Дэлхийн шилдэг нисэх буудлуудыг “Чанги“ ОУНБ тэргүүлжээ

ВАШИНГТОН, 2025 оны дөрөвдүгээр сарын 10 /CNN/. Агаарын тээврийн үнэлгээний “Скайтракс” байгууллагаас шалгаруулдаг дэлхийн шилдэг нисэх буудлуудын жагсаалтыг Сингапурын “Чанги” нисэх буудал 13 дахь удаагаа тэргүүлжээ.

Тус нисэх буудал нь нислэгээс 48 хүртэлх цагийн өмнө ачаагаа бүртгүүлж, амралтынхаа нэг хэсгийг өнгөрүүлэх боломжийг зорчигчдод олгох үүднээс эрт бүртгүүлэх үйлчилгээг нэвтрүүлснээр олон хүний зорин очих газар болсон байна. 2024 онд 80 сая зорчигч хүлээн авсан энэ буудалд 10 давхар “Jewel” худалдааны төв, олон тооны цэцэрлэг, 40 м өндөртэй “Rain Vortex” хүрхрээ, спа, зочид буудал, үзэсгэлэн, музей, кино театр, мөн үлэг гүрвэлийн парк хүртэл бий.

“Скайтракс” мөн уг нисэх онгоцны буудлыг хоолны чанарын тал дээр маш сайн гэдгийг хүлээн зөвшөөрсөн байна. Энэ сарын 9-нд Мадрид хотноо болсон Дэлхийн нисэх онгоцны буудлын шагнал гардуулах ёслолын үеэр “Чанги” буудал “Хамгийн сайн хоолны газартай нисэх буудал”, “Хамгийн сайн угаалгын өрөөтэй нисэх буудал”, “Азийн шилдэг нисэх онгоцны буудал” зэрэг шагналуудыг хүртжээ.

Үлгэр жишээ энэ буудал цаашид өнгө төрхөө улам сайжруулахаар төлөвлөж байна. Тодруулбал, ирэх зургаан жилд үйлчилгээ, байгууламжуудаа сайжруулахад хоёр тэрбум гаруй ам.долларын хөрөнгө оруулалт хийх гэж байгаа тухай CNN Business өнгөрсөн сард мэдээлжээ. Мөн нисэх буудлыг өргөтгөхөөр төлөвлөж байгаа бөгөөд тав дахь терминалыг 2030-аад онд ашиглалтад оруулах ажээ.

“Скайтракс”-аас дэлхийн 565 нисэх онгоцны буудлын үйлчлүүлэгчдийн дунд явуулсан судалгаагаар шилдэг нисэх буудлуудын хоёрдугаарт урлагийн бүтээлүүдээр баялаг, архитектурын хувьд гайхамшигтай Катарын “Хамад” олон улсын нисэх онгоцны буудал бичигджээ. Уг буудал мөн Ойрх Дорнодын шилдэг нисэх онгоцны буудлаар шалгарсан байна.

Түүнчлэн Азийн нисэх онгоцны буудлууд жагсаалтын 3-6 дугаар байрыг эзэлсэн нь тус бүс нутаг Хойд Америк, Европыг ардаа орхиж агаарын тээврийн салбарт толгой цохиж байгааг дахин нотоллоо. Тодруулбал, Токиогийн “Ханэда” /дэлхийн хамгийн цэвэрхэн нисэх онгоцны буудлаар нэрлэгдсэн/ гуравдугаарт бичигдэж, Сөүлийн “Инчон” олон улсын нисэх онгоцны буудал /дэлхийн шилдэг ажилтнуудтай нисэх онгоцны буудлаар шалгарсан/, Японы “Нарита” болон Хонконгийн нисэх буудлууд удаалжээ.

Европын есөн нисэх онгоцны буудал эхний 20-д багтжээ. Жагсаалтын долоодугаарт Парисын “Шарль де Голль” бичигдсэнээр гурав дахь жилдээ Европын шилдэг нисэх онгоцны буудлаар шалгарсан байна. Мөн Ромын “Фьюмичино” наймдугаарт, Мюнхен, Цюрих, Хельсинки-Вантаа нисэх буудлууд 9, 10, 12 дугаарт тус тус бичигдсэн бол Истанбулын нисэх онгоцны буудал 14 дүгээрт, Венагийнх 15 дугаарт, Копенхаген хотынх 18 дугаарт жагсжээ.

Эх сурвалж: МОНЦАМЭ Агентлаг Э.Хулан