.png){kind=logo}
Унгарын Будапешт хотноо 8 дугаар сарын 19-нд эхэлсэн хөнгөн атлетикийн дэлхийн аварга шалгаруулах 19 дэх удаагийн тэмцээн гурав дахь өдрөө үргэлжилж байна.
Хөнгөн атлетикийн ямар ч уралдаан тэмцээний хамгийн гол "үзвэр" нь гүйлтийн 100 метрийн уралдаан байдаг. Эрэгтэй 100 метрт домогт Усайн Болт зодог тайлснаас хойш олигтой од бүү хэл "солир" ч төрөхгүй байгаа. Америкийн Коулмэн гээд дэлхийн аварга нь "допинг"-ийн хэл амтай, олимпын аварга Италийн Ламонт Жэйкобс нь тогтвортой амжилт үзүүлэхгүй. Тиймээс ч эрэгтэйчүүдийн 100 метрт хэн түрүүлэхийг таахад хэцүү. Энэ удаа л гэхэд Коулман дөнгөж 5-д орж, Жэйкобс финалд ч шалгарч чадсангүй. Харин "дэлхийн хамгийн хурдан" эрэгтэйгээр АНУ-ын ойрын зайн гүйгч Ноа Лайлз 9,83 секундын амжилтаар энэ зайд дэлхийн анхны алтан медалиа хүртэн тодорлоо. Лайлз бол 200 метрт гаршсан ( энэ зайд дэлхийн хошой алттай) бөгөөд энэ ДАШТ-д 3 алт авах ( 100м, 200м, 4х100м) зорилготой ирснийхээ хамгийн хэцүүг ийнхүү биелүүллээ.
Мөнгөн медалийг Ботсвана улсын Лэтсели Тебого 9,88 амжилтаар хүртсэн. Энэ нь эрэгтэй 100 метрт Африк тивийн анхны медаль юм. Ойрын зайд африкууд түрэн гарч ирж байгаа юм биш биз?
Эмэгтэйчүүдийн 100 метр бол Ямайк бүсгүйчүүдийн " эзэмшилд" ирээд нилээн олон жил болж байна. 100 метрийн зайд л гэхэд олимпын хошой алт, дэлхийн таван алттай Шелли Энн Фрэйзер-Прайс, олимпын хүрэл, дэлхийн мөнгөтэй Шерика Жэксон ( Фрэйзер-Прайс, Жэксон хоёрын зөвхөн 100 м-т үзүүлсэн амжилтыг дурьдлаа. Буухиа болон бусад зайд авсан медалийг нь нэмвэл тоочиж барагдахгүй ) , мөн Олимпийн аварга, дэлхийн хүрэлтэй Элайн Томпсон гээд гурван ч топ тамирчин бий, Ямайкаас.
Энэ удаагийн ДАШТ-ий финалд гэхэд Жэксон, Фрейзер-Прайс хоёроос гадна Кот д ивуарын Та Лу, Их Британийн Дина Эшер Смит , АНУ-ын залуу од ШаКэрри Ричардсон гээд олон тэнцүүхэн өрсөлдөгчид хэн нь дэлхийн хамгийн хурдан эмэгтэй болохоор үзэлцлээ.
Яах аргагүй залуу насны эрч хүчээр АНУ-ын 23 настай ШаКэрри Ричардсон 10,65 секундын амжилтаар дэлхийн аварга болж, анхны алтан медалиа зүүлээ. Түүний араас Ямайкийн хоёр Жэксон, Фрэйзер-Прайс нар 10,72 болон 10,77 амжилтаар мөнгө, хүрэл медаль "цуглуулгандаа" нэмэрлэв.
Хэдийгээр томоохон тэмцээнд түрүүлээгүй ч ( Олимпын эрх авсан ч марихуан хэрэглэн эрхээ хасуулж байсан) гадаад төрх (урт хумс, тод өнгийн үс), дуулиан шуугианаараа хэдийнээ од болоод байсан Ричардсон өнөө цагт домогт Флоренс Гриффит Жойнерийн өнгө төрхийг санагдуулж байгаа билээ.
Будапештэд сүүлийн таван ДАШТ-д дараалан түрүүлээд байсан Польшийн домог " Дүүгүүр" Павел Файдек медальгүй хоцорч бас нэгэн дуулиан нэмсэн.
Эмэгтэй уртын харайлтад Сербийн Ивана Вулета 7.14 метр, эрэгтэй гурвын харайлтад Буркино Фасо улсын Юг Фабрис Занго 17,64 метр харайж, дэлхийн аварга болж, шинэ түүх бүтээж, шинэ нэртэй хөнгөн атлетик, спорт сонирхогчид танилцаж байна даа.
Ц.Энхтүвшин Таван цагариг сонин
