.png){kind=logo}
Байгаль орчин, уур амьсгалын өөрчлөлтийн сайд С.Одонтуяа Төв Азид тулгарч буй байгаль орчны гурвалсан хямралын талаар Сайд нарын дээд хэмжээний хэлэлцүүлэгт оролцлоо.
Бүгд Найрамдах Узбекистан Улсын Самарканд хотноо болсон энэхүү хэлэлцүүлэгт Узбекистан, Казахстан, Киргизстан, Тажикистан, Түркменистан, Монгол Улсын байгаль орчны асуудал хариуцсан сайд нар оролцож, уур амьсгалын өөрчлөлт, биологийн олон янз байдлын алдагдал, орчны бохирдол зэрэг хүн төрөлхтний өмнө тулгарч буй тулгамдсан асуудлуудыг хэлэлцлээ.
Төв Азийн бүс нутагт уур амьсгалын өөрчлөлтийн нөлөөлөл нийтлэг ажиглагдаж байна. Мөнх цас, мөсөн голын хайлалт эрчимжиж, усны нөөц багасах нь хүнсний аюулгүй байдалд эрсдэл дагуулж, гол мөрний татрал, газрын доройтол, экосистемийн хомсдолыг улам бүр гүнзгийрүүлж байна. Аралын тэнгисийн ширгэж, хуурай цөл болон хувирсан явдал нь энэ бүс нутагт тулгарч буй байгаль орчны сорилтуудын тод жишээ юм. Ийм нөхцөлд оролцогч орнууд туршлага солилцох, бүсийн түвшинд судалгаа, төсөл, хөтөлбөрийг хэрэгжүүлж, Бүгд Найрамдах Узбекистан Улсын Ногоон Их Сургуульд боловсон хүчнийг бэлтгэх чиглэлээр хамтран ажиллах талаар санал солилцлоо.
Хэлэлцүүлгийн үеэр улс орнууд уур амьсгалын өөрчлөлт, байгаль орчны бодлогын хүрээнд авч хэрэгжүүлж буй арга хэмжээ, сайн туршлагуудаа хуваалцсан юм. Тухайлбал, Төв Азийн зарим улс жимс жимсгэний аж ахуйг амжилттай хөгжүүлж, хуурай бүсэд тэсвэртэй мод, бут тариалах, хотын ногоон бүсийг өргөжүүлэх, боловсон хүчнийг бэлтгэх чиглэлээр бодит үр дүнд хүрсэн туршлагуудаа танилцууллаа. Монгол Улсын хувьд "Тэрбум мод" үндэсний хөдөлгөөний хэрэгжилтэд хувийн хэвшлийг хэрхэн татан оролцуулж буй туршлага, байгаль орчны байнгын санхүүжилтийн тогтолцоог бүрдүүлэх зорилгоор байгуулсан Байгаль хамгаалах илтгэлцлийн сан, мөн хөв цөөрөм байгуулах, ховордсон ан амьтдыг хамгаалах чиглэлээр хэрэгжүүлж буй бодит ажлуудаа хуваалцлаа.
