Хөлбөмбөгийн 2026 оны ДАШТ-ий нээлт алдарт “АЦТЕКА“-д болно

АНУ, Мексик, Канад гээд гурван улс хамтран зохион байгуулах хөлбөмбөгийн ДАШТ -ий нээлтийн болон шигшээ тоглолт болох цэнгэлдэхийг ФИФА-аас зарлалаа.

2026 оны зургадугаар сарын 11-нд Мексикийн Мехико хотын алдар цуут "Ацтека" цэнгэлдэхэд 23 дахь удаагийн хөлбөмбөгийн ДАШТ эхлэх нь.

83 000 хүний суудалтай энэ гайхамшигт цэнгэлдэх бол хөлбөмбөгийн ДАШТ-ий финалыг хоёр удаа хүлээн авсан хоёрхон цэнгэлдэхийн нэг нь( нөгөө нь цуут "Маракана") билээ.

1970 онд энд хөлбөмбөгийн хаан Пеле 3 дахь удаагаа дэлхийн аварга болж, "Алтан дагина" цомыг өргөж байсан бол 1986 онд домогт Марадона энэ "Ацтека"-д "Алтан цом"-ыг хүртэж байлаа.

2016 онд алдар цуут "Ацтека"-д хөл тавьж байсан үеийнхээ бичлэг, зургийг сэтгэл хөдлөөд оруулчихлаа. Энд чинь Пеле, Марадона нар гайхамшигт тоглолтоо үзүүлж, дэлхийн аварга болж байсан хэмээн бодоход цэнгэлдэхээс нь агуу домгуудын амьсгал бараг сонсогдож байсан даа.

Гаднаас нь харахад "Ацтека" тийм томгүй харагддаг юм билээ. Учир нь талбай нь газрын түвшинээс доошоо 10-аад метрт оршдог. Бас нарны тусгалыг перпендикуляр тусахаар цэнгэлдэхийг барьсан болохоор нарны тусгалын давуу тал хоёр багт аль алинд нь гардаггүй онцлоготой гэж байсан.

За бүүр "Ацтек"-т эргээд сэтгэл санаагаараа оччихсон, хадуураад явж байна.

2026 оны ДАШТ-ий ( анх удаа 48 баг оролцоно) шигшээ буюу финалын тоглолт харин АНУ-ын Нью Йорк/ Нью Жерси хотын "Метлайф" хэмээх 82500 хүний суудалтай цэнгэлдэхэд долдугаар сарын 19-нд болох ажээ.