МҮХАҮТ, Шинжлэх ухааны парктай хамтран ажиллана

Улаанбаатар, 2025 оны гуравдугаар сарын 13 /МОНЦАМЭ/. Монголын үндэсний худалдаа аж үйлдвэрийн танхим /МҮХАҮТ/, Шинжлэх ухааны парктай хамтран ажиллахаар боллоо.

Тус хоёр байгууллагын төлөөлөл уулзан, цаашид ажлын хэсэг байгуулж, хамтын ажиллагааны гэрээ, нарийвчилсан төлөвлөгөө гарган, шинжлэх ухааны хүрээлэнгүүдийн үйл ажиллагаатай танилцах, шинжлэх ухааны байгууллагаас судалгаа, тоон мэдээллийг тогтмол авч, контент хэлбэрээр бизнес эрхлэгчдэд хүргэх зэргээр хамтран ажиллах юм.

Европын холбооны Худалдааг дэмжих төслийн санхүүжилтээр арьс шир, ноос ноолуур, мах, гоо сайхан, чацарганы кластер, мөн эдгээрийг нэгтгэсэн экспортыг дэмжих кластерыг МҮХАҮТ-д хөгжүүлж байгаа.

Хөдөө аж ахуй, мах махан бүтээгдэхүүн үйлдвэрлэлийн хог хаягдал дээр шинжлэх ухаан суурьтай хөгжүүлэлт хийх хэрэгцээ бий. Иймд хамтын асуудалд суурилсан платформ /problem solving platform/ бий болгох, e-business-ийг шилжүүлэн авахаар төлөвлөж байгаа. Бизнес эрхлэгчдэд шинжлэх ухааны мэдээлэл өгөх, эрдэмтдийн судалгаа, хөгжүүлэлтийн судалгааг хийж, ШУПЗ мэдээллээр хангах, холбох ажлыг хийх боломжтойг МҮХАХҮТ-ын гүйцэтгэх захирал А.Амартөгс Шинжлэх ухааны паркийн Захиргааны гүйцэтгэх захирал Б.Амарсанаатай уулзах үеэрээ хэлсэн юм.

Гүйцэтгэх захирал Б.Амарсанаа, “Бид улсын их дээд сургууль, эрдэм шинжилгээний байгууллага, төр, хувийн хэвшлийн хоорондын хамтын ажиллагааг эрчимжүүлэх, эрдэм шинжилгээ, судалгааны үр дүнг үйлдвэрлэл, зах зээлд нэвтрүүлэх, өрсөлдөхүйц технологи суурьтай гарааны компанийг бойжуулах, дэвшилтэт технологи дамжуулалтыг дэмжих, орчин үеийн технологийн үйлдвэрлэлийг хөгжүүлэх, инновацын дэд бүтцийг байгуулах, тэдгээрийн хууль эрх зүйн орчныг боловсронгуй болгох үйл ажиллагаа явуулдаг. Технологи дамжуулах, инкубатор төвүүдийн хөгжлийн шатны хүндрэлтэй цаг үеийг даван туулахад МҮХАҮТ-тай хамтран ажиллах зайлшгүй шаардлагатай байна” хэмээн ярьсныг МҮХАҮТ мэдээлжээ.

Эх сурвалж: МОНЦАМЭ Аентлаг Б.Оюундэлгэр