Пол Маккартни дэлхийн гурав дахь чинээлэг хөгжимчин болжээ

НЬЮ-ЙОРК, 2026 оны арваннэгдүгээр сарын 11 /Kazinform/. Их Британийн домогт “The Beatles” хамтлагийн гишүүн асан Пол Маккартни дэлхийн хамгийн чинээлэг хөгжимчдийн эхний гуравт багтжээ.

“Forbes” сэтгүүлийн тооцоолсноор, өдгөө 84 настай П.Маккартнигийн хөрөнгө 1.4 тэрбум ам.долларт хүрч, хөгжмийн салбарын хамгийн чинээлэг эрхмүүдийн жагсаалтын гуравдугаарт бичигдсэн байна.

Тус жагсаалтыг 2.8 тэрбум ам.долларын хөрөнгөтэй рэп дуучин Жей-Зи тэргүүлж байгаа бол поп дуучин Тейлор Свифт хоёр тэрбум ам.долларын хөрөнгөөр хоёрдугаарт эрэмбэлэгджээ.

П.Маккартнигийн хөрөнгийн дийлэнх хувийг дууны зохиогчийн эрх, хөгжмийн каталог, аялан тоглолтын орлого, мөн үл хөдлөх хөрөнгө болон урлагийн бүтээлийн хөрөнгө оруулалтаас олсон орлого бүрдүүлж байгаа ажээ.

Түүний орлогын гол эх үүсвэрүүдийн нэг нь 1969 онд үүсгэн байгуулсан "MPL Communications" хэвлэлийн компани юм. Тус компани П.Маккартнигийн өөрийнх нь болон бусад уран бүтээлчдийн хөгжмийн бүтээлийн зохиогчийн эрхийг хариуцдаг байна.

П.Маккартни алдартай дуунуудын зохиогчийн эрхийг худалдан авах нь ашигтай бизнес болохоос нэлээд өмнө хөгжмийн өвд хөрөнгө оруулж эхэлжээ. Түүний эзэмшлийн хөгжмийн бүтээлийн санд рок-н-роллын анхдагчдын нэг Бадди Холлигийн дуунууд, Бродвейн мюзиклийн бүтээлүүд болон Зул сарын баярын алдартай дуунууд байдаг ажээ.

Түүнчлэн “The Beatles” хамтлагийн холдинг компани болох "Apple Corps"-оос нэмэлт орлого олдог байна. Тус компани стриминг платформууд, винил пянз болон дурсгалын бүтээгдэхүүний борлуулалтаас жилд 50 орчим сая ам.долларын орлого олдог аж. Маккартни өөрөө, мөн Ринго Старр болон Жон Леннон, Жорж Харрисон нарын өв залгамжлагчид тус компанийн орлогын дөрөвний нэгийг тус бүр хүртдэг байна.

Үүнээс гадна “The Beatles” хамтлагийн дуунуудын зохиогчийн эрхийн төлбөрөөс П.Маккартни жил бүр 10 орчим сая ам.долларын орлого олдог аж. Дэлхий даяар хийсэн аялан тоглолтууд нь ч түүний хөрөнгийг нэмэгдүүлэхэд ихээхэн хувь нэмэр оруулжээ. Тухайлбал, 2022-2025 онд үргэлжилсэн “Got Back” аялан тоглолтын хүрээнд нийт 79 удаа тоглолт хийсэн байна.

П.Маккартни Их Британи, АНУ-д үл хөдлөх хөрөнгө эзэмшдэгээс гадна Пабло Пикассо, Рене Магритт зэрэг алдарт зураачдын бүтээлээс бүрдсэн урлагийн цуглуулгатай аж.

Тэрбээр Жон Леннон, Жорж Харрисон, Ринго Старр нарын хамт “The Beatles” хамтлагийг байгуулж, дэлхий дахинд алдаршсан юм. Хамтлагийн анхны “Please Please Me” цомог 1963 онд гарсан нь “Битлзманиа” хэмээх хөгжмийн шинэ үзэгдлийн эхлэлийг тавьсан билээ.

Тус хамтлаг түүхэн дэх хамгийн олон цомог борлуулсан хөгжмийн хамтлаг болсон юм. Тэдний цомог, бичлэгийн дэлхий даяарх борлуулалт 600 сая гаруй хувьд хүрсэн гэж тооцоолдог. Хамтлагийн уран бүтээлчид хамтран ажилласан хугацаандаа “Грэмми”-гийн шагналыг найман удаа, “Brit Awards”-ын дөрвөн шагнал, “Оскар”-ын шагнал болон Айвор Новеллогийн 14 шагналыг хүртжээ.

Хамтлаг 1970 онд тарсны дараа П.Маккартни бие даасан уран бүтээлийн гараагаа эхлүүлж, анхны цомгоо гаргасан байна. Улмаар эхнэр Линда Маккартни, хөгжимчин Денни Лэйн нарын хамт “Wings” хамтлагийг байгуулжээ.

Ташрамд сонирхуулахад, П.Маккартни “The Times” сонины 2024 оны жагсаалтаар Их Британийн анхны тэрбумтан хөгжимчин болж байв. Тухайн үед тэрбээр хөрөнгөөрөө урлагийн салбарын хамтран зүтгэгчид болох Элтон Жон, Мик Жаггер нарыг ардаа орхисон байна.

Эх сурвалж: МОНЦАМЭ Агентлаг Д.Жаргал