Хэфэй, 2024 оны арванхоёрдугаар сарын 9 /Xinhua/. Хомо сапиенс буюу орчин үеийн оюун ухаант хүний өвгийн хөгжлийн хувьслын үүднээс үзвэл, Зүүн Азиас урьд өмнө нь олдож байсан олдворуудаас хамгийн эртнийхэд тооцогдох, 300 мянган жилийн настай, эртний хүмүүсийн олон арван үлдэгдлийг Хятадын эрдэмтэд илрүүлжээ.

Эдгээр эртний хүмүүсийн үлдэгдэл, түүнчлэн олон тооны амьтны чулуужсан яс, чулуун багаж хэрэгслүүдийг Хятадын зүүн нутгийн Аньхой мужийн Дунжи хошууны нутаг дахь Хуалундун агуйгаас олсон байна.

Эртний хүмүүсийн нутаглаж байсан газартай холбоотой хамгийн сүүлийн үеийн нээлт, судалгаагаа Хятадын судлаачид өнгөрсөн долоо хоногийн баасан гаргаас ням гараг хүртэл Дунжи хошуунд болсон эрдэм шинжилгээний хурлын үеэр танилцуулжээ. Энэхүү хуралд 100 орчим судлаач, эрдэмтэн, тэдний дотор гадаадын 10 гаруй шинжээч оролцсон байна.

1988 оны сүүлчээр нээсэн Хуалундун агуйд хийж буй малтлага 2013 оноос хойш үргэлжилж байгаа бөгөөд энэ хугацаанд гайхалтай олдворуудыг илрүүлжээ. Тухайлбал, харьцангуй бүрэн бүтнээрээ хадгалагдан үлдсэн гавлын яс зэрэг эртний хүмүүсийн араг ясны 20 орчим үлдэгдэл, чулуугаар урласан 400 гаруй эд өлгийн зүйлс, зүссэн ул мөр бүхий олон тооны ясны хэлтэрхий, мөн сээр нуруутан амьтдын 80 гаруй чулуужсан яс олджээ.

Археологичдын баг агуйн 40 хав.дөр.км талбайд энэ оны дөрөвдүгээр сараас 11 дүгээр сарын хооронд шинээр малтлага хийжээ. Энэ үеэр нийт 11 олдвор илрүүлсний дотор маш сайн хадгалагдан үлдсэн тавхайны урд хэсгийн яс, духны хугарсан нэг яс, гуяны дунд чөмөгний нэг хэлтэрхий, гавлын ясны найман хэлтэрхий байсан байна.

"Эдгээр олдвор нь уг газарт 20 гаруй хүнтэй өнөр өтгөн гэр бүл амьдарч байсныг харуулж байна" гэж Хятадын Шинжлэх ухааны академийн Сээр нуруутан амьтдын палеонтологи, палеоантропологийн хүрээлэнгийн судлаач, Хуалундунгийн малтлагын багийн ахлагч У Шюжэ хэллээ.

"Тэд хүнсээ бэлтгэдэг "хоолны өрөө"-тэй байсан. Мөн шөнө зэрлэг амьтдаас нуугддаг газар доорх агуй нь тэдний унтлагын өрөө байсан байж магадгүй. Энэ агуй нурсан тул бид малтаж амжаагүй байна. Цаашид бид илүү олон олдворыг нээж илрүүлнэ гэдэгтээ итгэлтэй байна" хэмээн тэрбээр ярилаа.

Түүний тайлбарласнаар, Хуалундунаас олдсон хүний үлдэгдлүүд нь бие махбодийн хувьд босоо явагч хүн буюу Хомо эректус-ээс орчин үеийн оюун ухаант хүн бий болох шилжилтийн үеийн хүмүүсийнхтэй адил онцлог шинж бүхий эртний хүмүүсийнх бөгөөд МЭӨ үед хамаарах хүмүүсийн чулуужсан үлдэгдэлтэй огт адилгүй ажээ.

2015 онд илрүүлсэн чулуужсан гавлын яс нь Хуалундунаас өнөөдрийг хүртэл илрүүлсэн олдворуудаас хамгийн чухал нь юм. Судлаачид энэ гавлын яс нь 13 эсвэл 14 настай охиных гэсэн дүгнэлтийг хийсэн байна.

У Шюжэ хэлэхдээ "энэ чулуужсан гавлын яс нь эртний болон орчин үеийн хүний шинж чанаруудын өвөрмөц хослолыг харуулж байна" гэлээ. "Хавтгай нүүр, нүдний гүн ухархай, нимгэн гавлын яс, эрүүний яс зэрэг нүүр болон доод эрүүний бүтэц нь орчин үеийн хүний хөгжлийн хувьслын эхэн үеийнхтэй маш төстэй. "Тэр үед бидэнтэй маш төстэй байсан ч эртний зарим шинж чанараа хадгалсаар байсан" гэж хэмээн тэрбээр ярив.

Харин энэ онд олдсон тавхайны урд хэсгийн яс нь Хятадаас олдсон цорын ганц ийм яс бөгөөд эртний хүмүүсийн алхаа, өндрийг судлахад чухал мэдээлэл өгнө гэж У Шюжэ хэлэв.

Үүнээс гадна, гоёмсгоор урласан чулуун зэвсгүүд нь 300 мянган жилийн өмнө амьдарч байсан агуйн хүмүүсийн техникийн түвшин харьцангуй өндөр байсныг илтгэж байна. У Шюжэгийн хэлснээр, тэд маш ухаалаг байсан бөгөөд Хомо сапиенсуудын хөгжлийн түвшинд хүртэл хөгжсөн байжээ.

"Хуалундуны хүмүүс бол хомо сапиенсуудын ихэнх шинж чанарыг агуулсан Зүүн Азийн хамгийн эртний хүмүүс байсан бөгөөд эртний хүнээс орчин үеийн хүний үе рүү шилжих хувьслын гол эргэлтийн цэг дээр байсан. Хуалундунд хийсэн малтлага нь орчин үеийн хүн хэрхэн хөгжсөн тухай баялаг мэдээлэл өгөх болно" гэж дээр дурдсан хүрээлэнгийн өөр нэг судлаач Лю У ярилаа. Тэрбээр энэ газарт 10 гаруй жил малтлага хийжээ.

Эх сурвалж: МОНЦАМЭ Агентлаг Д.Жаргал