.png){kind=logo}
Монгол Улсын Ерөнхийлөгчийн ивээл дор зохион байгуулсан 20 дахь удаагийн “Дэлхийн экспортыг дэмжих чуулга уулзалт” Улаанбаатар хотноо “Ногоон худалдааг төрөлжүүлэх нь: Органик, дижитал, тогтвортой” сэдвийн дор 4 өдөр үргэлжилж өндөрлөлөө.
Чуулга уулзалтаар ногоон эдийн засаг, худалдаа, экспортыг дэмжих, жижиг, дунд бизнес эрхлэгчид тэр дундаа эмэгтэйчүүд, залуучуудын бизнес эрхлэх таатай орчныг бүрдүүлэх, цахим шийдлүүдийг санал болгох, сурталчлах, түгээн дэлгэрүүлэх болон бүс нутаг, олон улсын хамтын ажиллагааг өргөжүүлэх, шинэ зах зээл, шинэ боломжийг хэлэлцлээ.
Чуулга уулзалтын эхний өдөр буюу 6 дугаар сарын 26-нд Далайд гарцгүй хөгжиж байгаа орнуудын бизнес эрхлэгчдийн зөвлөлдөх уулзалт, худалдааны дэд бүтэц, бүс нутгийн холболт, худалдааг хүртээмжтэй хөнгөвчлөх зэрэг сэдвээр дугуй ширээний уулзалт болсон бол хоёр дахь өдрийн уулзалтаар залуучуудын бизнес, эрхлэлтийг нэмэгдүүлэх сэдвээр хэлэлцүүлэг өрнүүлж, ногоон бизнес болон төслүүдийг танилцуулав.
Уул уурхайн бус салбарын экспортын чадавхыг бэхжүүлэхэд дэмжлэг, туслалцаа үзүүлэх зорилго бүхий Экспортыг дэмжих төслийн хүрээнд Монгол улсын Засгийн газар, Олон улсын худалдааны төвтэй хамтран Үндэсний экспортын стратеги боловсруулах ажлыг эхлүүлсэн.
“Дэлхийн экспортын чуулга уулзалт”-ын үндсэн хөтөлбөрийн нэг хэсэг хэлбэрээр Эдийн засаг, хөгжлийн яам, Хүнс, хөдөө аж ахуй, хөнгөн үйлдвэрийн яам, Гадаад харилцааны яам, Экспортыг дэмжих төслөөс хамтран зохион байгуулсан “Уул уурхайн бус салбарын Үндэсний Экспортын Стратеги (ҮЭС) боловсруулах асуудлаарх оролцогч талуудын анхдугаар зөвлөлдөх уулзалт”-д Стандарт, хэмжил зүйн газраас төлөөлөл оролцлоо.
Монгол Улсын Засгийн газар нь “Үндэсний экспортын стратеги”-ийг боловсруулах энэхүү ажлын хүрээнд нийгэм, эдийн засгийн хөгжлийг дэмжих, ядуурлыг бууруулахад түлхүү хувь нэмэр оруулж чадах экспортын голлох салбаруудынхаа өрсөлдөх чадварыг дэмжих, төрөлжүүлэх, гадаад зах зээлд нэвтрэх боломжийг нэмэгдүүлэхийг зорьж буй юм.
Стандарт, хэмжил зүйн газар нь энэхүү Үндэсний экспортын стратегид экспортод хамаарах үйл ажиллагааны талаар тусгуулах нь өөрийн тохирлын үнэлгээний байгууллагуудын чадавхыг дээшлүүлэх боломж бүрдэх ач холбогдолтой.
