Ж.Хуан гадаадын тагнуулын ажиллагааны бай болсон эсэхийг шалгаж эхэлжээ

ВАШИНГТОН, 2026 оны арваннэгдүгээр сарын 9 /Reuters/. Nvidia компанийн гүйцэтгэх захирал Женсен Хуаныг гадаадын тагнуулын ажиллагааны бай болсон эсэхийг шалгаж эхэлснээ тус компанийн Төлөөлөн удирдах зөвлөл (ТУЗ) ням гарагт мэдэгджээ.

Ж.Хуаныг Бээжинд мэдээлэл дамжуулдаг байсан Хятадын бизнес эрхлэгч эмэгтэйтэй дотно харилцаатай байсан гэх мэдээлэл хэвлэлүүдээр цацагдсантай холбогдуулан уг шалгалтыг эхлүүлсэн байна.

Ж.Хуан ажилтнууддаа илгээсэн зурвастаа эхнэртээ үнэнч бус байснаа хүлээн зөвшөөрч, гаргасан үйлдэлдээ “бүрэн хариуцлага хүлээнэ” гэдгээ дурджээ. Харин Nvidia компанийн зүгээс түүнийг цаашид компаниа үргэлжлүүлэн удирдана гэж мэдэгдсэн байна.

Хиймэл оюуны салбарын өсөлт тогтвортой үргэлжлэх эсэхэд хөрөнгө оруулагчид эргэлзэж эхэлсний улмаас хувьцааных нь ханш хэдийн унаад байгаа Nvidia-гийн хувьд эдгээр үйл явдал дарамт учруулж болзошгүй байна. Түүнчлэн Ж.Хуаныг цаашид хамтран үүсгэн байгуулсан компаниа үргэлжлүүлэн удирдах эсэхэд асуудал үүсгэж магадгүй гэж шинжээчид үзэж байна.

Ж.Хуаныг Сингапурт төвтэй “Megaspeed” компанийн гүйцэтгэх захирлаар ажиллаж байсан, өөртэй нь садангийн холбоогүй Алис Хуан гэдэг эмэгтэйтэй дотно харилцаатай байсан гэж “The New York Times” сонинд өнгөрсөн сард мэдээлсэн байна. АНУ-ын эрх баригчид уг эмэгтэйг шалгаж, Хятадын тагнуулын байгууллагад мэдээлэл дамжуулдаг байсныг нь тогтоосон тус сонинд бичжээ.

АНУ-ын эрх баригчид Nvidia компаниас хиймэл оюуны чип худалдаж авдаг “Megaspeed” компанийн үйл ажиллагааг шалгаж эхэлсэн байна. Тус компанийг Хятад руу экспортлохыг хориглосон дэвшилтэт чипийг Бээжинд нийлүүлэх боломжийг бүрдүүлсэн хэмээн сэжиглэж байгаа аж.

“Үүсгэн байгуулагч бөгөөд гүйцэтгэх захирал Ж.Хуан гадаадын тагнуулын ажиллагааны бай болсон байж болзошгүй гэх хэвлэлүүдийн мэдээлэлтэй холбогдуулан ТУЗ бие даасан шалгалт эхлүүлж байна. Бие даасан захирлуудаас бүрдсэн хороо гаднын хараат бус хуулийн зөвлөхүүдийн тусламжтайгаар шалгалтыг удирдан явуулна” гэж Nvidia компанийн мэдэгдэлд дурдсан байна.

Тус компанийн мэдээлснээр, АНУ-ын үндэсний аюулгүй байдал болон Nvidia компанийн нууц мэдээлэл алдагдсан гэж үзэх үндэслэл одоогоор ТУЗ-д байхгүй байгаа боловч шалгалтын хүрээнд холбогдох бүх мэдээллийг нягтлан үзэх ажээ. Мөн ТУЗ нь гүйцэтгэх захирал болон түүний удирдлагын багт итгэл хүлээлгэж байгааг онцлоод Ж.Хуан шалгалтыг дэмжиж, хамтран ажиллахаа илэрхийлсэн гэдгийг дурджээ.

АНУ-ын Ерөнхийлөгч Дональд Трамп ням гарагт сэтгүүлчдэд мэдээлэл өгөхдөө дээрх асуудлаар Хуантай ярилцаагүй гэдгээ хэлээд, түүнийг сайн хүн хэмээн тодорхойлжээ. “Бүх зүйл сайн байгаа гэж найдаж байна. Тэр үнэхээр гайхалтай ажил хийсэн хүн” гэж Д.Трамп хэлсэн байна. Түүнчлэн тагнуулын байгууллагын мэдээлэлтэй танилцах үедээ уг асуудлаар арга хэмжээ авах ёстой байсан эсэх тухай асуултад “Үгүй, тэгэх шаардлагагүй гэж бодож байна. Түүнийг нэр төртэй хүн гэж боддог. Түүнд үүнийг тайлбарлах шалтгаан байгаа байх. Эхлээд түүний тайлбарыг сонсох хэрэгтэй” гэж хариулжээ.

“The New York Times” сонинд бичсэнээр, Трампт тагнуулын байгууллагын дүгнэлтийг жил орчмын өмнө танилцуулсан боловч тэрбээр ямар нэгэн арга хэмжээ авах шийдвэр гаргаагүй байна.

Ням гаргийн орой АНУ-ын Төрийн нарийн бичгийн дарга Марко Рубио Хуантай холбоотой асуудлаар сэтгүүлчдэд тайлбар өгөхөөс татгалзжээ.

Харин Ж.Хуан хэлэхдээ "“Nvidia-гийн ашиг сонирхлыг хамгаалахын зэрэгцээ АНУ-ын үндэсний аюулгүй байдлыг хангахад хувь нэмрээ оруулахын төлөө тууштай ажиллана” гэж мэдэгдсэн байна.

Эх сурвалж: МОНЦАМЭ Агентлаг Д.Жаргал