.png){kind=logo}
Хөлбөмбөгийн ертөнцөд уйтайхан намар болж байна даа. Хоёр арванд цэнхэр гаригийн ногоон талбайд тодоос тод гялалзаж, хөлбөмбөг сонирхогчид, хөгжөөн дэмжигчдийг хөөр баярт умбуулсан хоёр домог шил шилээ даран шигшээ багаасаа зодог тайллаа.
Ердөө сарын өмнө Аугаа Марадонагийн нутаг Аргентинээс төрсөн бас нэгэн домог Месси шигшээ багаасаа зодог тайлсан бол өчигдөр цуут Эйсебиуг төрүүлсэн Португалын домог Криштиану Роналду шигшээ багаасаа зодог тайлж, "7" дугаараа шинэ үедээ шилжүүлэн өгч буйгаа зарлалаа.
23 жил Португалын шигшээд тоглохдоо CR7 234 удаа улсынхаа төрийн дууллыг эгшиглүүлж, өрсөлдөгчийнхээ хаалганд 146 гоол оруулжээ. Шигшээ багийнхаа төлөө тоглосон тоо, оруулсан гоолоор Криштианугийн өмнө орох хөлбөмбөгчин энэ дэлхийд нэг ч үгүй.
Португалын шигшээтэйгээ хамт Криштиану Роналду Европын аварга болж, "Үндэстний лиг"-т хоёр удаа түрүүлж байв. Мөн Португалын үе үеийн олон шилдгүүдийн хамт 6 удаа ДАШТ-д оролцож, зургаан ДАШТ-д гоол хийсэн анхны бөгөөд одоогоор цорын ганц тоглогч болсон.
Криштиану Роналдуг сүүлийн гурван ДАШТ-д тоглохыг нь " амьдаар нь" харж, ДАШТ-д оруулсан нийт 11 гоолын зургааг нь ( 2018 онд Испаний хаалганд хийсэн хет-трик, Мароккод мөргөж хийсэн гоол, 2026 онд Узбекистаны хаалганд оруулсан дабл ) яг дэргэдээс нь "гэрч" болсноо энэ өдөр улам тод санаж байна би, өнөөдөрхөн юм шиг л нүднээ илхэн байна.
Криштиану Роналду Selecao das Qiunas ( Португалын шигшээгийн хоч нэр) -даа дахин тоглохгүй, усан үзмийн дарсны улаан өнгөтэй шигшээгийн өмсгөлөө л өмсөхгүй болохоос товруутай пүүзээ хананд өлгөх бас болоогүй ээ.
Клубын түвшинд замналаа үргэлжлүүлж, анхны 1000 гоол оруулсан хөлбөмбөгчин болох зорилгоо биелүүлэх нь лав.
Өнгөрсөн долоо хоногт 41 настай Роналду хет-трик хийснээр 985 гоолтой болсон. Мэдээж CR7-ийн хувийн амжилт, рекордыг бичээд байвал барагдахааргүй их.
Хамгийн гол нь мянга мянган хүүхэд, залуучууд, огт хөлбөмбөг сонирхдоггүй сая сая хүмүүсийг хөлбөмбөгт дурлуулж, тэдэнд үлгэр дууриалал, бахархал төрүүлсэн нь Роналдугийн хамгийн том амжилт юм даа.
SIUUU! CRISTIANO RONALDO ADEUS PORTUGAL!
Ц.Энхтүвшин, Таван цагариг сонин
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!