Дэлхийн дулаарал улам хурдассаныг анхааруулжээ

ЛОНДОН, 2026 оны аравдугаар сарын 21 /Reuters/. Чулуужсан түлшний хэрэглээнээс үүдэлтэй хүлэмжийн хийн ялгарлын улмаас дэлхийн дулаарал хурдасч, манай гаргийн амин чухал экосистемүүдийн ихэнх нь эргэлт буцалтгүй өөрчлөлтөд орох эрсдэлтэй болж байгааг Потсдамын Уур амьсгалын нөлөөллийн судалгааны хүрээлэнгийн захирал Иохан Рокстрём анхааруулжээ.

Тэрбээр “Reuters Sustainability Europe” бага хуралд тавьсан илтгэлдээ шүрэн хад болон Амазоны ширэнгэн ойд учирч буй хохирол эргэлт буцалтгүй болоход ойртсоныг онцолсон байна. Түүнчлэн Атлантын далайн усны эргэлтийн тогтолцооны зарим хэсэг ноцтой өөрчлөлтөд орох эрсдэлтэй байгааг дурджээ. Уг тогтолцоонд халуун бүсийн усыг хойд зүг рүү зөөвөрлөж, Баруун Европын уур амьсгалыг зөөлрүүлэхэд нөлөөлдөг далайн урсгалууд багтдаг байна.

Сүүлийн үеийн судалгаануудаас үзэхэд, дэлхийн гадаргын дундаж хэм ойрын жилүүдэд аж үйлдвэржилтийн өмнөх үеийн түвшнээс Цельсийн 1.5 хэмээр нэмэгдэх төлөвтэй байна. Энэ нь цаг агаарын аюултай үзэгдлүүдийн давтамж, эрчмийг нэмэгдүүлэх эрсдэлтэй. И.Рокстрём энэ талаар арваннэгдүгээр сарын 9-нд эхлэх НҮБ-ын Уур амьсгалын өөрчлөлтийн асуудлаарх COP31 бага хурлын өмнө анхааруулсан байна.

Уур амьсгалын өөрчлөлтөөс үүдэх эрсдэлд бэлтгэж, үйл ажиллагааныхаа тогтвортой байдлыг хангахыг зорьж буй компаниуд уур амьсгал болон байгаль орчны асуудлыг тус тусад нь бус, харилцан уялдаатай цогц асуудал гэж үзэх шаардлагатай гэдгийг тэрбээр онцолжээ. Үүний тулд нүүрстөрөгчийн ялгарлыг бууруулах явдлыг эн тэргүүнд тавихын зэрэгцээ биологийн олон янз байдал, цэнгэг усны нөөцийг хамгаалах, нөхөн сэргээх төслүүдэд хөрөнгө оруулах хэрэгтэй гэж үзэж байна.

Мөн дотоод шаталтат хөдөлгүүртэй автомашины хэрэглээг үе шаттайгаар зогсоох зохицуулалтыг сулруулахыг шаардаж, хууль тогтоох байгууллагад нөлөөлөхийг оролдож байгаа нь ихээхэн түгшүүр төрүүлж байгааг И.Рокстрём хэлжээ. Тэрбээр бензин, дизель түлшинд олгож буй татаас нь цахилгаан автомашины эрэлтийг бууруулж байгааг дурдсан байна.