.png){kind=logo}
Өнөөдөр Дэлхийн спортын сэтгүүлчдийн өдөр тохиож байгаа бөгөөд одоогоос 101 жилийн тэртээ Парис хотноо боксын ринг дээр спортын сэтгүүлчид хуралдаж Олон улсын спортын сэтгүүлчдийн холбоо /AIPS/-г байгуулж байсан түүхтэй билээ.
Монгол Улс 1990 онд Спортын сэтгүүлчдийн холбоог анх байгуулж, улмаар 1992 онд Унгарын Будапешт хотноо болсон AIPS-ны 55 дугаар их хурлаар гишүүнээр элссэн.
Харин энэ өдрүүдэд Азийн Спортын сэтгүүлчдийн холбооны 26 дахь удаагийн чуулган Хонконгт үргэлжилж байна. Тус чуулганд Азийн холбооны гишүүн 29 орны спортын сэтгүүлчдийн төлөөлөл оролцож байгаагаас Монголын спортын сэтгүүлчдийн холбооны хүндэт ерөнхийлөгч Ч.Отгонбаатар, ерөнхийлөгч Б.Цагаанбаатар, ерөнхий нарийн бичгийн дарга Д.Батжаргал нар эх орноо төлөөлөн оролцож байна.
Нэгэн баярт мэдээ дуулгахад, Монгол Улсын спортын сэтгүүлчдээс анх удаа Азийн спортын сэтгүүлчдийн холбооны ерөнхийлөгчийн зөвлөх, Монголын спортын сэтгүүлчдийн холбооны хүндэт ерөнхийлөгч Чүлтэмийн Отгонбаатар Азийн спортын сэтгүүлчдийн холбооны дээд шагнал болох “Азийн Спортын сэтгүүлчдийн холбооны алдартан” хэмээх хүндэт цомын эзнээр тодорлоо.
Одоогоос 30 жилийн тэртээ буюу 1995 оны 7 дугаар сарын 2-ноос эхлэн "Дэлхийн спортын сэтгүүлчдийн өдөр"-ийг албан ёсоор жил бүр тэмдэглэж байна.
Монголын спортын сэтгүүлчид энэ жил Монголын буудлага спортын холбоотой хамтран гишүүдийнхээ дунд буудлагын тэмцээн зохион байгуулан тэмдэглэх юм байна.
Өнөөдөр ОУССХ /AIPS/ нь эгнээндээ 9500 гаруй гишүүнтэй, дэлхийн спортын хэвлэл мэдээллийн хэрэгслийг төлөөлдөг мэргэжлийн дээд байгууллага болж 101 дэх жилдээ үйл ажиллагаа явуулж байна.
Швейцарь дахь олимпын нийслэл Лозанна хотод төв байртай AIPS-ийг Олон улсын Олимпын хороо болон спорт, улс бүрийн үндсэн холбоод хүлээн зөвшөөрдөг. AIPS нь 160 гишүүн холбоо багтдаг бөгөөд тус бүр өөрийн түүх, манлайлалтай Ази, Америк, Европ, Африк гэсэн тивийн дөрвөн хэсгээс бүрддэг.
INDEPENDENT AIPS нь гишүүнчлэлийн татвар, олон улсын байгууллага, холбоодын хандиваар санхүүждэг бие даасан байгууллага юм. AIPS-ийн үндсэн зорилго нь спортын үнэт зүйлс, гишүүдийн мэргэжлийн ашиг сонирхлыг хамгаалахад гишүүн холбоодын хамтын ажиллагааг идэвхжүүлэх, бүх үндэстний спортын сэтгүүлчдийн найрамдал, эв нэгдэл, нийтлэг ашиг сонирхлыг бэхжүүлэх, гишүүдийн ажиллах хамгийн сайн нөхцлийг хангахад оршино.
ЗАЛУУ СУРВАЛЖЛАГЧИД AIPS нь олон улсын спортын шилдэг холбоод болон AIPS-ийн түнш байгууллагуудтай хамтран зохион байгуулдаг нэр хүндтэй "AIPS Залуу сурвалжлагч" хөтөлбөрөөр дамжуулан хойч үеийн спортын сэтгүүлчдэд мэдлэг, ур чадвараа дээшлүүлэх онцгой боломжийг олгож байна.
AIPS SPORT MEDIA AWARDS Анх 2018 онд AIPS спортын хэвлэл мэдээллийн салбарын олон улсын дээд шагнал болох AIPS Sport Media Awards-ыг эхлүүлсэн. Энэхүү шагнал гардуулах ёслол нь спортын хэвлэл мэдээллийн шилдэг бүтээлийн баяр бөгөөд бүх хэвлэл мэдээллийн платформ дахь спортын шилдэг өгүүллэгчдийн шагналыг жил бүр олгож байна.
AIPS КАРТ Бүх улсын хэмжээнд хүлээн зөвшөөрөгдсөн цорын ганц албан ёсны спортын хэвлэлийн карт болох AIPS карт нь таван тивийн 10 мянга гаруй сэтгүүлч, түүнчлэн олон улсын өдөр тутмын сонин, тогтмол хэвлэл, радио, телевизийн сувгуудыг холбосон харилцаа холбоо, мэдээлэл, харилцааны чухал сүлжээ юм.
