.png){kind=logo}
АСТАНА, 2023 оны арванхоёрдугаар сарын 20 /Kazinform/. Казахстаны анхны Ерөнхийлөгч Нурсултан Назарбаевын ач хүү Кайрат Сатыбалдыулын хууль бусаар олж авсан нийт 55.4 тэрбум гаруй тенге буюу 120 сая долларын хөрөнгийг хурааж, улсын төсөвт оруулсан тухай тус улсын Авлигатай тэмцэх газрын хэвлэлийн алба мэдээллээ. Энэ бол зөвхөн 12 дугаар сард хураан авсан хөрөнгөний мөнгөн дүн юм.
Кайрат Сатыбалдыулы болон бусад этгээдэд холбогдох хэргүүдйг мөрдөн шалгах явцад тус улсаас хууль бусаар гаргасан хөрөнгө, тэр дундаа гэмт хэргийн замаар олж авсан мөнгө ба эд хөрөнгийг буцаан татах арга хэмжээ авч байгааг дээрх мэдээлэлд онцолжээ.
Өнгөрсөн хоёр жилийн хугацаанд Казахстаны Авлигатай тэмцэх газар нийтдээ 912 тэрбум гаруй тенгегийн (1.9 тэрбум гаруй ам.доллар) үл хөдлөх хөрөнгө, бэлэн мөнгийг улсын төсөвт оруулж, төрийн бус байгууллагуудад буцаан олгосон байна.
Мөрдөн шалгах ажиллагаа эхэлснээс хойш Сатыбалдыулын хэрэгт холбогдох 1 тэрбум гаруй доллароор үнэлэгдэх хөрөнгийг тавдугаар сард хураан авчээ.
2022 оны есдүгээр сард Казахстаны шүүх Сатыбалдыулыд мөнгө завшсан хэргээр зургаан жилийн хорих ял оноожээ. Түүнийг албан тушаалаа урвуулан ашигласан, “Казахтелеком” компанийн хөрөнгийг шамшигдуулсан хэрэгт сэжиглэн 2022 оны гуравдугаар сард баривчилсан байна.
Сатыбалдыулы 1970 онд төрсөн бөгөөд олон жилийн турш Үндэсний аюулгүй байдлын хороо, эрх баригч “Нур Отан” намд (одоо “Аманат” нам) албан тушаал хашиж, бизнес эрхэлж байжээ.
Эх сурвалж: МОНЦАМЭ агентлаг Д.Жаргал
