Женсен Хуан албан тушаалаасаа огцорчээ

ВАШИНГТОН, 2026 оны арваннэгдүгээр сарын 13 /DW/. "Nvidia" компанийг үүсгэн байгуулж, олон жил удирдсан Женсен Хуан хувийн амьдралтай нь холбоотой дуулиан шуугианы улмаас албан тушаалаасаа огцорчээ.

Энэ тухай тус компани пүрэв гарагт мэдээлсэн байна. АНУ-ын хиймэл оюуны чип үйлдвэрлэгч хамгийн том компанийн удирдлагын үүргийг Санхүү хариуцсан захирал Колетт Кресс түр орлон гүйцэтгэх ажээ.

"Nvidia" компанийн мэдээлснээр, Ж.Хуан ерөнхийлөгч, гүйцэтгэх захирал, Төлөөлөн удирдах зөвлөлийн гишүүн зэрэг бүх албан тушаалаасаа чөлөөлөгдсөн байна. Түүний оронд томилогдох шинэ удирдагчийг компани дотроос болон гаднаас хайж байгаа аж. Ж.Хуан "Nvidia"-г 1993 онд байгуулсан цагаасаа хойш удирдаж, 30 гаруй жилийн хугацаанд тус компанийг технологийн салбарт дэлхийд тэргүүлэгч компаниудын нэг болгон хөгжүүлсэн юм.

Түүнийг гэр бүлээс гадуурх харилцаатай байсан тухай АНУ-ын хэвлэлүүд мэдээлсний дараа дуулиан дэгдсэн билээ. Өнгөрсөн амралтын өдрүүдэд тэрбээр 40 гаруй жил ханилсан эхнэртээ үнэнч бус байснаа хүлээн зөвшөөрч, гэр бүл болон хамтран ажиллагсдаасаа уучлал хүсжээ.

Сингапурын “Megaspeed” компанийн менежертэй дотно харилцаатай байсан гэх мэдээлэл хэвлэлүүдэд гарсан. Зарим хэвлэлд мэдээлснээр, уг эмэгтэй нь БНХАУ-ын иргэн бөгөөд тус улсын тагнуулын байгууллагатай холбоотой байж болзошгүй гэж АНУ-ын тусгай албаныхан сэжиглэж байгаа аж.

Үүний дараа “The New York Times” сонинд Ж.Хуан өөр эмэгтэйтэй, тодруулбал "Nvidia" компанийн топ менежерүүдийн нэгтэй дотно харилцаатай байсан байж магадгүй тухай мэдээлснээр нөхцөл байдал улам хурцаджээ.

Өдгөө 63 настай Ж.Хуанг дэвшилтэт технологийн салбарын нөлөө бүхий хүмүүсийн нэг юм. Орчин үеийн хиймэл оюуны системүүдийг сургах, ажиллуулахад ашигладаг бичил чипийн гол нийлүүлэгч нь чухам "Nvidia" компани болсон билээ. Сүүлийн жилүүдэд Ж.Хуанг хиймэл оюуны хэрэглээг өргөн хүрээнд нэвтрүүлэхийг тууштай дэмжиж, технологийн салбарын томоохон үйл ажиллагаануудад тогтмол оролцож иржээ.

"Nvidia" компанийн нөлөө хагас дамжуулагчийн зах зээлээс хальж хавьгүй өргөн хүрээг хамардаг. Тус компани ашгийнхаа тодорхой хэсгийг хиймэл оюуны чиглэлээр үйл ажиллагаа явуулдаг гарааны бизнесүүдэд хөрөнгө оруулахад зарцуулдаг төдийгүй АНУ-ын технологийн стратегийг тодорхойлоход чухал үүрэг гүйцэтгэдэг байна.

Сүүлийн жилүүдэд Ж.Хуанг АНУ-ын Ерөнхийлөгч Дональд Трамптай ойр харилцаатай ажиллаж иржээ. "Nvidia" компани мөн Германы Засгийн газартай хиймэл оюуны дэд бүтцийг хөгжүүлэх чиглэлээр хамтран ажиллахаар болсноо саяхан зарласан юм.

Эх сурвалж: МОНЦАМЭ Агентлаг Д.Жаргал