ПАРИС, 2026 оны аравдугаар сарын 19 /Kazinform/. Францын хэд хэдэн хотод үймээн самуун дэгдсэнтэй холбогдуулан тус улсын Ерөнхийлөгч Эммануэл Макрон ням гаргийн орой ард түмэндээ хандан телевизээр үг хэлжээ.

Тэрбээр аравдугаар сарын 17-нд болсон үйл явдалтай холбогдуулан үг хэлжээ. Тухайн өдөр Францын хэд хэдэн хотод өрнөсөн олон нийтийн эсэргүүцлийн жагсаал зарим газарт эмх замбараагүй байдал болон хувирч, дэлгүүрүүдийг тонон дээрэмдэж, эд хөрөнгийг сүйтгэж, цагдаа нартай мөргөлдсөн байна.

Э.Макрон үүссэн нөхцөл байдлыг "туйлын хүнд үе" хэмээн тодорхойлжээ. Түүний хэлснээр, бямба гарагт хэт зүүний үзэлтэй бүлэглэлүүдийн гишүүд олон тооны хууль зөрчигчтэй нэгдэн хотуудад хэрээс хэтрсэн хүчирхийлэл үйлдсэн байна.

"Дэлгүүрүүдийг дээрэмдэж, олон нийтийн зориулалттай барилга байгууламж, хотын захиргааны байрууд руу (Лимож, Лион, Марсель) халдсан. Олон зуун цагдаа, жандарм гэмтэж бэртлээ. Францчууд эх орондоо яаж ингэж хандаж чадаж байна вэ? Үүнийг зөвтгөх, тайлбарлах, уучлах ямар ч үндэслэл байхгүй. Өнөө орой бид бүгд уур хилэн, ичгүүрийг мэдэрч байна" гэж Францын Ерөнхийлөгч мэдэгджээ.

Тэрбээр "хууль ёсны шаардлага" тавьж, тайван жагсагчдыг, эвдлэн сүйтгэж, тонуул хийсэн хүмүүстэй хольж хутгаж болохгүйг онцолсон байна.

"Эвдлэн сүйтгэгчид, хүчирхийлэлд уриалж буй бүх хүнд бид хатуу хандах болно. Иргэдийн үгийг сонсож, яриа хэлэлцээ хийх нь сул дорой эсвэл хууль зөрчигчдөд хариуцлага тооцохгүй гэсэн үг биш" гэж Э.Макрон хэлээд "бусдад сургамж болохуйцаар" хатуу хариуцлага тооцохыг шаарджээ.

"Эд хөрөнгө сүйтгэсэн хүмүүс хариуцлага хүлээх ёстой. Дээрэм тонуул үйлдсэн этгээдүүд учруулсан хохирлоо барагдуулах ёстой" гэж тэрбээр мэдэгдсэн байна.

Э.Макрон хууль сахиулах байгууллагын ажилтнууд, хотын дарга нар, хохирол амссан худалдаа эрхлэгчид, гар урчуудад дэмжлэг үзүүлэхээ илэрхийлж, тэднийг "хүндрэл бэрхшээлтэй нь" үлдээхгүй гэдгээ амласан байна.

Даваа гаргаас эхлэн Францын Ерөнхий сайд Себастьен Лекорню хохирогчдод шуурхай тусламж үзүүлэх үүрэг бүхий хямралын үеийн ажлын хэсгийг ахлан ажиллах ажээ.

Э.Макрон мөн болсон үйл явдлаас "сургамж авч", тагнуулын мэдээлэл цуглуулах, эмх замбараагүй байдлаас урьдчилан сэргийлэх ажиллагааг сайжруулахыг Засгийн газар, тэр дундаа Дотоод хэргийн сайд Лоран Нуньест үүрэг болгожээ. Энэ чиглэлээр авч хэрэгжүүлэх арга хэмжээ ил тод байх болно гэдгийг тэрбээр амласан байна.

Мужуудын засаг захиргааны төлөөлөгчид хотын дарга нартай хамтран хот суурин, олон нийтийн барилга байгууламж, дэлгүүрүүдийн аюулгүй байдлыг хангах шийдвэр гаргах бөгөөд шаардлагатай тохиолдолд зарим цуглааныг хориглох хүртэл арга хэмжээ авах ажээ.

Ойрын өдрүүдэд тус улсын Ерөнхий сайд улс төрийн намууд, үйлдвэрчний эвлэлүүд болон суралцагчдын төлөөлөлтэй уулзаж, хүчирхийллийг буруушаах, үүссэн нөхцөл байдлыг шийдвэрлэх арга замыг хэлэлцэхээр төлөвлөжээ.

Ерөнхийлөгчийн сонгууль болоход зургаан сар үлдээд буй энэ үед Э.Макрон иргэдийг дэг журам сахиж, тайван байхыг уриалсан байна. "Манай улс ерөнхийлөгчийн сонгуулийг зохистой, шударга явуулах ёстой. Улс төрийн мэтгэлцээн гудамжинд хүчирхийллийн аргаар бус, намуудын хооронд өрнөх учиртай" гэж тэрбээр хэлээд эмх замбараагүй байдалд уриалж буй хүмүүс Бүгд Найрамдах Улсын үндэс суурийг ганхуулж, улс төрийн хэлэлцүүлгийг бусниулахыг зорьж байна хэмээн онцолсон байна.

Францын Дотоод хэргийн яамны мэдээлснээр, аравдугаар сарын 17-нд улс даяар болсон эсэргүүцлийн жагсаалд 550 мянга орчим хүн оролцож, баривчлагдсан хүний тоо хоёр мянга давжээ. Бямба гаргийн орой Э.Макрон нийгмийн сүлжээгээр дамжуулан хүчирхийллийг буруушааж, гэм буруутай этгээдүүдийг хуулийн дагуу шалгаж, шийтгэнэ гэж мэдэгдсэн байна.

Э.Макрон Елисейн ордонд Ерөнхий сайд болон холбогдох салбарын сайд нартай зөвлөлдсөний дараа ард түмэндээ хандан үг хэлжээ.

Эх сурвалж: МОНЦАМЭ Агентлаг Д.Жаргал