.png){kind=logo}
МҮЭ-ийн холбооноос төрийн албан хаагчдын цалин хөлсний нэмэгдэл ялгавартай байгаа талаар өнөөдөр /2023.02.28/ өөрийн байрандаа мэдээлэл хийж байр сууриа илэрхийлэн, УИХ, Засгийн газарт хэд хэдэн шаардлагыг хүргүүлэв.
Тус холбооны ерөнхийлөгч С.Эрдэнэбат: “Манай улсын хувьд хөдөлмөр эрхлэгчдийн хөдөлмөрийг маш бага үнэлж байгаа. Мөн хөдөлмөрийн хөлсний хэмжээг нэмэгдүүлэхдээ хүртэл ялгавартай байгаа нь олон нийтийн дургүйцлийг хүргэж байна. Өндөр албан тушаалтнуудын цалин хөлсний хэмжээ 200-300 мянган төгрөгөөр нэмэгддэг бол төрийн алба хаагчдын цалин хөлс 40 мянган төгрөгөөр нэмэгдэж байгаа юм. Ийм шударга бус тогтолцоог халах цаг болсон. Энэ асуудалд төр засгаас анхаарч ажиллахгүй бол төрийн албанаас эхлүүлээд бусад бүх салбарт хүний нөөцийн дутагдалд орох эрсдэлтэй. Манай улсын тухайд дундаж цалингийн хэмжээ 1 190 000 төгрөг, хөдөлмөрийн хөлсний доод хэмжээ 550 мянган төгрөг байгаа" гэв.
МҮЭХ дараах хэд хэдэн шаардлагыг хүргүүлээд байгаа аж.
- Эрдэнэс таван толгой ХК-ийн 1072 хувьцааны 2021, 2022 оны ногдол ашгийг энэ оны 5 дугаар сарын 01-ний өдрийн дотор нөхөж олгох
- Хөдөлмөрийн хөлсний доод хэмжээг 2023 оны нэгдүгээр улиралд багтаан шинэчлэн тогтоох
- Хэрэглээний бараа бүтээгдэхүүний үнийн хөөрөгдлийг хязгаарлаж, үнэ тогтворжуулах хөтөлбөрийг үндэсний хэмжээнд боловсруулан хэрэгжүүлэх
-Гадаад өрийн асуудалд олон улсын хөндлөнгийн шинжээчдээр дүн шинжилгээ хийлгэж, гаргасан дүгнэлт, зөвлөмжийг үндэслэн шуурхай арга хэмжээ авч хэрэгжүүлэх
-Нийгмийн даатгалын сангийн бие даасан хараат бус байдлыг бэхжүүлж, нийгмийн 3 талт түншлэлд суурилсан засаглалыг эрх тэгш, ил тод нээлтэй байх нөхцлийг бүрдүүлэх
Монголын эрүүл мэндийн ажилтны үйлдвэрчний эвлэлийн холбооны дарга Ч.Нарантуяа: "Эрүүл мэндийн салбар хүний нөөцийн хомсдолд орсон, боловсон хүчний бодлогыг анхаарах шаардлагатай.
Монголын эмч нар олон улсын тусламж үйлчилгээг иргэдэд үзүүлднг ч олон улсынхаас 10 дахин бага цалин авч байна. Иймд салбарын ажилтнууд гадаадад гарч ажиллах урсгал нэмэгдсэн. Уг асуудалд Эрүүл мэндийн яам, Засгийн газраас бодитой анхаарах шаардлагатай.
Бид 2021 оноос хойш эрүүл мэндийн салбарын ажилтнуудын суурь цалинг хоёр дахин нэмэх хэрэгтэй талаар шаардлагатай тавьж байгаа ч ахиц дэвшил гарахгүй байна.
Суурь цалингаа нэмээгүй эмнэлэг байна. Эмч гэхэд 965 мянган, сувилагч 800 орчим мянган төгрөгийн цалин авч байгаа тохиолдол бий. Ялангуяа орон нутгийн өрх, дүүргийн нэгдсэн эмнэлэгт цалин нэмэгдээгүй.
Хөдөлмөрийн аюулгүй байдлын асуудал болон иж бүрэн хувцас олгох талаар ярилцана. Салбарын хэмжээнд залуучуудын нийгмийн баталгааг хангахад анхаарах хэрэгтэй байна. Эрүүл мэндийн салбарын ажилчдын үндсэн цалинг нэмэхгүй бол ажил хаялт зарлана" гэв.
