.png){kind=logo}
Монгол Улсын Стандарт, хэмжил зүйн газар Булангийн орнуудын хамтын ажиллагааны зөвлөлийн дэргэдэх Итгэмжлэлийн төвөөр Халал гэрчилгээ олгох магадлан итгэмжлэлээ хийлгэж, гэрчилгээгээ гардан авлаа.
Стандарт, хэмжил зүйн газар нь Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөн, Монгол Улсын Засгийн газрын экспортыг дэмжих бодлогын хүрээнд Монгол Улсаас Кувейт Улс цаашлаад Булангийн орнууд руу мах, махан бүтээгдэхүүн экспортлох хууль, эрх зүйн орчныг бүрдүүлэх, экспортын гарцыг нэмэгдүүлэх зорилтыг тавьж ажиллаж байна.
Дэрх зорилтуудыг хангахад Монгол Улсын Шадар сайд С.Амарсайхан, Гадаад харилцааны яам, Кувейт Улс дахь Монгол Улсын элчин сайдын яам болон Элчин сайд П.Сэргэлэн нар бодлого, удирдлага зохион байгуулалтын дэмжлэг үзүүлж ажилласан болно.
Исламын шашинт орнууд руу махны экспорт хийхэд тавигддаг хамгийн чухал шаардлага бол “Халал” гэрчилгээ байдаг. Стандарт, хэмжил зүйн газраас “Халал” гэрчилгээг олгох итгэмжлэлийн үнэлгээ хийлгүүлэхээр Булангийн орнуудын хамтын ажиллагааны зөвлөлийн дэргэдэх итгэмжлэлийн төвтэй жил орчмын хугацаанд хамтран ажиллав. Үүний үр дүнд тус итгэмжлэлийн төвөөс Стандарт, хэмжил зүйн газарт “Халал” гэрчилгээ олгох хүрээнд итгэмжлэл олгож буйгаа 12 дугаар сарын 20-ны өдөр албан ёсоор мэдэгдэж, гэрчилгээг гардууллаа. Тус гэрчилгээ нь 2023-2027 оны хугацаанд хүчинтэй бөгөөд цаашид дахин сунгагдах боломжтой.
Ингэснээр Монгол Улсын Стандарт, хэмжил зүйн газраар баталгаажсан, халал стандартыг хангасан Монгол мах, махан бүтээгдэхүүнийг Булангийн орон болон Араб, Исламын орнууд руу экспортлох үүд хаалга манай хувийн аж ахуйн нэгж, компаниудад нээлттэй болж байна.
