.png){kind=logo}
ЛОНДОН, 2025 оны дөрөвдүгээр сарын 8 /Reuters/. Сэргээгдэх эрчим хүчний үйлдвэрлэл өнгөрсөн онд дэлхийн цахилгаан эрчим хүчний үйлдвэрлэлийн 32 хувийг бүрдүүлснээр түүхэн дээд үзүүлэлтэд хүрсэн тухай эрчим хүчний судалгааны Ember төвөөс өнөөдөр мэдээлжээ.
АНУ-ын Ерөнхийлөгч Дональд Трампын татвар ногдуулах шийдвэрээс үүдэн худалдааны дайн дэгдэж, улмаар эрчим хүчний аюулгүй байдалтай холбоотой болгоомжлол өсөн нэмэгдвэл энэ онд сэргээгдэх эрчим хүчний эрэлт улам нэмэгдэх магадлалтай гэж Ember-ийн цахилгаан эрчим хүч, мэдээллийн шинжээч Юан Грэм Ройтерс агентлагт ярьсан байна.
Татвар тарифууд нь эрчим хүч, хөрөнгийн зах зээлийг уналтад оруулж, дэлхийн эдийн засгийн хямрал нүүрлэх вий гэсэн болгоомжлолыг үүсгээд байгаа юм. Ю.Грэм хэлэхдээ, татвар ногдуулах шийдвэр нь энэ жил цахилгаан эрчим хүчний эрэлтэд нөлөөлөх эсэхийг хэлэхэд эрт байгаа боловч сэргээгдэх эрчим хүчний салбарт эергээр нөлөөлөх магадлалтай гэлээ.
“Улс орнууд аюулгүй байдал, эрчим хүчний аюулгүй байдлын асуудалд урьд хожид байгаагүй ихээр анхаарал хандуулж байгаа тул энэ нь салхи, нар гэх мэт эх орондоо үйлдвэрлэсэн сэргээгдэх эрчим хүчийг улам бүр сонирхоход хүргэнэ гэж би хувьдаа бодож байна” хэмээн тэрбээр хэлсэн байна.
2024 онд дэлхийн цахилгаан эрчим хүчний нийт үйлдвэрлэл дэх салхи, ус, нарны эрчим хүч зэрэг сэргээгдэх эрчим хүчний эзлэх хувь хэмжээ өмнөх оны түүхэн дээд үзүүлэлтийг /30 хувь/ давлаа гэж Ember-ийн Дэлхийн эрчим хүчний тайланд бичжээ.
Дэлхийн сэргээгдэх эрчим хүчний холбооны гүйцэтгэх захирал Брюс Дуглас мэдэгдэхдээ, геополитик болон эдийн засгийн таагүй нөхцөл байдлаас үл шалтгаалан сэргээгдэх эрчим хүчний салбар өнгөрсөн онд нэмэлтээр 858 тераватт цаг цахилгаан эрчим хүч нийлүүлсэн нь Их Британи, Францын жилийн цахилгаан эрчим хүчний хэрэглээнээс давсан үзүүлэлт юм гэв.
Хиймэл оюун ухаан, дата төв, цахилгаан тээврийн хэрэгсэл, дулааны насос зэргээс үүдэлтэй цахилгааны хэрэглээ нь өнгөрсөн онд дэлхий даяар эрэлт 0.7 хувиар өсөхөд нөлөөлснийг тайланд дурджээ. 2024 оны хэт халуун цаг агаарын улмаас хөргөх системийн хэрэглээ нэмэгдсэнээр эрэлт мөн 0.7 хувь буюу 208 терраватт цагаар нэмэгдсэн байна.
Хийн цахилгаан станцууд дэлхийн цахилгаан эрчим хүчний үйлдвэрлэлийн 22 хувийг бүрдүүлсэн нь 2023 оныхтой харьцуулахад ерөнхийдөө өөрчлөгдөөгүй байна. Нүүрс нь дэлхийн нийт үйлдвэрлэлийн 34 хувийг эзэлснээр өмнөх оныхоос /36 хувь/ буурсан боловч хамгийн том эх үүсвэр хэвээр байна. Харин цөмийн эрчим хүч 2023 онд 9.1 хувь байснаасаа бага зэрэг буурч 9 хувь болжээ.
Эх сурвалж: МОНЦАМЭ Агентлаг Э.Хулан
