.png){kind=logo}
ДАЛЛАС, 2026 оны есдүгээр сарын 10 /Kazinform/. АНУ-ын Ерөнхийлөгч Дональд Трамп ирэх 11 дүгээр сард болох завсрын сонгуулиар Бүгд найрамдах нам Конгрессын хоёр танхимд олонхын суудлаа хадгалж үлдвэл АНУ-ын насанд хүрсэн иргэн бүрд 5000 ам.доллар өгнө гэж мэдэгджээ.
Тэрбээр Техас муж улсын Даллас хотод болсон Бүгд найрамдах намын их хуралд үг хэлэхдээ дээрх мэдэгдлийг хийсэн байна.
“Хэрэв Бүгд найрамдах намынхан Төлөөлөгчдийн танхим болон Сенатад олонхын суудлаа хадгалж үлдвэл манай улсын эдийн засгийн гайхалтай амжилтын үр дүнд... АНУ-ын насанд хүрсэн иргэн бүрд 5000 ам.долларын ногдол ашиг олгоно” гэж Д.Трамп хэлээд энэ нь "амжилттай компаниуд хөрөнгө оруулагчдадаа ногдол ашиг олгодогтой адил" байх болно хэмээн тайлбарлажээ.
“Бидний тавих ганцхан нөхцөл бол ногдол ашгийг АНУ-д зарцуулах ёстой. Та нарыг Канад руу явж мөнгөө тэнд үрэхийг бид хүсэхгүй. Хятад, Герман руу ч явуулахыг хүсэхгүй байна... Та нар мөнгөө АНУ-д үрэх ёстой” гэж Д.Трамп нэмж хэлсэн байна.
Бүгд найрамдах намын их хурлыг сурвалжилж буй “Би-Би-Си”-гийн сурвалжлагчийн мэдээлснээр, Д.Трамп сонгогчдын саналыг татах кампанит ажлын хүрээнд америкчуудад мөнгө амласан анхны Ерөнхийлөгч болж байгаа бололтой.
Түүнчлэн уг хөрөнгийг яг ямар эх үүсвэрээс гаргах, АНУ-ын Засгийн газар зарцуулалтад нь хэрхэн хяналт тавих, цаашлаад энэ нь хуульд нийцэх эсэх нь тодорхойгүй хэвээр байна.
2025 онд АНУ-ын насанд хүрсэн хүн амын тоо 267 сая орчим байсан байна. Энэ нь хүн бүрд 5 000 ам.долларын “Трампын ногдол ашгийг” олгоход 1.34 их наяд ам.доллар шаардлагатай гэсэн үг юм.
Одоогоор олон нийтийн дунд явуулсан санал асуулгуудын дийлэнхэд нь Ардчилсан нам тэргүүлж байгаа бөгөөд тус нам Төлөөлөгчдийн танхим төдийгүй Сенатад олонхын суудал эзлэх магадлал өндөр байна.
Д.Трамп АНУ-ын түүхэнд ерөнхийлөгчийн нам завсрын сонгуулиар ялагдсан тохиолдол байсныг дурдаад, “Бид үүнийг өөрчлөх ёстой” гэж хэлсэн байна. Тэрбээр америкчуудад хандан “саналын хуудсан дээр өөрийнх нь нэр байгаа мэт” саналаа өгөхийг уриалжээ.
Техас муж улсад үг хэлэх үеэрээ Д.Трамп 11 дүгээр сард Бүгд найрамдах нам ялагдвал америкчууд “хилээ, татварын хөнгөлөлтөө, аюулгүй байдлаа алдаж, хоёр жилийн өмнөх шиг хүнд байдалд орно” гэж мэдэгдсэн байна.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!