Куала Лумпур, 2025 оны хоёрдугаар сарын 17 /МОНЦАМЭ/. Мэргэжлийн мэдээллийн агентлагууд орчин үеийн шинэ техник технологи, хиймэл оюун зэргийг өдөр тутмын үйл ажиллагаандаа ашиглахад илүү анхаарч байна.

Малайз улсын Куала Лумпур хотноо болж буй Ази-Номхон далайн орнуудын мэдээллийн байгууллагуудын холбоо (ОАНА)-гийн Удирдах зөвлөлийн 54 дүгээр хуралдааны төлөөлөгчид өнөөдөр дижитал болон үзэгч төвтэй хандлага, итгэл үнэмшлийг бий болгох, худал, ташаа мэдээлэлтэй тэмцэх тухай илтгэлийг хэлэлцүүлэн, өөрсдийн орны ололт амжилт, туршлагаа хуваалцлаа.

"Мэргэжлийн мэдээллийн агентлагууд үзэгч, уншигчдаа найдвартай мэдээллээр шуурхай хангахын тулд хиймэл оюуныг ашиглаж болно. Харин аль нэг байгууллага, хувь хүн үүнийг буруугаар ашиглан худал мэдээлэл тараах үед аюул заналхийлдэг"-ийг ОАНА-гийн Ерөнхий нарийн бичгийн дарга Р.Заман хуралдааныг нээж хэлсэн үгэндээ онцоллоо. Тэрбээр, “Мэдээллийн агентлагууд шинэ технологи нэвтрүүлэн, үзэгч, уншигчийнхаа шаардлагад нийцүүлж чадвал урьдын адил хэрэгцээтэй хэвээр байх болно. Хиймэл оюуныг бүх мэдээнд ашиглах боломжгүй ч спортын оноо, хөрөнгийн зах зээлийн үр дүн гэх мэтэд хэрэглэхэд маш тохиромжтой. Гэхдээ хүний сонирхол татахуйц нийтлэл бичиж, үзэгчидтэй харилцахын тулд болгоомжтой байх хэрэгтэй"-г тодотгов.

Үүний дараа, Малайзын БЕРНАМА агентлагийн гүйцэтгэх захирал Датин Падука Нур-ул Афида Камалудин (Datin Nur-ul Afida Kamaludin) хэлэхдээ, “Энэ уулзалт нь гишүүн агентлагуудын дунд хамтын ажиллагаа, мэдлэг хуваалцах, бат бөх холбоо тогтоох индэр болно гэж найдаж байна. Технологийн хурдацтай дэвшил, үзэгчдийн шилжилт хөдөлгөөн, зан үйлээс хамаараад, ташаа мэдээлэл өргөн тархах аюул нь биднээс шинийг санаачлан, хамтран ажиллахыг шаардаж байна. Худал мэдээлэлтэй тэмцэхэд БЕРНАМА бие даасан санаачилга бий болгосныг хуваалцах дуртай. MyCheck Malaysia-г 2020 оны гуравдугаар сард ашиглалтад оруулсан. Энэ нь мэдээллийг тодруулж баталгаажуулснаар бидний амьдралд ташаа мэдээлэл сөргөөр нөлөөлөхтэй тэмцэх зорилготой”-г тэмдэглэсэн юм.

Үндэсний мэдээллийн МОНЦАМЭ агентлагийн Гадаад харилцаа, хамтын ажиллагааны албаны дарга Б.Хулан илтгэлдээ, “Худал мэдээлэлтэй тэмцэх нь нийгэмд итгэлцэл, тогтвортой байдал, шийдвэр гаргахад чухал үүрэгтэй. Технологи, хиймэл оюунаар хуурамч контентыг илрүүлж, сошиал медиа платформууд илүү хатуу зохицуулалтыг хэрэгжүүлж болно. Блокчейн технологиор контентын жинхэнэ эсэхийг ч шалгах боломжтой. Үүний тулд хүний ​​ухамсар, сэтгэлгээг дээшлүүлж, хэвлэл мэдээллийн байгууллагыг чадавжхуулах нь чухал. Хүмүүсийг мэдээлэлд дүн шинжилгээ хийн, эх сурвалжаа баталгаажуулах чадварт сургаснаар ухаалаг хэрэглэгч бий болгоно. Ерөнхий боловсролын болон их дээд сургууль, мэдээллийн байгууллагууд иргэдийн мэдлэгийг дээшлүүлэхэд чухал үүрэг гүйцэтгэнэ. Ташаа мэдээлэлтэй тэмцэх нь хамтын хариуцлага учир Засгийн газар, хэвлэл мэдээлэл, технологийн байгууллага, иргэд заавал оролцох ёстой. Бүгдээрээ сонор сэрэмжтэй байж, үнэнийг сенсациас илүүд үздэг, шүүмжлэлтэй сэтгэгч байх үүрэг хүлээцгээе” гэв.

Вьтнамын мэдээллийн агентлагийн Техникийн албаны дарга Нгүен Дук Вү (Nguyen Duc Vu) хиймэл оюуны давуу, сул тал маш их учраас эрсдэлийг зохицуулахын тулд тус агентлаг Хиймэл оюуны алба байгуулсан. Хиймэл оюуныг контент бэлдэх, мэдээллийн аюулгүй байдлаа хангаж, датагаа хамгаалах, сайтынхаа мэдээллийг олон нийтэд хүргэхдээ ашигладгаа танилцууллаа.

Харин хиймэл оюуны тусламжтай, Хуавэй брэндийн гар утсан дээр аппликейшнүүд бий болгосон талаар “AIGC Архитект”-ын төлөөлөгч, компьютерийн шинжлэх ухааны доктор Клэймонд Лим Вэй Сиан (Claymond Lim Wei Xiang) дурдаад, “Тухайлбал, хиймэл оюунаар мэдээгээ ангилж, Японы Никкейтэй гэрээтэй ажиллахаас гадна зорилтот бүлэгт зориулсан, шаардлагатай мэдээллийг нь өгөх программ ашигладаг”-аа хэлсэн юм.

"Мэдээллийн агентлагууд Тогтвортой өсөлтийн төлөө хиймэл оюун, технологитой ирээдүйг батлах нь" сэдвээр энэ сарын 19-нийг хүртэл үргэлжлэх ОАНА-гийн Удирдах зөвлөлийн 54 дүгээр хуралдаанд Иран, Япон, ОХУ, Катар, БНХАУ, БНСУ, БНСВУ, Азeрбайжан, Индонез, Турк зэрэг 13 улсын 30 гаруй төлөөлөгч оролцож байна.

Ташрамд сонирхуулахад, Японы Киодо ньюс, Вьетнамын VNA агентлагийн 80, Катарын мэдээллийн агентлагийн 50 жилийн ой энэ онд тохиож байгаа аж.

Эх сурвалж: МОНЦАМЭ Агентлаг Б.Оюундэлгэр