.png){kind=logo}
БРЮССЕЛЬ, 2025 оны арваннэгдүгээр сарын 30 /Kazinform/. Энэ оны хувьд ханиад томууны улирал хэдэн долоо хоногийн өмнө эхэлж, шинэ төрлийн вирус илэрсэн явдалд эмч нар санаа зовниж байна гэж Kazinform агентлаг телевизийн Euronews сувгийн мэдээллийг эш татан уламжиллаа.
Ялангуяа К хүрээний шинэ төрлийн H3N2 (хонконг ханиад) вирус эмч нарын хувьд “толгойн өвчин” болж байна.
Өвчлөлийн байдалд хийсэн эхний судалгааны дүнг үзвэл, уг вирус нь бусад төрлийн ханиад томуутай харьцуулахад илүү хурдан халдварладаг ажээ. Ийм учраас өвчилсөн хүмүүсийн тоо 20 хувиар илүү байх магадлалтай гэж эмч нар таамаглаж байна.
Германы Роберт Кохын хүрээлэнгийн ажилтнууд 11 дүгээр сарын дундуур H3N2 вирусээр халдварласан хэд хэдэн тохиолдлыг бүртгэн авчээ. Гэхдээ тохиолдлын тоо огцом өсөж байгаа нь ажиглагдаагүй байна. Гэсэн хэдий ч нөхцөл байдлыг дутуу үнэлж болохгүй гэдгийг Хамбург хотын жишээ харууллаа. Тус хотод ханиадны 129 тохиолдол бүртгэгдсэнээс 3 хүн нас барсан бол улсын хэмжээнд 11 хүн нас баржээ.
Их Британийн Эрүүл мэндийн албаны дарга Жим Маки хэлэхдээ “энэ өвөл бол манай ажилтнуудын хувьд хамгийн хүнд хэцүү үеүдийн нэг байх болно гэдэг нь ямар ч эргэлзээгүй” гэлээ. Мөн Австралид хүнд төрлийн ханиад томуу дэгдсэн бөгөөд лабораторийн шинжилгээгээр 400 мянган тохиолдол бүртгэгдсэн байна.
Ковидтой төстэй шинж тэмдгүүд
Шинэ төрлийн H3N2 вирус нь гэнэт өндөр халуурах, түгших шинж тэмдгүүдээр илэрч байна. Мөн бие янгинаж өвдөхөөс гадна удаан хугацаагаар хүчтэй ханиалгана. Эдгээр нь ковидын шинж тэмдгүүдтэй төстэй тул цаг алдалгүй шинжилгээ өгөх нь зүйтэй гэдгийг эмч нар зөвлөж байна.
Аливаа ханиадны нэгэн адилаар шинэ төрлийн вирусний халдвар нь ахимаг насны болон архаг хууч өвчтэй хүмүүсийн хувьд өндөр эрсдэлтэй. Ялангуяа улирлын шинжтэй ханиад ба H5N1 шувууны ханиадны вирусний давхар халдвар авах эрсдэлээс болгоомжлох хэрэгтэй.
Вакцинжуулалт биднийг хамгаална
Их Британид хийсэн судалгаагаар, тухайн өвчинд яг тохирохгүй ч гэсэн ханиадны вакцин нь хүнд хэлбэрийн ханиадны явцыг намдааж, шинэ төрлийн H3N2 вирус төдийгүй H1N1 ба В хэлбэрийн ханиаднаас хамгаалж байна. Иймээс Европын өвчлөлийг хянах төвөөс эрсдэлтэй бүлгийн хүмүүст хандан, аль болох ойрын үед вакцинжуулалтад хамрагдахыг уриалжээ.
Эх сурвалж: МОНЦАМЭ Агентлаг Б.Адъяахүү
