Apple компани удахгүй шинэ бүтээгдэхүүнүүдээ танилцуулна

ЛОС-АНЖЕЛЕС, 2026 оны аравдугаар сарын 20 /CNBC/. Америкийн технологийн “Apple” компани аравдугаар сарын 28-нд шинэ бүтээгдэхүүнүүдээ танилцуулах “Apple Experience in Los Angeles” арга хэмжээг зохион байгуулахаар төлөвлөсөн бөгөөд хэвлэл мэдээллийн байгууллагууд, шинжээчдэд урилга илгээжээ.

Урилга дээр “Pro and tell” гэсэн үгсийг бичсэн нь мэргэжлийн хэрэглээнд зориулсан “Pro” ангиллын төхөөрөмжүүд болон өндөр хүчин чадалтай шинэ чипүүдийг голлон танилцуулж магадгүйг илтгэж байна.

“Melius Research” компанийн шинжээч Бен Рейтцес даваа гарагт ярихдаа, энэ намар “Apple” компани шинэ “Mac” компьютерууд, тэр дундаа мэдрэгчтэй дэлгэц бүхий зөөврийн компьютер танилцуулж магадгүй гэж таамаглажээ. Түүний үзэж буйгаар, энэ нь өнгөрсөн сард Тим Күүкийн халааг авсан гүйцэтгэх захирал Жон Тернусын удирдлага дор жилд хоёр удаа бүтээгдэхүүн танилцуулдаг уламжлалт байдлаас мэдэгдэхүйц өөрчлөгдөж байгааг харуулж байна.

Энэ нь Ж.Тернус гүйцэтгэх захирлаар томилогдсоноос хойших гурав дахь удаагийн бүтээгдэхүүн танилцуулах үйл ажиллагаа болох юм. Өмнө нь тус компани төв байрандаа шинэ “iPhone” утаснууд, тэдгээрийн дотор эвхэгддэг “Duo” загварыг танилцуулсан бол Нью-Йорк хотод ухаалаг гэрийн удирдлагын төхөөрөмжүүд болон дэлгэц бүхий шинэ “HomeView” чанга яригчийг танилцуулсан билээ.

“Apple” наймдугаар сард “Mac mini”, “Mac Studio” суурин компьютерууддаа шинэ чип суурилуулж, “MacBook Pro” загвараа шинэчлэхийн зэрэгцээ харьцангуй хямд үнэтэй “MacBook Neo” зөөврийн компьютерыг танилцуулсан байна. Харин “iMac” суурин компьютер 2024 оны аравдугаар сараас хойш шинэчлэгдээгүй байгаа ажээ. Өнгөрсөн улиралд “Mac” компьютерын борлуулалт тус компанийн нийт орлогын 10 орчим хувийг бүрдүүлсэн бөгөөд “Apple”-ийн орлого “iPhone” утасны борлуулалтаас ихээхэн хамааралтай хэвээр байна.

Гэсэн хэдий ч их хэмжээний санах ойг өндөр хурдтай ашиглах боломж олгодог чипүүдийн ачаар “Mac” компьютерууд нь “Apple”-ийн хиймэл оюун ухааны технологийг хөгжүүлэхэд чухал үүрэг гүйцэтгэх болжээ. Он гарснаас хойш тус компанийн хувьцааны ханш 26 хувиар өсөж, S&P 500 индексийн өсөлтөөс давсан байна.

Өнгөрсөн долоо хоногт “Apple” болон “Meta” компаниуд хамтран “Meta”-гийн хөгжүүлсэн, параметрүүд нь нээлттэй том хэмжээний хиймэл оюун ухааны загварыг хэд хэдэн өндөр хүчин чадалтай “Mac Studio” компьютерт ажиллуулжээ. “Apple” компани өмнө нь мэдрэгчтэй дэлгэц бүхий зөөврийн компьютер үйлдвэрлэхээс татгалзаж ирсэн бөгөөд тус компанийн программ хангамжийн асуудал хариуцсан удирдах ажилтан Крейг Федериги 2018 онд ярихдаа, ийм төхөөрөмжийг ашиглах нь гар, биеийн байрлалын хувьд тохиромжгүй, хэрэглэгчийг хурдан ядраана гэж тайлбарлаж байв.

Эх сурвалж: МОНЦАМЭ Агентлаг Л.Буянаа