.png){kind=logo}
Монголын үндэсний их баяр наадам өндөрлөж, Дэлхийг дэлдийлгэх "Наадам"-ууд шил шилээ даран айсуй.
Энэ зуны спортын ертөнцийн гол үйл явдал болох дөрвөн жилд нэг зохиогддог эмэгтэйчүүдийн хөлбөмбөгийн 9 дэх удаагийн Дэлхийн аварга шалгаруулах тэмцээн 7 дугаар сарын 20-ноос 8дугаар сарын 20-нийг дуустал бүтэн сарын турш бөмбөрцөгийн өмнөд хагаст, тухайлбал Австрали, Шинэ Зеландын 9 хотод явагдах бөгөөд анх удаагаа 32 шилдэг баг оролцох юм.
Ногоон тивийн ногоон талбайд эмэгтэйчүүдийн шинэ дэлхийн аварга тодрохоос нэгхэн хоногийн өмнө ( наймдугаар сарын 19) Унгарын Будапешт хотноо хоёр жилд нэг удаа зохиогддог, хамрах цар хүрээ, нэр хүнд, оролцогчдын болон үзэгчдийн тоогуур бас л дээгүүр ордог хөнгөн атлетикийн Дэлхийн аварга шалгаруулах 19 дэх удаагийн тэмцээн эхэлж 9 хоногийн турш үргэлжилнэ.
"Спортын хатан хаан"-ы дэлхийн аваргад Монголын маань дөрвөн тамирчин марафоны төрөлд оролцоно.
Өнөө цагийн хөнгөнатлетикийн оддын өрсөлдөөнийг бүтэн ес хоногийн турш харж, Монголын марафончдынхоо захыг нь мушгиж байтал дараагийн томоохон тэмцээн эхэлнэ дээ.
Тэр нь дөрвөн жилд нэг удаа болдог сагсанбөмбөгийн эрэгтэйчүүдийн Дэлхийн аварга шалгаруулах тэмцээн.
Ирэх наймдугаар сарын 25- наас есдүгээр сарын 10 хүртэл Япон, Филиппин, Индонези гээд гурван улсыг дамнан зохиогдох энэхүү тэмцээнд шилдэг 32 орны баг оролцоно.
19 дэх удаагийн ДАШТ -ээс "Парис-2024" олимпийн эрх олгох болохоор ( Европ, Америкийн тус бүр хоёр, Ази, Африк, Далайн орнуудын тус нэг шилдэг багууд эрх авна) бүүр ч "гал, гал" гарсан олон тоглолт болох нь дамжиггүй.
Дашрамд дурьдахад дөрвөн жилд ганцхан болдог энэхүү нэр хүндтэй тэмцээн Ази тивд гурав дараалан зохиогдох юм.
Өмнөх ДАШТ 2019 онд БНХАУ-д болсон бол энэ удаа Япон, Филиппин, Индонезид , харин 2027 оны ДАШТ Катарт болох билээ.
Жил болгон явагдаад байдаггүй, дэлхийг " дэлдийлгэдэг" том тэмцээнүүдийн тухайд гэхэд иймэрхүү.
Мөн Азийн " олимп" хэмээгддэг дөрвөн жилд нэг болдог Азийн зуны XIX наадам 9 дүгээр сарын 23- наас 10 дугаар сарын 8- нд БНХАУ-ын Ханжоуд нэгэн он хойшлогдоод болох гэж байна.
Азийн олимпийн зөвлөлийн гишүүн 45 орны 10 мянга гаран тамирчин 40 спортын төрөлд өрсөлдөнө.
Ц.Энхтүвшин Таван цагариг сонин
