Хидэнояма ояката энэ жил ёкозүна, озэки болох бөхчүүдийг нэрлэв

Энэ жилийн их сүмо 11-ний өдөр Токиод эхлэх гэж байна. Өнгөрсөн жил мэргэжлийн сүмо бөх хоёр ёкозүна, нэг шинэ озэкитой болсон. Тэгвэл энэ жил ч бас шинэ аварга, арслан төрөх магадлал өндөр гэж Хидэнояма ояката буюу озэки асан Котошёогикү үзэж байна. Тэрээр “東スポWEB” сайтад энэ башё тоймчоор ажиллах юм.

Хидэнояма ояката “Уншигчдынхаа энэ өдрийн мэндийг эрье. Ингээд сүмо бөхийн нэгэн шинэ он эхэллээ. Хэдэн жилийн өмнөөс хэн ч түрүүлж мэдэхээр башё үргэлжилж байсан бол үе солигдож дуусаад одоо 2 аварга, 2 арслантай болж, банцүкэ ч тогтвортой болж ирлээ.

Гэхдээ энэ жил ч шинэ аварга, арслан төрөх магадлал маш өндөр байгаа. Үүнээс ёкозүнад хамгийн ойр бөх бол Аонишики. Намхан өрж, зөвхөн урагш дайрдаг, яаж ч алгадуулж, мөрлүүлсэн тэвчээртэй тэрээр тун хий багатай. Өнгөрсөн нэг жилийн тогтвортой амжилт нь үүнийг баталж байгаа юм. Аонишики хойшоо ухардаггүй тул гэмтэх эрсдэл бага.

Урьд өмнө дараагийн ёкозүна, озэки гэгдэж байсан бөх олон ч хэчнээн бяр чадалтай байгаад гэмтэл бэртлээс болоод унасан сүмоч цөөнгүй. Цол ахихын тулд гэмтэлгүй байна гэдэг гол зүйл. Энэ утгаараа Аонишики энэ жил ёкозүна болох магадлал маш өндөр.

Дараагийн озэки гэхээр толгойд хамгийн түрүүнд Ёшинофүжи орж ирж байна. Хурдтай, хүчтэй түүний цоглог барилдааныг үзэхэд таатай. Өнгөрсөн жил Нагояд шинэ маэгашира дээр түрүүлэхийн төлөө өрсөлдөж, Кюүшюүд ёкозүна Ооносатог унагаад анхны кинбошигоо авлаа. Ирэх башёд маэгаширагийн толгой бөх болохоор комүсүби цол өмнөхөн нь харагдаж байна. Том цолтнуудын дарамт, барилдаанд дасчихвал энэ жилдээ озэки болоход гайхах зүйлгүй.

Киришимад озэки цолоо эргүүлэн авах боломж байгаа. Гэмтлээр цолоо алдаж байсан ч сүүлийн үед барилдаан нь илт сайжирч байгаа. Угаасаа урагш дайрахдаа гарамгай, өрсөлдөгчийнхөө хүч чадлаа гаргах боломжийг хааж чаддаг нь дээд зиндаандаа дээгүүрт тооцогдоно. Ур чадвараар бол одоогийн озэки нараас дутахгүй. Өөрийн барилдаанаа гаргаж чадвал дахиад озэки болох боломж хангалттай бий.

Хоёр ёкозүна тэдний өмнө хана болон зогсох нь гарцаагүй. Хоошёорюү аварга Аонишикид хоёр дараалан ялагдаж, түрүүлэх боломжоо алдсан, Ооносато сүүлийн өдөр гэмтээд тэмцээнээс гарсан гээд тэдэнд харамсах зүйл олон байгаа. Одоо л ёкозүна хүн гэж хэн бэ гэдгийг харуулах цаг нь болсон. Цол ахих хүсэлтэй бөхчүүдтэй хэрхэн барилдах нь сонирхол татаж байна.

Өнөөдрийн сэдвээс гажиж байгаа ч дээд зиндааны доод хэсэгт ирээдүйтэй залуу Фүжинокава, озэки асан Асанояма нар байгааг хэлмээр байна. Энэ жил ч бөхчүүд биднийг хурц сайхан барилдаанаар баярлуулна гэж итгэж байна. Баяртай”

Эх сурвалж: М.Сугар.Эрдэнэ /Ub.Life/