.png){kind=logo}
“Дэлхийн хэмжил зүйн өдөр” тохиож байна. Үүнтэй холбогдуулан Стандарт, хэмжил зүйн газар, Хэмжил зүйн бодлогын газар, Хэмжил зүйн хүрээлэнгээс “Хэмжил дэлхийн хүнсний тогтолцоонд дэмжлэг үзүүлэх нь” сэдэвт семинарыг өнөөдөр 2023 оны 05 дугаар сарын 19-ны өдөр зохион байгууллаа.
Энэхүү үйл ажиллагааг нээж Стандарт, хэмжил зүйн газрын даргын албан үүргийг түр орлон гүйцэтгэгч Б.Ууганбаяр: “Энэ өдөр бол үндэсний үйлдвэрлэгч, хэрэглэгч, иргэн бүрийн эрх ашгийг хамгаалах хэмжлийн нэгдмэл байдлыг хангах үүрэгтэй хэмжил зүйчдийн баярын өдөр юм.
Монгол Улсын Засгийн газар, Монгол Улсын Шадар сайдын зүгээс Стандарт хэмжил зүйн салбарын үйл ажиллагаанд ихээхэн анхаарч, Хууль, Эрх зүйн орчноо боловсронгуй болгох, Төрөөс баримтлах бодлого, Стандарт ба хөгжил үндэсний хөтөлбөр боловсруулан 21 аймаг, яам болон мэргэжлийн байгууллагуудын дунд хэлэлцүүлж, холбогдох шатны байгууллагад хүргүүлэн батлуулахаар ажиллаж байна.
Ингээд хэмжил зүйн салбарт ажиллаж байсан үе үеийн ахмадууд, энэ салбарт хүчин зүтгэж байгаа бүх хэмжил зүйчиддээ Дэлхийн хэмжил зүйн өдрийн баярын мэндийг дахин хүргэж, ажлын амжилт, эрүүл энх сайн сайхан бүхнийг хүсэн ерөөе” хэмээн хэллээ.
Хүнсний аюулгүй байдалд хэмжил зүйн гүйцэтгэх үүрэг, ач холбогдол, хяналтын тогтолцоо, судалгаа шинжилгээнд ашиглаж байгаа хэмжүүр, хэмжих хэрэгсэлийн ашиглалт, хэмжил зүйн үйл ажиллагаа, тогтолцоо, уялдаа холбооны хүрээнд явагдлаа.
Монгол Улсын хэмжил зүйн байгууллагын 100 жилийн түүхэн ойн баярыг тохиолдуулан эрхэлсэн ажилдаа амжилт гарган, хийж бүтээснээрээ бусдыгаа хошуучлан ажиллаж байгаа алба хаагчид шагнагдлаа.
Тодруулбал, Монгол Улсын хууль тогтоомжийг хэрэгжүүлэх, Стандартчилал, тохирлын үнэлгээ, Хэмжил зүйн салбарыг хөгжүүлэх үйлсэд идэвхи зүтгэл, үр бүтээлтэй ажилласан амжилтыг нь үнэлэн “ХҮНДЭТ ЖУУХ”-аар нийт 14 албан хаагчийг шагналаа. Шагнал авсан мэргэжилтнүүддээ баяр хүргэж цаашдынх нь ажил, амьдралд нь хамгийн сайн сайхан бүхнийг хүсэн ерөөе.
Семинарын үйл ажиллагаанд “Хүнсний аюулгүй байдлыг хангахад чанарын дэд бүтцээр дэмжих нь” сэдвээр – СХЗГ-ын Хэмжил зүйн бодлогын газрын дарга Д.Нарангэрэл, “Монгол орны мөөгний химийн найрлага, биологийн идэвхийн судалгаа” сэдвээр МУИС-ийн Шинжлэх ухааны сургуулийн Химийн тэнхимийн профессор, доктор Ш.Нармандах, “Хүнсний салбарын хяналт” сэдвээр ХХААХҮЯ-ны Хүнсний хяналтын газрын ахлах мэргэжилтэн Ц.Батцагаан, “Цөмийн технологийн хэрэглээ хүнсний салбарт” сэдвээр СХЗГ-ын ХАБҮЛЛ-ийн Цацрагийн хяналтын лабораторийн эрхлэгч Х.Идэрмөнх, “Биологийн идэвхт бүтээгдэхүүний тухай” сэдвээр “Монос хүнс” ХК-ий Лабораторийн эрхлэгч Б.Хулангоо нар илтгэл тавьж, мэдээлэл өглөө.
Энэхүү семинарт ХХААХҮЯ, БХЯ, ЗХЖШ, МУИС, ШУИС-ийн Химийн тэнхим, Монос Хүнс ХК, Стандарт хэмжил зүйн газрын Төв болон орон нутгийн Стандарт хэмжил зүйн хэлтэс, СХЗГ-ын Хүнсний аюулгүй байдал, үндэсний лавлагаа лаборатори, Нийслэлийн төв лаборатори, салбарын яам, агентлагуудын харьяа Хэмжил зүйн алба, лабораториуд, Хэмжил зүйн үйл ажиллагаа эрхэлж байгаа ААНБ-ууд, Хэмжил зүйн мэргэжлийн холбоо, ТББ-уудын төлөөлөл болох нийт 150 гаруй хэмжил зүйчид, мэргэжлийн байгууллагын төлөөлөгч нар оролцлоо.
Энэ өдөр олон улс орны засгийн газар болон үндэсний хэмжил зүйн байгууллагууд, хүрээлэнгүүдэд ажиллаж буй бүх хүмүүсийн оруулсан хувь нэмрийг үнэлж, тэмдэглэдэг юм.
Хүний эрүүл мэнд, аюулгүй байдал хангагдах, хүрээлэн буй орчны чанар, тогтвортой байдлыг сайжруулахад стандарт хэмжил зүйн салбарын мэргэжлийн байгууллагаас эхлээд иргэн бүрийн оролцоо, хамтын ажиллагаа, дэмжлэг маш чухал ач холбогдолтой юм.
