Уур амьсгалын өөрчлөлтөд дасан зохицох стратеги төлөвлөгөө боловсруулна

Монголын улаан загалмай нийгэмлэгийн үндсэн стратеги зорилтын нэг болох уур амьсгалын өөрчлөлтөд дасан зохицох, гамшгийн эрсдэлийг бууруулах, хариу арга хэмжээ авах, нөхөн сэргээх үйл ажиллагаанд чиглэсэн стратеги, хөтөлбөрийг хэрэгжүүлэх, олон нийтийн мэдлэг ойлголтыг нэмэгдүүлэх нь гамшгийн эрсдэлийн удирдлагын бодлогыг үндэсний хэмжээнд үр дүнтэй хэрэгжүүлэх ач холбогдолтой юм.

Монгол оронд эрчимтэй явагдаж буй уур амьсгалын өөрчлөлтөд дасан зохицох, түүнээс үүдэлтэй аюулт үзэгдэл, гамшгийн эрсдэлийг бууруулахад чиглэсэн стратеги, хөтөлбөрийг хэрэгжүүлэх, олон нийтийн мэдлэг, ойлголтыг нэмэгдүүлэхэд олон улсын болон орон нутагт тохирсон арга туршлагыг нэвтрүүлэх шаардлагатай байна.

Тиймээс Монголын улаан загалмай нийгэмлэгээс Олон Улсын улаан загалмай, Улаан хавирган сар нийгэмлэгүүдийн холбоотой хамтран монгол орны уур амьсгалын өөрчлөлтөд дасан зохицох үйл ажиллагааны хүрээнд Үндэсний нийгэмлэгийн стратегийг боловсруулахаар “Уур амьсгалын өөрчлөлтөд дасан зохицох стратеги боловсруулах семинар”-ыг зохион байгуулж байна.

Семинарийн нээлтэд Ерөнхий нарийн бичгийн дарга Н.Болормаа оролцож үг хэллээ.

Семинарт Баянхонгор, Говь-Алтай, Говьсүмбэр, Дорноговь, Дундговь, Завхан, Өмнөговь, Сүхбаатар, Сэлэнгэ, Төв, Увс, Хөвсгөл, Хэнтий аймгийн Онцгой байдлын газрын Эрсдэлийн удирдлага хариуцсан мэргэжилтнүүд болон Улаан загалмайн Дунд болон Анхан шатны хороодын төлөөлөл оролцож байна.

Сургалт семинар тавдугаар сарын 23-ны өдрийг хүртэл үргэлжилнэ гэж Монголын улаан загалмай нийгэмлэгээс мэдээллээ.