.png){kind=logo}
ПАРИС, 2024 оны аравдугаар сарын 18 /AFP/. Францын тэргүүн баян, тансаг зэрэглэлийн бараа бүтээгдэхүүний магнат Бернар Арногийн гэр бүлийн компани хөл бөмбөгийн “Paris FC” клубийн дийлэнх хувьцааг худалдаж авахаар “онцгой хэлэлцээ” хийж байгаагаа мэдэгджээ.
Австрийн энергийн ундааны “Red Bull” компани ч мөн тус клубийн “цөөн хувьцааг” авахаар хэлэлцээнд орсон гэж Б.Арногийн гэр бүлийн “Agache” компани мэдэгдсэн нь Францын хөл бөмбөгийн салбарыг үндсээр нь өөрчилж болзошгүй алхам болж байна.
Хэлэлцээрийн дагуу эхний ээлжинд Б.Арногийн гэр бүлийнхэн “Paris FC” клубийн 55 хувийг, “Red Bull” компани 15 хувийг эзэмших төлөвтэй байна гэж нэрээ нууцалсан эх сурвалж мэдээлжээ.
“Paris FC” клубийн ерөнхийлөгчөөр 2012 оноос хойш ажиллаж буй бизнес эрхлэгч, 72 настай Пьер Феррачи 2027 онд Б.Арногийн гэр бүлд зарах хүртлээ хувьцааны 30 хувийг өөртөө үлдээх бөгөөд уг худалдааг хийснээр тэд клубийн 85 хувийг эзэмшинэ гэж мөн эх сурвалж хэлсэн байна.
“Agache” компани тус клубийн дийлэнх хувьцаа эзэмшигч болсноор клуб цар хүрээгээ өөрчилж, шинэ амжилтуудад хүрэхийг эрмэлзэх болно тус компанийн мэдэгдэлд дурджээ.
Б.Арно бол дэлхийн хамгийн баян хүмүүсийн нэг бөгөөд тансаг зэрэглэлийн LVMH компанийг удирддаг боловч өөр салбаруудад ч мөн “эзэнт гүрнээ” байгуулахаар төлөвлөж байгаа ба саяхан Paris Match долоо хоног тутмын сэтгүүлийг худалдан авсан юм.
Дээр дурдсан худалдан авалт нь 2011 онд “Qatar Sports Investments” компани “Пари-Сен Жермен” багийг худалдаж авснаас хойш дотоодын лигт тус клуб ноёрхож ирсэн Францын хөл бөмбөгийн ертөнцийг бүрэн өөрчлөх магадлалтай гэж шинжээчид үзэж байна.
Эх сурвалж: МОНЦАМЭ Агентлаг Э.Хулан
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!