.png){kind=logo}
ЛОНДОН, 2026 оны нэгдүгээр сарын 6 /DW/. Их Британид хортой хоол хүнсийг интернэтээр сурталчлахыг хориглох, мөн телевизийн сурталчилгааг хязгаарлах тухай хууль хэрэгжиж эхэллээ.
Энэхүү шинэ хууль нь "хамгийн эрүүл хүүхдүүдийг өсгөхөд нь эцэг эхчүүдэд тусална" гэсэн эрх баригчдын амлалтын нэг хэсэг юм гэж Их Британийн засгийн газрын албан ёсны цахим хуудсанд даваа гарагт нийтлэгдсэн хэвлэлийн мэдээнд дурджээ.
Шинэ хуулийн дагуу “харьцангуй эрүүл бус” хоол хүнсний сурталчилгааг Их Британийн телевизийн сувгуудаар зөвхөн оройн 21:00 цагаас хойш үзүүлэхийг зөвшөөрнө. Харин цахим орчинд эдгээр зар сурталчилгааг бүрэн хориглоно.
The Guardian сонинд мэдээлснээр, эдгээр хязгаарлалт нь их хэмжээний сахар, өөх тос, давстай 13 төрлийн бүтээгдэхүүнд хамаарна. Үүнд, нэмэлт сахар агуулсан ундаа (йогурт зэрэг сүүн бүтээгдэхүүн орно), чипс, давстай крекер, бялуу, эрдэнэ шишийн цардуултай өглөөний “бэлэн” хоол, попкорн, шоколад, бохь, зайрмаг, сахар агуулсан нарийн боов талх, пицца, мөн хөлдөөсөн хоол зэрэг орно.
Их Британийн “хортой хоол хүнс” үйлдвэрлэгчид телевиз, интернэтээр “хүүхдийн цаг” буюу хүүхдэд зориулсан цагт өөрийн брэндийг сурталчлах эрхтэй бөгөөд энэхүү сурталчилгаанд шууд хортой бүтээгдэхүүнийг харуулахгүй байх шаардлагатай.
Их Британийн хүүхдүүдийн гуравны нэг нь сургууль төгсөхөөсөө өмнө таргалалттай болдог
Их Британийн засгийн газар хүүхдүүдийн дунд таргалалт ихэссэнийг харуулсан статистик мэдээллийг танилцуулжээ. Тухайлбал, бага сургуульд элсэх үедээ хүүхдүүдийн 22.1 хувь нь илүүдэл жинтэй байгаа бол сургууль төгсөх үед энэ үзүүлэлт 35.8 хувьд хүрч нэмэгдэж байгаа ажээ. Мөн шүдний цооролт 5-9 насныхан эмчид хандах гол шалтгаан болж байгааг дурдсан байна.
Эрх баригчид судалгааны үр дүнг эш татан мэдэгдэхдээ, зар сурталчилгаа нь хүүхдүүд юуг, хэзээ идэхэд нөлөөлж, тэдний хоолны сонголтыг бага наснаас нь төлөвшүүлж, таргалалт болон түүнтэй холбоотой өвчний эрсдлийг нэмэгдүүлдэг гэдгийг онцолсон байна. Засгийн газрын хэрэгжүүлж шинэ арга хэмжээ нь жил бүр хүүхдүүдийн илчлэг ихтэй хоол хүнсний хэрэглээг 7.2 тэрбумаар бууруулж, таргалалттай хүүхдүүдийн тоог 20 мянгаар цөөрүүлэх боломжтой гэж үзэж байна.
Урт хугацаандаа энэхүү шинэ дүрэм журам нь иргэдийн эрүүл мэндийн ерөнхий байдлыг сайжруулснаар 2 тэрбум орчим фунт стерлинг хэмнэх боломжтой гэж тооцоолжээ.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!