярина гэж мэдэгдлээ.
Эх сурвалж: М.Сугар-Эрдэнэ /UB.LIFE/
