.png){kind=logo}
Сүүлийн үед олон нийтийн цахим орчинд цацагдаад байгаа “уранаас үүдэлтэй байгаль орчин, мал амьтанд сөрөг нөлөө үзүүлж байна…” гэх мэдээллийн дагуу Засгийн газрын Хэрэг эрхлэх газрын Тэргүүн дэд даргын 2025 оны 03 дугаар сарын 19-ний өдрийн 75 дугаар тушаалаар байгуулагдсан Ажлын хэсэг Дорноговь аймгийн Сайншанд, Улаанбадрах сумдад ажиллалаа.
Уг холбогдох асуудлыг тодруулах, нягтлан шалгах, дүгнэлт гаргах, олон нийтэд үнэн бодит мэдээллийг хүргэх зорилгоор ЗГХЭГ-ын Бүс, орон нутгийн удирдлага зохицуулалтын газраар ахлуулсан Аж үйлдвэр, эрдэс баялгийн яам, Байгаль орчин, уур амьсгалын өөрчлөлтийн яам, Усны газар, Мал эмнэлгийн ерөнхий газар, Нийгмийн эрүүл мэндийн үндэсний төв, Цагдаагийн ерөнхий газар, Цөмийн энергийн комиссын Ажлын алба, Стандарт хэмжилзүйн газрын Цацрагийн хяналтын лаборатори, “Мон-Атом”ХХК болон орон нутгийн байгууллагуудын төлөөллөөс бүрдсэн ажлын хэсэг 2025 оны 03 дугаар сарын 22-ны өдөр тус сумдын иргэд, малчидтай газар дээр нь уулзаж, холбогдох чиглэл бүрээр хэмжилт, шинжилгээг гүйцэтгэж ажиллалаа.
Ажлын хэсэгт Цөмийн энергийн салбар, чиглэлийг төлөөлж Аж үйлдвэр, эрдэс баялгийн яамны Салбарын хяналтын газрын улсын ахлах байцаагч, Цөмийн энергийн комиссын Ажлын албаны Цөмийн аюулгүй байдлын бодлогын газрын мэргэжилтэн, Стандарт хэмжил зүйн газрын Цацрагийн хяналтын лабораторийн шинжээч нарын бүрэлдэхүүнтэйгээр хүн, малын эрүүл мэнд, хүрээлэн байгаа орчинд цацрагийн сөрөг нөлөө үзүүлж байгаа эсэхийг тодруулах зорилгоор Дорноговь аймгийн Сайншанд, Улаанбадрах сумдын нэр бүхий малчин иргэдийн хаваржаа, хүн, малын ундаалдаг гар худаг, малын хашаа, малын бэлчээр зэрэг нийт 13 цэгт гамма цацрагийн тунгийн чадлын хэмжилт хийж, тус цэгүүдээс байгалийн болон зохиомол цацраг идэвхт изотоп тодорхойлохоор хөрсний 14 дээж, ундны усны 7 дээж, судалгааны зорилгоор усны 7 дээжийг тус тус авч, улсын ахлах байцаагчийн дүгнэлт гарсан.
Улсын ахлах байцаагчийн дүгнэлтээр тус бүс нутгийн хүн малын ундаалдаг гүний худаг, малын хашаа, малын бэлчээрт газар дээр нь хийсэн гамма цацрагийн тунгийн чадлын хэмжилтийн дүн байгалийн цацрагийн дэвсгэр түвшин болох 0.20 мкЗв/ц хэмжээнээс хэтрээгүй буюу 0.03-0.13 мкЗв/ц гэсэн үзүүлэлттэй байсан.
Мөн Стандарт, хэмжил зүйн газрын Хүнсний Аюулгүй байдлын Үндэсний Лавлагаа лабораторийн Цацрагийн хяналтын лабораторид хүргүүлсэн хөрс, усны дээжүүдийн шинжилгээний дүн Цацрагийн аюулгүйн нормд заасан цацрагийн хяналтын түвшинд, MNS:900-2018 стандартад заасан ундны усны цацрагийн аюулгүйн үзүүлэлтээс хэтрээгүй үзүүлэлттэй гарсан байна.
Эх сурвалж: Аж үйлдвэр, эрдэс баялгийн яам
