.png){kind=logo}
Тавдугаар сарын 1-ний байдлаар Сангийн яам 100 хувь, УУХҮЯ 98,83 хувь, БОАЖЯ 98,59 хувиар мэдээллийн ил тод байдлын үнэлгээгээр тэргүүллээ. Төрийн захиргааны байгууллагуудаас Татварын ерөнхий газар 100 хувь авсан бол Шүүх шинжилгээний ерөнхий газар 85.18 хувь, Архивын ерөнхий газар 84.72 хувийн үнэлгээ авч, төрийн захиргааны байгууллагуудаа хошуучилсан байна.
Нутгийн захиргааны байгууллагуудаас Орхон аймгийн ЗДТГ 94.38 хувь, Булганы ЗДТГ 73.01 хувь, Хэнтийн ЗДТГ 69.89 хувийн үнэлгээ авсан нь бусдаас өндөр үзүүлэлт болжээ. Харин Архангай аймгийн ЗДТГ цахим хуудас нь огт ажиллахгүй, хууль зөрчсөөр байна.
Дүүргүүдийн ил тод байдал яам, агентлагтай харьцуулахад доогуур байгаа бөгөөд Багануур 76.05 хувь, Баянгол дүүрэг 74.64 хувь, Хан-Уул дүүрэг 67.60 хувиар тэргүүлсэн байна. Багахангай 43.66 хувь, Сүхбаатар дүүрэг 43.05 хувиар тус тус хамгийн бага үнэлгээгээр сүүл мушгилаа.
ЦХХХЯ-аас төрийн байгууллагуудын хуулиар ил тод байлгах үүрэгтэй 68 төрлийн мэдээллийг 98 шалгуур үзүүлэлтээр үнэлж, 7 хоног тутамд Шилэн индекс зарлаж байна.
Төрийн байгууллагууд мэдээллээ ил тод болгох хурд өсч, яамдын дундаж үнэлгээ өнгөрсөн 7 хоногт 88 хувь байсан бол 5 дугаар сарын 1-ний байдлаар 90 хувь болсон байна. Агентлагуудынх 56.05 хувиас 60.43 хувь, аймгийн ЗДТГ-уудын дундаж нь 48.87 хувиас 52.53 хувь болж тус тус өсчээ.
“Таны төр-Та хяна!” уриатай “Шил” ажиллагаа эхэлсэн 2023.03.27-ноос хойших хугацаанд shilen.gov.mn-д 32 мянга 417 мөр өгөгдөл байршаад байгаа юм. Ил тод мэдээллийн багтаамж нэмэгдэхийн хэрээр иргэд мэдэх эрхээ эдэлж, Авлигын эсрэг 5Ш ажиллагаанд жинтэй нөлөөлнө.
