.png){kind=logo}
“Хариуцлагатай үйлчилгээг дэмжье” аяны хүрээнд Жижиг, дунд үйлдвэрийн газар Улаанбаатар хотын захирагчийн ажлын алба, МҮХАҮТ, төрийн бус байгууллагуудтай хамтран ахуйн үйлчилгээний салбарын орчин үеийн хөгжлийн чиг хандлагыг олон нийтэд сурталчлах, ахуйн үйлчилгээ эрхлэгчдийн мэргэжил, мэргэшлийн ур чадвар, бүтээлч хандлагыг дээшлүүлэх зорилгоор ахуйн үйлчилгээ эрхлэгчдийн зөвлөгөөнийг өчигдөр /2023.10.30/ зохион байгууллаа.
Арга хэмжээнд Жижиг, дунд үйлдвэрийн газрын дарга Я.Эрдэнэсайхан, Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа, МҮХАҮТ-ын удирдлага болоод мэргэжлийн холбоодын төлөөлөл оролцлоо.
Зөвлөгөөнийг нээж Жижиг, дунд үйлдвэрийн газрын дарга Я.Эрдэнэсайхан үг хэлэв. Тэрбээр “Монгол Улсад 2022 оны байдлаар ахуйн үйлчилгээний чиглэлээр үйл ажиллагаа явуулдаг 9600 гаруй аж ахуйн нэгж, иргэн бүртгэгдсэн.
Эдгээр үйлчилгээ эрхлэгчдийн 28.4 хувь нь үсчин, гоо сайхан, 17.4 хувь нь хувцас захиалга, засвар, 6.3 хувь нь нийтийн халуун ус, 5.8 хувь нь гэр ахуйн модон эдлэл захиалга, засвар, 5.1 хувь нь гутал захиалга, засвар, 3.5 хувь нь гэрэл зураг авах, угаах, 1.3 хувь нь хими цэвэрлэгээ, 2.5 хувь нь алт, мөнгө, үнэт эдлэлийн захиалга, засвар, 2.3 хувь нь ахуйн электрон, цахилгаан хэрэгсэл засвар 9.9 хувь нь бусад чиглэлээр тус тус үйл ажиллагаа явуулж байна" хэмээн онцоллоо.
Я.Эрдэнэсайхан: "Салбарт хамаарах үйлчилгээний байгууллагууд хувьчлагдаж, салбарын үйл ажиллагаанд оролцох төрийн оролцоо багассан хэдий ч төрөөс ахуйн үйлчилгээ эрхлэгчдийн хууль эрх зүй, хөдөлмөр, нийгмийн хамгааллын баталгааг бүрдүүлэх, тэдний үйл ажиллагаа явуулах бизнесийн таатай орчин бүрдүүлэх, ажлын байрыг шинээр бий болгох замаар ядуурлыг бууруулах, ач холбогдлыг үнэлэх, хамтын түншлэлийг өргөжүүлэх, иргэдийн албан бус хөдөлмөрөөс зохистой албан хөдөлмөрт шилжих санал санаачилгыг дэмжин ажиллах хүрээнд Засгийн газрын 2019 оны 418 дугаар тогтоолоор “Ахуйн үйлчилгээний салбарыг хөгжүүлэх үндэсний хөтөлбөр”-ийг батлан хэрэгжүүлж ажиллаж байна.
Ахуйн үйлчилгээний салбар нь хүн амын өсөн нэмэгдэж байгаа болон өөрчлөгдөж буй эрэлт хэрэгцээнд тулгуурлан үйлчилгээний цар хүрээ, нэр төрлийг нэмэгдүүлэх замаар хэрэглэгч, үйлчлүүлэгчдийн сэтгэлд нийцсэн, стандартын шаардлага хангасан, чанартай үйлчилгээг үзүүлэх зайлшгүй шаардлага үүсээд байна.
Өнөөдрийн зөвлөгөөнөөр та бүхэн салбарт тулгамдаж буй асуудал, шийдлээ ярилцан саналаа солилцож байгаа нь цаг үеэ олсон үйл явдал болж байна. Иймд Жижиг, дунд үйлдвэрийн газраас та бүхний санал санаачилгаар зөвлөгөөнөөс гарах зөвлөмжийг хамтран хэрэгжүүлэхэд түүчээлэн ажиллах болно” гэв.
Зөвлөгөөнөөр ахуйн үйлчилгээний бизнес эрхлэгчдийн тулгамдсан асуудал, жижиг, дунд үйлдвэрлэл, бичил бизнес эрхлэгчдэд хүргэх төрийн үйлчилгээ, баримталж буй бодлогын талаар салбарын мэргэжилтнүүд илтгэл тавьж, хэлэлцүүлэг өрнүүллээ. Мөн мэргэжлийн холбоодын зүгээс өөрсдийн үйл ажиллагаа, онцлог, үйлчилгээ, бараа бүтээгдэхүүнээ танилцуулах үзэсгэлэн худалдаа зохион байгуулав.
Зөвлөгөөний үеэр Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа, Жижиг, дунд үйлдвэрийн газрын дарга Я.Эрдэнэсайхан, МҮХАҮТ-ын удирдлага болон албаны бусад хүмүүс салбарын шилдгүүдэд шагнал гардуулж, амжилт хүслээ.
Эх сурвалж: ЖДҮГ
