.png){kind=logo}
Б.Болортуяа дэлхийн чансааг тэргүүлэгч өрсөлдөгчдөө бүгдийг нь цэвэр ялж алтан медаль хүртэснээр Будапешт хотноо болж буй чөлөөт бөхийн Дэлхийн чансааны тэмцээнээс Монголын баг 2 дахь алтан медалиа аваад байна.
Олимп, дэлхийн хүрэл медальт, Монгол Улсын гавьяат тамирчин Бат-Очирын Болортуяатай эмэгтэйчүүдийн 53 кг жингийн финалд энэ жингийн дэлхийн чансааг тэргүүлэгч, 2023 оны Пан-Америкийн аварга, 2021 оны U23 насны дэлхийн аварга Эквадорын Л.Иепес Гузман-тай барилдах байсан ч дэвжээнд гарч ирээгүй юм.
Б.Болортуяа эхний тойрогт хийлж, улмаар Европийн хошой аварга Шведийн Э.Малмгренийг 4 минут 15 секундэд 10:0 гэсэн оноогоор цэвэр, 2018 оны ДАШТ-ий хүрэл медальт Канадын Д.Вейкерийг 48 секундэд 10:0 оноогоор цэвэр, 2022 оны дэлхийн аварга АНУ-ын Д.Парришийг 2 минут 42 секундэд 13:2 оноогоор цэвэр ялаад байсан.
53 кг-ийн чансааг тэмцээний өмнөх байдлаар Л.Иепес Гузман тэргүүлж, Парриш 2-т, Малмгрен 4-т бичигдэж байв. Харин 3-т бичигдэж буй Б.Хуланг дотооддоо Б.Болортуяа давамгайлсан билээ.
