МОНЦАМЭ агентлаг мэдээ мэдээллээ солонгос хэлээр түгээнэ

Улаанбаатар, 2025 оны арваннэгдүгээр сарын 28 /МОНЦАМЭ/. Үндэсний мэдээллийн МОНЦАМЭ агентлаг солонгос хэлээр мэдээ мэдээллээ түгээхээр Солонгос хэлний редакц байгуулж, вэбсайтдаа шинэ цэс нэмнэ.

Энэ үйл ажиллагааг эхлүүлэх харилцан ойлголцлын санамж бичигт МОНЦАМЭ агентлагийн дарга Х.Энх-Орших, Монгол Улс дахь БНСУ-ын Элчин сайд Чой Жин Вон өнөөдөр гарын үсэг зурлаа.

МОНЦАМЭ агентлагийн дарга Х.Энх-Орших энэ үеэр хэлэхдээ, “104 жилийн түүхтэй үндэсний мэдээллийн агентлагт Солонгос хэлний редакц байгуулах эрх зүйн суурь баримт бичигт гарын үсэг зурж, баталгаажууллаа. Энэ санаачилгыг сүүлийн жилүүдэд идэвхтэй ярьж, хоёр улсын хооронд дипломат харилцаа тогтоосны 35 жилийн ойн хүрээнд хэрэгжүүлж буйгаараа онцлог. Хоёр орны хоорондын Стратегийн түншлэлийн харилцааг бэхжүүлэхэд хэвлэл мэдээлэл, иргэдийн мэдээлэл солилцоо чухал үүрэгтэй. Монгол Улс 1990 онд зах зээлийн эдийн засгийн тогтолцоонд шилжин орж, гадаад харилцаагаа нээлттэй болгосноос хойш хамгийн түрүүнд БНСУ-тай дипломат харилцаа тогтоосныг эргэн дурсахад таатай байна. Бидний хамтарсан төсөл хоёр орны хооронд өргөжин тэлж буй эдийн засаг, улс төрийн харилцааны “гүүр” болж, иргэд хооронд ойлголцлыг бэхжүүлэхэд үр дүн авчирна гэдэгт итгэлтэй байна” хэмээв.

Агентлагаас бэлтгэдэг баталгаатай мэдээ, мэдээллийг солонгос хэлээр орчуулан нийтлэх нь хоёр улсын харилцаа, хамтын ажиллагаа, харилцан ойлголцлыг бэхжүүлэх ач холбогдолтойг Элчин сайд Чой Жин Вон онцоллоо. Тэрбээр, “Хоёр улсын иргэдийн харилцаа, эдийн засгийн хамтын ажиллагаа эрчимжиж буй тул Монголын талаарх үнэн зөв мэдээллийг солонгос хэлээр авах хэрэгцээ нэмэгдэж байгаа. Иймд бид солонгос хэлээр вэбсайт, сонин гаргахыг зохих хэмжээнд санхүүжүүлж, МОНЦАМЭ агентлаг 2027 оноос төсөв, чадавхад тулгуурлан бие даан үргэлжлүүлэх юм. Хоёр тал нийтлэх мэдээ, мэдээллийн үнэн зөв, баталгаатай байдлыг хангахын тулд хамтран ажиллана” гэсэн юм.

Монгол Улсыг дэлхийд сурталчлах, дэлхий дахины мэдээллийг монголчуудад хүргэх хамгийн шуурхай, баталгаатай эх сурвалж болох МОНЦАМЭ агентлаг босоо монгол бичиг, орос, хятад, япон, англи хэлээр 7 хоног тутмын “Хүмүүн бичиг”, “Новости Монголии”, “Мэнгу сяосибао”, “Монгору Цушин”, “The Mongol Messenger сонин, улирал тутам “Mongolia Today” сэтгүүлийг англи хэлээр эрхлэн гаргаж, мэдээллийн www.montsame.mn цахим хуудсыг ажиллуулж байна. Манай агентлагийн сурвалжлагчид нийслэлээс гадна 21 аймагт ажиллаж, улс орноо гадаадад таниулан, үнэн бодит мэдээллээр хангах үүргээ биелүүлдэг. Мөн Ази, Номхон далайн бүс нутгийн орнуудын мэдээллийн агентлагуудын нэгдсэн байгууллага (ОАNА)-ын гишүүний хувьд тус байгууллагын гишүүн агентлагуудтай тогтмол мэдээлэл солилцож, Монгол Улсад болж буй үйл явдал, мэдээ мэдээллийг ОАNА-н мэдээллийн нэгдсэн сан /www.oananews.org/-д өдөр тутам нийлүүлж байна.

Мөн ОХУ-ын ТАСС, РТ, БНХАУ-ын Синьхуа, Их Британийн Ройтерс, БНСУ-ын ЁНАП, БНСВУ-ын ВМА, БНКУ-ын Пренса Латина, Японы Киодо Цушин, БНПУ-ын ПАП, БНБУ-ын БТА, БНТУ-ын Анадолу, Украин Улсын Укринформ, Америкийн дуу хоолой, Азербайжан улсын Азертак, Казахстан улсын Казинформ, Иран улсын Мер, Италийн АНЗА, Бельгийн Дипломат ворлд, Узбекистаны УзА, БНАСАУ-ын Цахилгаан мэдээний төв агентлаг зэрэг мэдээллийн агентлагтай хамтын ажиллагааны гэрээ байгуулан, өдөр тутам мэдээ, мэдээлэл солилцож, жил бүр сэтгүүлч, техникийн ажилтнуудаа харилцан айлчлуулж туршлага хуваалцдаг.

Эх сурвалж: МОНЦАМЭ Агентлаг Б.Оюундэлгэр