2024 оны 5 дугаар сарын 7-9-ний өдрүүдэд БНХАУ-ын Хонконг-д Азийн оршуулгын холбооны гишүүн орнууд чууллаа.

/Asian Funeral and Cemetery Expo & Conference/ Олон улсын оршуулгын үйлчилгээний салбарыг хамарсан тус хурал нь 2 жилд 1 удаа зохион байгуулагддаг бөгөөд Дэлхий нийтийг хамарсан Ковид-19 цар тахлаас хамааран 5 жилийн дараа ийнхүү зохион байгуулжээ.

Манай улсын хувьд 2008 онд Буяны зан үйлийн холбоо ТББ байгуулагдсан цагаас эхлэн АНУ-д төвтэй Олон улсын оршуулгын холбоо (ICCFA), Австрали төвтэй Ази-Австралийн оршуулгын холбоо (ACCA), Үндэсний оршуулгын захирлуудын холбоо (NFDA), Европын улсуудыг хамарсан оршуулгын холбоо (FIAT-IFTA)-нд гишүүнээр элсэж, хамтран ажилладаг байна.

Чуулганаар оршуулгын салбарын өнөөгийн байдал, тулгамдаж буй асуудлыг хэлэлцэж, цаашдын чиг хандлага, инновац, бүтээгдэхүүн үйлчилгээ, технологийн дэвшлийг танилцуулах, олон улсын болон бүс нутгийн түвшинд хамтын ажиллагааг өргөжүүлж, харилцан туршлага солилцлоо.

Энэ удаагийн чуулганы үндсэн илтгэгчээр Монгол Улсыг сонгож, Буяны Зан үйлийн холбооны тэргүүн, түүхийн ухааны доктор (Ph.D) Г.Идэрмаа Монголчуудын оршуулга уламжлалаас орчин үед сэвээр илтгэл тавьж, тус холбооны гишүүн байгууллагуудын төлөөллүүд биечлэн оролцсон байна.

/Asian Funeral and Cemetery Expo & Conference/ чуулганы чухал нэгэн үйл явдал бол Фокус орныг сонгох юм.

Өнгөрсөн 5 жилийн хугацаанд өөрийн орны оршуулгын үйлчилгээний салбарт онцлох томоохон ажил хийж хэрэгжүүлсэн, үйл ажиллагаандаа тодорхой ахиц дэвшил гаргасан улс орныг Фокус орноор сонгодог бөгөөд энэ удаа Монгол Улсыг сонгож байгаа нь онцгой чухал үйл явдал байлаа.

Ийнхүү 2024 оны 05-р сарын 10-13-ны өдрүүдэд Олон улсын оршуулгын холбооны гишүүн АНУ, БНХАУ, Сингапур, Индонез, Хонг Конг зэрэг 5 орны 20 гаруй зочид төлөөлөгч Монгол Улсад айлчилж, нүүдэлчин ард түмний соёлын онцлог, эцэг өвгөдөө нутаглуулж ирсэн өв уламжлал, оршуулгын салбарын хөгжил дэвшлийг үзэж сонирхон, “Буяны зан үйлийн холбоо” болон Улаанбаатар Буян компанийн шарил чандарлах үйлчилгээ, Нью Семетри ХХК-ийн Дурсгалын цэцэрлэгт хүрээлэн, Самбалхүндэвийн оршуулгын газарт бүтээн байгуулж буй Хүндэтгэлийн цэцэрлэгт хүрээлэн төслийн үйл ажиллагаатай тус тус танилцлаа.

CHRISTINE SYLVIA USA Үндэсний оршуулгын захирлуудын холбооны ерөнхийлөгч

Монгол Улсад ирсэндээ баяртай байна. Бидний энэ удаагийн аяллын зорилго бол Монголчуудын уламжлалт оршуулгын соёлтой танилцаж харилцан туршлага солилцох явдал байлаа. Бид 2 өдрийн турш Монголчуудын далд оршуулах зан үйл болон чандарлан оршуулах үйл ажиллагаатай танилцсан. Үндэсний уламжлалаа техник технологитой хослуулан үйл ажиллагаа явуулж байгаа нь онцлог байлаа. Америкт ийм соёл байдаггүй. Бид нар ч гэсэн Монголчуудаас суралцах зүйл их байна.

Монголчууд өвгөд дээдэстэйгээ хүндэтгэлтэй хандаж ирснийг энэ аяллын туршид харж бахархлаа. Үхэл, үхлийн дараах амьдралын талаарх Монголчуудын ойлголт гүн гүнзгий сэтгэгдэл төрүүллээ. Эндээс ойлгож авсан бүхнээ хамтран ажилладаг хамтрагч нартаа танилцуулах болно.

WILLIAM CHARLES Америк улсын Wappner оршуулгын газрын захирал

Миний хувьд өмнөх аялалд оролцож амжаагүй. Энэ удаагийн аялалд оролцох болсон шалтгаан Хүндэтгэлийн цэцэрлэгт хүрээлэн байгуулах төсөл анхаарлыг маш ихээр татсан. Би үүн дээр фокусласан. Ямар газар очих бол гэсэн хүлээлт байсан. Анх харахад уулан дээрх хуучин оршуулга бололтой дүр зураг харагдсан ч бидний очсон газар миний төсөөлж байснаас ч илүү үзэсгэлэнтэй байсан.

Суварга, тохижилт хийгдсэн цэцэрлэгт хүрээлэн, шинэхэн ургаж байгаа мод бут, хамгийн хойд хэсэгт сүм хийд бололтой байгууламж харагдсан. Бид Хүндэтгэлийн цэцэрлэгт хүрээлэн хэрхэн хийгдсэн талаар баримтат киног үзэж төслийн талаар ойлголт мэдээлэлтэй болсон. Миний хувьд wow үнэхээр яаж? Яаж ийм богино хугацаанд ийм олон хүний шарилыг нүүлгэчих вэ? гэсэн бодол өөрийн эрхгүй төрсөн.

ANG ZIQIAN Сингапур улсын Fluing Home компанийн захирал

Монгол Улс олон зуун жилийн түүх соёлтой улс гэж би боддог. Оршуулгын зан үйлд ч соёл уламжлалаа шингээсэн нь маш их сэтгэгдэл төрүүллээ. Олон улсын түвшинд хуучин оршуулгын газрыг чөлөөлөх, дахин төлөвлөх тухай тэр тусмаа Азийн орнуудад ихээхэн яригдаж байсан. Гэсэн ч бодитой хэрэгжүүлсэн улс орон одоогоор байхгүй гэж хэлж болно. Харин Монгол Улсын хувьд Нийслэл хотдоо оршдог оршуулгын газрыг Төрийн байгууллага, шашны сүм хийд, иргэдтэйгээ хамтраад хэрэгжүүлсэн нь бараг анхны тохиолдол байх гэж бодож байна.

Энэ төсөл амжилттай хэрэгжихэд нөлөөлсөн зүйл бол маш сайн уялдаа холбоотой ажиллагаа гэж бодож байна. Төслийг хэрэгжүүлж байгаа Нью Семетри компани, энэ төсөл дээр ажилласан бүх хүмүүст баяр хүргэе.

Эх сурвалж: IKON.MN