ПАРИС, 2024 оны наймдугаар сарын 2 /CNBC/. Парисын Олимпын наадам амжилттай үргэлжилж, олон арван медаль эздэдээ очсоор байна.

Медаль, олимпын бэлгэдэл сахиусыг дуурайлган хийсэн чихмэл тоглоом, наадмын албан ёсны постер бүхий “нууцлаг” хайрцагнаас гадна зарим медальтан өөрийн гаргасан хичээл зүтгэлийнхээ төлөө нэмэлт мөнгөн урамшуулал авдаг.

Олон улсын Олимпын хорооноос медаль хүртсэнийх нь төлөө тамирчдад мөнгөн шагнал олгодоггүй боловч дэлхийн хэд хэдэн улс тамирчдаа урамшуулан шагнадаг. Тэгвэл Үндэсний олимпын хороод, спортын холбоод болон хэвлэл мэдээллийн хэрэгслүүдийн мэдээлэлд үндэслэн CNBC телевиз шагналын хэмжээг нэгтгэн эмхэтгэснийг танилцуулъя.

Хамгийн өндөр шагнал

Олимпын аваргууддаа Хонконг, Сингапур хамгийн өндөр шагнал өгнө.

Парист өрсөлдөж буй Хонконгийн тамирчдад олгох мөнгөн урамшууллын дүн Токиогийн зуны Олимпынхоос 20 хувиар өсжээ. Тодруулбал, алтан медаль хүртсэн тамирчдад 6 сая хонконг доллар /768 мянган ам.доллар/ олгоно гэж Хонконгийн засаг захиргаанаас энэ сарын эхээр мэдэгдсэн байна. Харин мөнгө, хүрэл медальтнууд 3 сая, 1.5 сая хонконг долларын урамшуулал тус тус авах юм.

Харин Сингапурын эрх баригчид Олимпын алтан медальтнууддаа 1 сая сингапур доллар буюу 745 300 ам.доллар, мөнгөн медаль хүртсэн тамирчдад 500 000 сингапур доллар, хүрэл медальтнуудад 250 мянган сингапур доллар өгнө.

Алтан медаль хүртсэн тамирчдадаа зургаан оронтой дүн бүхий мөнгөн шагнал олгодог бусад орнуудыг дурдвал, Израил, Малайз, Казахстан, Индонез орж байна. Израилын зүгээс алтан медальд нэг сая израил шекел /270 537 ам.доллар/ санал болгож байгаа нь Токиогийн наадмынхаас 50 хувиар өссөн үзүүлэлт юм.

Зохион байгуулагч орон болох Франц ч мөн адил мөнгөн урамшууллаа нэмэгдүүлсэн гэх мэдээлэл байна. Алтан медаль хүртсэн тамирчдыг 80 мянган евро буюу 86 528 ам.доллароор урамшуулах төлөвтэй байгаа нь өмнөх зуны Олимпоор санал болгосноос 15 мянган еврогоор илүү байгаа юм.

Үүнээс гадна зарим улс орнууд шагналын тавцан дээр зогсож чадаагүй тамирчдад ч шагнал урамшуулал өгдөг байна. Тухайлбал, Германы Спортын тусламжийн сангаас Олимпын наадамд эхний найман байрт шалгарсан тамирчдад мөнгөн шагнал олгодог. Алтан медаль хүртсэн тамирчдын хувьд 20 мянган евро авдаг байна.

Энэтхэгийн Олимпын тамирчид засгийн газар болон үндэсний спортын байгууллагуудын аль алинаас мөнгөн шагнал хүртдэг гэж тус улсын хэвлэлүүд мэдээлж байна. Засгийн газар алтан медаль хүртсэн тамирчдад 7.5 сая рупи буюу 90 мянган ам.доллар өгдөг бол Энэтхэгийн Олимпын холбоо түүнээс тусдаа 10 сая рупи өгдөг гэнэ.

Машин, үхэр, орон сууц

Мөн зарим тамирчдын хувьд бэлэн мөнгөнөөс гадна эсвэл түүний оронд засгийн газар болон хувийн компаниудаас орон сууц, машин зэрэг нэмэлт шагнал авах боломжтой байдаг.

Казахстаны Олимпын тамирчид алтан медаль хүртсэн тохиолдолд 250 мянган ам.доллар, харин мөнгөн медаль хүртвэл 150 мянган ам.доллар, хүрэл медаль авбал 75 мянган ам.доллар авах боломжтой гэж хэвлэлүүд мэдээлжээ. Мөн медаль хүртсэн хүмүүст төрөөс орон сууц өгдөг байна.

Малайзын Үндэсний спортын зөвлөлөөс алтан медаль хүртсэн тамирчдад 1 сая ринггит буюу 215 563 ам.доллар, мөнгөн медаль хүртсэн тамирчдад 300 мянган ринггит, хүрэл медальтнуудад 100 мянган ринггит олгохоор төлөвлөж байгаа талаар тус улсын хэвлэлүүд мэдээлж байна. Малайзын зарим хувийн компаниуд тансаг зэрэглэлийн орон сууц эсвэл нэмэлт мөнгөн шагнал гэх мэт өөр урамшууллуудыг санал болгосон ч гэх мэдээлэл байна.

Малайзын Залуучууд, спортын сайд Ханна Йеогийн хэлсэн үгийг эш татан орон нутгийн хэвлэлүүдэд мэдээлснээр, медалийн тавцан дээр гарсан бүх тамирчинд “гадаадад үйлдвэрлэгдсэн машин” бэлэглэх ажээ.

Өмнөд Солонгосын медальтнуудад мөнгөн шагналаас гадна тэтгэмж олгодог. Алтан медаль хүртсэн тамирчид 63 сая воны /43 288 ам.доллар/ мөнгөн шагналаас гадна насан туршдаа сар бүр нэг сая воны тэтгэмж эсвэл 67.2 сая воны нэг удаагийн тэтгэмжийн аль нэгийг сонгон авах боломжтой гэж тус улсын хэвлэлүүд мэдээлж байна. Харин мөнгөн медаль хүртсэн тамирчин 35 сая вон, хүрэл медалийн эзэн болсон тамирчин 25 сая вон авдаг.

Түүнчлэн зарим тамирчид үнэгүй ундаа, тээврийн хэрэгслээр үнэ төлбөргүй зорчих эрх зэрэг бусад бэлгийг авах боломжтой. Хонконгийн нийтийн тээврийн оператор “MTR” корпорацын зүгээс Олимпын медальтнуудад насан туршдаа үнэ төлбөргүй зорчих тасалбар олгоно гэж орон нутгийн хэвлэлүүд мэдээлж байна.

Польшийн тамирчин Клаудиа Зволиньскагийн хувьд каноэ завины тэмцээнд мөнгөн медаль хүртсэнийхээ төлөө Олимпын хорооноос 200 мянган злотын /50 374 ам.доллар/ мөнгөн шагнал хүртэхээс гадна уран зураг, амралтын газрын эрхийн бичиг, тэтгэлэг, очир алмааз авах төлөвтэй байна.

Олимпод оролцогчид хачирхалтай сонин бэлэг авах тохиолдлууд ч мөн бий. Тухайлбал, Токиогийн наадамд Малайзыг төлөөлөн оролцсон тамирчдад насан туршид нь хоол ундаагаар үнэгүй үйлчилнэ гэж нэгэн орон нутгийн сүлжээ ресторан амласан талаар хэвлэлүүд мэдээлж байлаа.

Мөн Японы ширээний теннисчин Касүми Ишикава Токиогийн наадмаас мөнгөн медаль хүртсэнийхээ дараа 100 шуудай будаа бэлгэнд авчээ. Түүнчлэн Индонезын бадминтоны алтан медальт Априяни Рахаю, Грейсиа Поли нарт таван үнээ, бөөрөнхий махны ресторан, шинэ байшин санал болгосон гэх мэдээлэл хэвлэлүүдээр цацагдаж байлаа.

Харин Их Британи, Норвег болон бусад цөөн хэдэн орны тамирчид шагналын тавцан дээр гарсныхаа төлөө ямар нэгэн мөнгөн урамшуулал авдаггүй байна.

Эх сурвалж: МОНЦАМЭ Агентлаг Э.Хулан