Хөлбөмбөгийн ДАШТ-ий сугалаа шинэ журмаар явагдана

Ирэх жилийн зун, бүүр тодруулбал 2026 оны зургадугаар сарын 11-нээс долдугаар сарын 19-нд АНУ, Мексик, Канадад болох 23 дахь удаагийн хөлбөмбөгийн Дэлхийн аварга шалгаруулах тэмцээний сугалаа хэдхэн хоногийн дараа буюу 2025 оны арванхоёрдугаар сарын 5-нд АНУ-ын нийслэл Вашингтон Ди Си хотноо, цуут ерөнхийлөгч агсан Жон Кеннедигийн нэрэмжит урлагын тоглолтын төвд (John F.Kennedy Memorial Center for the Performing Arts) болох гэж байна.

Анх удаагаа 48 баг оролцох энэхүү тэмцээний сугалаа шинэ журмаар явагдах бөгөөд ФИФА (Олон улсын хөлбөмбөгийн холбоо)-ны 11 дүгээр сарын шинэчилсэн чансаагаар багуудыг дөрвөн "тогоонд" (pot-корзина-манайхан сагс гэдэг) 12,12-оор нь хуваасан. "Нэг тогооныхон" хоорондоо таарахгүй гэсэн үг.

Зохион байгуулагч гурван орон нэгдүгээр тогоонд чансаа хамаарахгүй шууд орсон бөгөөд энэ нь зохион байгуулагч орнууд нэг хэсэгт дэлхийд чансаагаар эхний 9-д бичигдсэн багуудтай таарахгүй байхаар зохицуулалттай юм.

Мөн эдгээр гурван баг аль хэсэгт орохыг нь ч шууд хуваарилсан. Мексик "А" хэсгийн, Канад "В", АНУ "D" хэсгийн нэгдүгээр бичигдэнэ.

Одоогоор 48 багийн 42 нь тодорхой байгаа, үлдсэн 6 багийн нэр Европын болон тив хоорондын плэй-оффын тоглолтын дараа тодрох бөгөөд плэй-оффоос эрхээ авах бүх баг дөрөвдүгээр " тогоонд" орох юм.

Жишээ нь, Итали, Швед, Турк, Дани зэрэг багууд плэй-оффоос эрхээ авлаа гэхэд дөрөвдүгээр "тогоонд" чансаа харгалзахгүй орно гэсэн үг.

ФИФА мөн энэ удаа теннисний журмаар сугалаа оноолтыг хийхээр болсон. Чансаа өндөр хоёр баг финал хүртэл хоорондоо, чансаагаар 3-4 -т байгаа багууд 1-2-т байгаа багтай хагас шигшээ хүртэл хоорондоо аль болох таарахгүй байхаар.

Нэг үгээр хэлбэл чансааны эхний дөрөвт байгаа Испани, Аргентин, Франц, Англи хэрэв хэсэгтээ тэргүүлж (нэгээр гарах), хасагдах шатанд хожоод явбал дөрвүүлээ хоорондоо таарахгүй шөвгийн дөрөвт үлдэх боломжтой.

Мөн нэг хэсэгт Европоос бусад тивийн багууд нэгээс илүү орохгүй.

Энэ бүгдээс харахад "үхлийн хэсэг" Аргентин, Япон, Норвеги, Итали, эсвэл Испани, Колумби, Саудын Араб, Итали, мөн Герман, Уругвай, Египет, Итали, бүүр Бразил, Хорват, Алжир, Итали гэсэн хэсэг гарах магадлалтай.

Түүнээс гадна Канад, Австрали, Тунис, Курасао гэсэн багууд ч нэг хэсэгт орчих онолын боломжтой гэсэн үг.

Дөрвөн багтай 12 хэсгээс тойргийн тоглолтын дараагаар эхний хоёр байр эзэлсэн багууд (нийт 24 баг) дээр хэсэгтээ гуравдугаар байр эзэлсэн багуудаас шилдэг үзүүлэлттэй 8 баг нэмэгдээд нийт 32 баг хасагдах журмаар тоглоод явах юм.

Хэсгээс гарахад :

1. Оноо

2. Гоолын зөрүү

3. Оруулсан гоол

4. Торгуулийн оноо( шар, улаан хуудасны тоо)

5. ФИФА-ийн шинэ чансаа зэргээр шалгаруулна.

Нийтдээ 104 тоглолт явагдах юм.

Ц.Энхтүвшин Таван цагариг сонин / М.Сугар-Эрдэнэ Ub.Life /