2024 оны ажлаа дүгнэж, цаашид хэрэгжүүлэх стратеги төлөвлөгөөг хэлэлцэв

Долоо хоног бүрийн Мягмар гарагт ЦХИХХ-ны сайдын шуурхай хурал болдог. Өнөөдрийн хурлаар 2024 оны төлөвлөгөөний биелэлтээ дүгнэж, 2025 онд хэрэгжүүлэх стратеги төлөвлөгөөг хэлэлцлээ.

Хурлын эхэнд Засгийн газрын 100 хоногийн хүрээнд төлөвлөсөн ажлуудын гүйцэтгэл сайн хэрэгжиж байгааг онцлов.

Тодруулбал,

Дрон сургалт хөгжүүлэлтийн бүс байгуулах ажлыг эхлүүлж, Дархан-Уул аймаг болон Налайх, Баянзүрх дүүргийн нутаг дэвсгэрт дроны туршилтын бүс байгуулахаар боллоо.
Төрийн байгууллагын 4693 цахим хуудсыг www.gov.mn-д нэгтгэлээ.
Мэдээллийн технологийн компаниудад эдийн засгийн дэмжлэг үзүүлэх зорилгоор виртуал бүс байгуулах ажлыг эхлүүллээ.
Олон улсын төлбөр тооцооны систем болох Applepay-д Монгол Улс нэгдлээ. Ингэснээр төгрөгөөр төлбөр тооцоо хийх, цахим худалдааны арга хэлбэрийг нэмэгдүүлэв.
E-mongolia хэрэглэгчдийн тоо 1.9 саяд хүрч, төрин цахим үйлчилгээ 1255 болж, иргэдийн 1.1 их наяд төгрөгийг хэмнэлээ.
Үндэсний хиймэл дагуул төслийн ТЭЗҮ-ийг шинэчлэн боловсруулж, газрын станц байгуулах ажлыг эхлүүлэв.

Цахим хөгжил, инновац, харилцаа холбооны сайд Ц.Баатархүү

Мөн нэмэлтээр Монгол Улсын нийт газар нутгийн харилцаа холбооны сүлжээний нэгдсэн хянах самбар (Dashboard) хийх ажлыг үүрэг болгосон. Энэ хүрээнд одоогийн байдлаар холболт хийгдсэн шилэн кабель, түүний нийт урт, үүрэн холбооны сүлжээний бааз станцуудын байршлын зураглал, хүчин чадлыг засаг захиргааны нэгж (аймаг, сум) бүрээр шууд хянах тогтолцоог бүрдүүллээ.

Түүнчлэн салбарын хуулиудын давхардлыг арилгах судалгааг хийж дуусгав. Судалгаанаас гарсан үр дүнд тулгуурлан салбарын хуулиудыг цэгцлэх, нэмэлт өөрчлөлт оруулах эсвэл шинэчлэн найруулах ажлыг зохион байгуулахыг үүрэг болгов.

Төрийн цахим үйлчилгээний тоонд бус чанарт анхаарч ажиллах концепцийг 2025 оны 1-р сард танилцуулж, төрийн зарим үйлчилгээг хувийн хэвшил, мэргэжлийн холбоодод шилжүүлэх ажлыг зохион байгуулах чиглэл өглөө.

2025 онд гадаад хамтын ажиллагаанд онцгойлон анхаарч, төрийн эзэмшиж буй эх кодыг экспортлоход нь чухал ач холбогдол өгч ажиллана. Энэ хүрээнд Киргиз, Узбекистан зэрэг улсуудтай хамтарч ажиллахаас гадна код экспортлох бусад боломжийг эрэлхийлж, гадаад хамтын ажиллагааг өргөжүүлэхийг зорьж байна.