Хятадын армид томоохон цэвэрлэгээ хийжээ

БЭЭЖИН, 2025 оны аравдугаар сарын 27 /Kazinform/. Хятадын Коммунист нам тус улсын зэвсэгт хүчинд хамгийн өргөн хэмжээний цэвэрлэгээ явуулжээ. Зэвсэгт хүчин болон намаас хөөгдсөн албан тушаалтнууд бараг бүгдээрээ “гурван одтой” генерал, намын Төв хорооны гишүүд байсан тухай “BBC” суваг мэдээлснийг “Kazinform” агентлаг уламжилсан байна.

Хятадын зэвсэгт хүчний хамгийн нөлөө бүхий хүмүүсийн нэг болох Хэ Вэйдүн албан тушаалаасаа огцорчээ. Тэрбээр Цэргийн төв зөвлөлийн орлогч даргаар ажиллаж байсан бөгөөд армид Ши Жиньпиний дараа орох хоёрдугаар хүн гэж тооцогддог байв. Хэ Вэйдун хамгийн сүүлд гуравдугаар сард олны өмнө гарсан бөгөөд удаан хугацаагаар байхгүй байсан нь цэргийн дээд удирдлагын цэвэрлэгээний хүрээнд шалгагдаж байж болзошгүй гэсэн таамаглалыг төрүүлжээ. Тэрбээр мөн Коммунист намын шийдвэр гаргах дээд байгууллага болох Улс төрийн товчооны бүрэлдэхүүнд багтаж байв.

Цэргийн төв зөвлөлийн нэгдүгээр орлогч даргын албан тушаалд Жан Юйсяг, хоёрдугаар орлогч даргаар Жан Шэнминийг томилжээ. Өдгөө 67 настай Жан Шэнминь армид 47 жил ажиллаж байгаа аж. Тэрбээр пуужинт цэргийн генерал бөгөөд өмнө нь Цэргийн төв зөвлөлийн Авлигатай тэмцэх газрын орлогч нарийн бичгийн даргаар ажиллаж байжээ.

Цэргийн төв зөвлөлийн нэгдүгээр орлогч даргаас гадна Цэргийн төв зөвлөлийн улс төрийн ажил хариуцсан газрын дарга Мяо Хуа, Цэргийн төв зөвлөлийн улс төрийн ажил хариуцсан газрын орлогч дарга Хэ Хунжюнь, Цэргийн төв зөвлөлийн Нэгдсэн командлалын штабын нэгдүгээр орлогч дарга Ван Шюбинь, Зүүн бүсийн цэргийн командлалын командлагч Линь Шянъян, Хуурай замын цэргийн хүчний улс төрийн комиссар Цинь Шутун, Тэнгисийн цэргийн хүчний улс төрийн комиссар Юань Хуажи, Пуужинт цэргийн ангийн командлагч Ван Хоубинь, Ардын зэвсэгт цагдаагийн хүчний командлагч Ван Чуньнин нарыг албан тушаалаас нь чөлөөлсөн байна.

Батлан хамгаалах яамны мэдэгдэлд дурдсанаар, есөн хүн “намын сахилга батын дүрмийг ноцтой зөрчиж, их хэмжээний мөнгөтэй холбоотой, маш ноцтой шинж чанартай, хортой уршиг дагуулсан албан тушаалын гэмт хэрэгт сэжиглэгдэж байгаа ажээ”. Тэд одоо цэргийн шүүхээр орох бол тэднийг шийтгэх нь “авлигатай тэмцэх кампанит ажлын ололт мөн” гэж уг мэдэгдэлд онцолсон байна.

Цэргийн төв зөвлөл цэвэрлэгээ хийхээр бэлтгэж байгаа дохиог хэдэн сарын турш өгч байсан бөгөөд арми доторх “хортой нөлөөг арилгах”, цэргийн боловсон хүчний хувьд “хатуу дүрэм журам” тогтоохыг уриалсан шинэ зааварчилгааг долоодугаар сард нийтэлжээ.

Намын Төв хорооны хуралтай давхацсан энэхүү цэвэрлэгээг улс төрийн зорилготой байж магадгүй гэж шинжээчид үзэж байна. Тус хурлаар Хятадын нийгэм, эдийн засгийн хөгжлийн төлөвлөгөөг хэлэлцэж, шинэ гишүүдийг сонгосон юм.

Эх сурвалж: МОНЦАМЭ Агентлаг Д.Жаргал