.png){kind=logo}
МОСКВА, 2026 оны долоодугаар сарын 25 /ТАСС/. Саяхан АНУ, Мексик, Канадад болж өнгөрсөн ДАШТ олон хөлбөмбөгчний чансаанд сайнаар нөлөөлж, тэдний зах зээлийн үнэлгээг багагүй өсгөлөө. Ингээд тоглогчдын шилжилт хөдөлгөөн, зах зээлийн үнэ цэн, тоглолтын статистик зэрэг мэдээллийг түгээдэг Transfermarkt цахим хуудасны хувилбараар ДАШТ-ий дараа дэлхийд хамгийн өндөр үнэлгээтэй болсон шилдэг 5 хөлбөмбөгчнийг танилцуулъя.
Эрлинг Холанд (Норвег)
Английн “Манчестер Сити” багийн довтлогч энэ залуу анх удаагаа ДАШТ-д оролцсон гэхэд өөрийгөө яруу тодоор харуулж чадлаа. Түүний хүчин зүтгэлийн ачаар Норвегийн шигшээ баг түүхэндээ анх удаа шөвгийн 8-д шалгарч, англичуудад нэмэлт цагт 1:2-оор хожигдлоо. Холанд 7 тоглолтод 5 гоол оруулж, 1 оновчтой дамжуулалт өгснөөр хэд хэдэн өвөрмөц амжилтыг тогтоосон юм. Өдгөө 26 настай тэрбээр яг энэ мөчид дэлхийн хамгийн өндөр үнэтэй /220 сая евро/ тоглогч болоод байна. Ийм үнээр түүнийг авахад харамсах зүйл үгүй ээ. Э.Холанд “МанСити”-гийн бүрэлдэхүүнд 198 тоглолтод оролцохдоо 162 гоол, шигшээ багийн бүрэлдэхүүнд 55 тоглолтод оролцохдоо 62 гоол оруулаад байгаа нь маш тогтвортой үзүүлэлт юм.
Ламин Ямаль (Испани)
Дөнгөж 19-хөн настайдаа дэлхийн аварга болсон энэ залуу ДАШТ-д бусдыг гайхшруулахаар сайн тоглоогүй бөгөөд 8 тоглолтод ганцхан гоол оруулж, ганцхан оновчтой дамжуулалт өгсөн юм. Гэхдээ “Барселона”-гийн тоглогч тэрбээр бэртлээ дөнгөж эдгээгээд ДАШТ-д оролцсон гэдгийг санах хэрэгтэй. Энэ жил 19 настай энэ хүү хэдийн дэлхийн болон Европын аварга болсон нь түүний авьяас чадварыг илтгэн харуулж байна. Шилжилт хөдөлгөөний үе дэх Ямалын үнэлгээ 220 сая евро болж, Холандын дараа хоёрдугаарт бичигдэж байгаа ажээ. Ямал, Холанд хоёрын үнэлгээ тус бүр 20 сая еврогоор нэмэгдсэн байна.
Килиан Мбаппе (Франц)
“Реал”-ын довтлогч 27 настай энэ залуу хамгийн өндөр үнэлгээтэй хөлбөмбөгчдийн чансааг тэргүүлнэ гэж олон хүн бодож байсан болов уу. Гэвч түүнд ганцхан л зүйл саад болсон юм. Францын шигшээ баг хагас шигшээд испаничуудад 0:2-оор, хүрлийн төлөөх тоглолтод 4:6-аар англичуудад хожигдсон билээ. Гэсэн хэдий ч Мбаппе 8 тоглолтод 10 гоол оруулснаар энэ удаагийн ДАШТ-ий төдийгүй ерөөсөө тус тэмцээний түүхэн дэх /нийт 22 гоол/ шилдэг довтлогчоор шалгарсан юм. Түүний трансферийн үнэлгээ 20 сая еврогоор өсөж, 200 саяд хүрчээ.
Майкл Олисе (Франц)
Францын шигшээгийн өөр нэгэн тоглогч ДАШТ-д өөрийгөө гялалзтал харуулсан нь Майкл Олисе юм. “Бавариа” багийн жигүүрийн хагас хамгаалагч тэрбээр 8 тоглолтод 7 оновчтой дамжуулалт өгсөн үзүүлэлтээр ДАШТ-ий шилдгээр тодорсон юм. Ийнхүү Олисе дэлхийн гурван удаагийн аварга Пелегийн 1970 оны тэмцээний үеэр /6 оновчтой дамжуулалт/ тогтоосон дээд амжилтыг эвдлээ. “Реал”-ынхан түүнийг ихэд сонирхож байгаа бөгөөд хэвлэлүүдэд бичсэнээр Мбаппе эх орон нэгтнээ Мадридын клубт очихыг шаргуу хүчтэй ятгаж байжээ. Өдгөө Олисегийн үнэлгээ 20 сая еврогоор өсөж, 170 саяд хүрсэн байна. Хэвлэлүүдэд бичсэнээр, “Реал” баг түүнийг 200 саяар авахад бэлэн байгаа бололтой.
Жүд Беллингэм (Англи)
“Реал”-ын хагас хамгаалагч энэ залуу өнгөрсөн улиралд тийм ч сайн тоглоогүй боловч ДАШТ-д нэр хүндээ өргөж чадлаа. Английн шигшээ баг сүүлийн 60 жилийн хугацаанд анх удаагаа дэлхийн аваргаас медаль хүртсэн бөгөөд Беллингэм хүрлийн төлөөх тоглолтын гол баатар байлаа. Өдгөө 23 настай тэрбээр 8 тоглолтод оролцохдоо 7 гоол оруулж, 1 оновчтой дамжуулалт өгснөөр нэг ДАШТ-д оруулсан бөмбөгний тоогоор Хари Линекер, Харри Кейн нарыг гүйцэж түрүүлэв. ДАШТ-ий дараа үнэлгээ нь хамгийн ихээр өссөн тоглогчдын жагсаалтад Беллингэм эх орон нэгт Эллиот Андерсоны /+35 сая евро/ дараа 2 дугаарт бичигдэж байгаа юм. Түүний зах зээлийн үнэлгээ 160 сая еврод хүрчээ.
Эх сурвалж: МОНЦАМЭ Агентлаг Б.Адъяахүү
