.png){kind=logo}
ВАШИНГТОН. /Reuters/. Монгол Улс газрын ховор элемент олборлох тал дээр АНУ-тай хамтын ажиллагаагаа гүнзгийрүүлнэ гэж Ерөнхий сайд Л.Оюун-Эрдэнэ Вашингтонд хийж буй айлчлалынхаа үеэр “Reuters” агентлагт ярилцлага өгөх үеэрээ мэдэгджээ.
Гэхдээ АНУ, Хятадын хооронд үүсээд буй “шинэ Хүйтэн дайн” дэлхийн эдийн засагт сөргөөр нөлөөлж болзошгүйг тэрбээр мөн анхааруулсан байна.
Монгол Улс нь газрын ховор элементүүд, зэсийн томоохон орд газруудтай бөгөөд эдгээр металл нь батлан хамгаалахын тоног төхөөрөмж зэрэг өндөр технологийн үйлдвэрлэлд, мөн уур амьсгалын өөрчлөлтийг сааруулах чиглэлд автомашины зах зээлийг “цахилгаанжуулах” Ерөнхийлөгч Жо Байдены хүчин чармайлтад амин чухал ач холбогдолтой юм.
Л.Оюун-Эрдэнэ АНУ-ын Дэд ерөнхийлөгч Камала Харристай лхагва гарагт уулзаж, “Нээлттэй тэнгэр” иргэний нисэхийн гэрээнд гарын үсэг зурахаар, мөн түүнчлэн эдийн засгийн хамтын ажиллагаагаа өргөжүүлэхээр тохиролцсоны дараа АНУ дахь Монголын Элчин сайдын яамны байранд “Reuters” агентлагт ярилцлага өглөө.
“Бид газрын ховор элемент, чухал ашигт малтмал, тэр дундаа зэсийг олборлох чиглэлд хамтын ажиллагаа өрнүүлэх боломжийн талаар хэлэлцсэн” гэж Л.Оюун-Эрдэнэ ярилаа.
Монголын стратегийн гуравдагч чухал хөрш болох АНУ-тай газрын ховор элемент, чухал ашигт малтмалыг олборлох салбарт хамтын ажиллагааг хэдийнээс өрнүүлсээр ирсэн бөгөөд зургаадугаар сард Монголын Уул уурхай, хүнд үйлдвэрийн яам болон АНУ-ын Төрийн департамент харилцан ойлголцлын санамж бичиг байгуулснаар улам гүнзгийрэх бололцоо бүрдсэнийг тэрбээр онцолжээ.
Монгол Улс дэлхий дээрх газрын ховор элементийн ордуудын дийлэнхийг “хянадаг” хөрш Хятад улс болон АНУ-тай сайн харилцаагаа хадгалахыг эрмэлздэг. Гэхдээ их гүргүүдийн өрсөлдөөн ширүүсвэл Хятад, Оросын дунд оршдог далайд гарцгүй манайхтай төстэй орнууд хохирно гэдгийг тэрбээр анхааруулав.
“Шинэ Хүйтэн дайн эхний хүйтэн дайнаас тэс өөр, улам хүнд байх вий гэдгээс би хувьдаа эмээж байна” гэж үргэлжлүүлэн хэлээд, дэлхийн олон улс оронд, ялангуяа олон улсын эдийн засагт ноцтой сөрөг үр дагавар учрахаас зайлсхийхийн тулд илүү хариуцлагатай байхыг томоохон гүрнүүдэд уриалжээ.
Л.Оюун-Эрдэнэ мөн Монголын тал “Tesla” компанийн гүйцэтгэх захирал Илон Масктай цахилгаан тээврийн хэрэгсэл, сансрын салбарт хамтран ажиллах, хөрөнгө оруулах боломжийн талаар хэлэлцээ өрнүүлж буйг ярилцлагынхаа үеэр дурджээ. Гэхдээ энэ удаагийн айлчлалынхаа үеэр тэрбээр И.Масктай уулзахгүй аж. Монголын Ерөнхий сайд Калифорнид очиж, И.Маск болон технологийн салбарын бусад манлайлагчидтай уулзах тусдаа айлчлал хийхээр төлөвлөж байгаа бөгөөд одоогоор хараахан товлоогүй байгаа юм байна.
АНУ-д айлчлах хугацаандаа Л.Оюун-Эрдэнэ АНУ-ын Агаарын нислэг, сансрын уудмыг шинжлэн судлах төвд /NASA/ зочлохоос гадна Төрийн нарийн бичгийн дарга Энтони Блинкентэй уулзах төлөвтэй байна. Тэрбээр АНУ-ыг "Монголыг ардчиллын замд хөтөлсөн Алтан гадас од" хэмээн тодорхойлоод “ардчиллын үнэт зүйлсээ цаашид хэрхэн бэхжүүлэх” талаар ярилцана гэв.
Эх сурвалж: МОНЦАМЭ агентлаг Э.Хулан
