.png){kind=logo}
Нийслэлийн Засаг даргын тамгын газар, Нийслэлийн Аялал жуулчлалын газраас Монголын бурхан шашинтны төв Гандантэгчэнлин хийд болон МҮБХ-той хамтран “Монголчуудын өв соёлын Даншиг наадам-Хүрээ цам 2023”-ыг 8 дугаар сарын 5, 6-нд Хүй долоо худагт зохион байгуулна.
Даншиг наадмын үндэсний бөхийн барилдаанд 256, өвөр монгол, буриад бөхийн барилдаанд тус бүр 64 бөх барилдах аж. Бөхийн барилдаануудын 1, 2-ын даваа 8 дугаар сарын 5-ны өдөр, 3-аас дээших давааэы барилдаан 8 дугаар сарын 6-ны өдөр болно.
Дээрх гурван төрлийн бөхийн барилдааныг сугалаагаар барилдуулах бөгөөд барилдааны сугалааг наймдугаар сарын 4-ний өдөр "Монгол бөхийн өргөө"-нд зохион байгуулах аж.
Үндэсний бөхийн барилдаанд Даншигийн цолтой бөхчүүдийн эрэмбийг харгалзана гэж МҮБХ-ноос мэдээллээ.
Даншиг наадмыг зорин ирсэн монгол туургатан зочин бөхчүүд үндэсний бөх болон буриад, өвөр монгол бөхийн барилдаанд оролцон барилдах боломжтой. Харин улс, аймаг, сумын цолтой бөхчүүд барилдаанд давхар оролцохгүй аль нэг барилдааныг сонгон барилдахаар журамлах юм байна.
Үндэсний бөхийн барилдааныг МҮБХ-ны баталсан “Бөхийн барилдааны дүрэм”-ээр зохион байгуулах ажээ.
Зохион байгуулагчид болон ивээн тэтгэгч байгууллагуудаас бай шагналыг дараах байдлаар тогтоосон байгаа.
Үндэсний бөхийн барилдаан
Түрүүлсэн бөхөд 15,0 сая төгрөг, мөнгөн тоногтой эмээл, хазаар болон ивээн тэтгэгч байгууллагын шагнал
Үзүүрлэсэн бөхөд 10,0 сая төгрөг
Их шөвгийн 2 бөхөд тус бүр 3 сая төгрөг
Давааны бай шагнал 1-5 давсан бөхчүүдэд олгогдоно.
Буриад бөхийн барилдаан
Түрүүлсэн бөхөд 10,0 сая төгрөг, мөнгөн тоногтой эмээл, хазаар
Үзүүрлэсэн бөхөд 5,0 сая төгрөг
Их шөвгийн 2 бөхөд тус бүр 3 сая төгрөг
Давааны бай шагнал 1-3 давсан бөхчүүдэд олгогдоно.
Өвөр монгол бөхийн барилдаан
Түрүүлсэн бөхөд 10,0 сая төгрөг, мөнгөн тоногтой эмээл, хазаар
Үзүүрлэсэн бөхөд 5,0 сая төгрөг
Их шөвгийн 2 бөхөд тус бүр 3 сая төгрөг
Давааны бай шагнал 1-3 давсан бөхчүүдэд олгогдоно.
Ташрамд дуулгахад, "Даншиг наадмын бөхийн барилдааныг уламжлал ёсоор сугалаагаар зохион байгуулах бөгөөд орон нутагт 3-4 наадам давхцаж байгаа ч зодоглох бөхийн тоо хангалттай. Одоогоор ӨМӨЗО-оос 19 бөх хүрэлцэн ирээд байна. Бай шагналын хувьд бусад наадмаас өндөр, мөн Даншигийн цол олгоно. Цолны хувьд түүх, уламжлалаа сэргээн 2015 оноос олгож эхэлсэн хэмээн Монголын үндэсний бөхийн холбооны тэргүүн Ц.Магалжав онцолж байсан юм.
