.png){kind=logo}
Монгол Улсын Засгийн газраас хэрэгжүүлж буй “Атрын IV” аяны хүрээнд газар тариалан болон эрчимжсэн мал аж ахуйн салбарт шинэ инноваци, дэвшилтэт техник, технологи нэвтрүүлэх зорилготой “Технологийн 7 хоног” арга хэмжээ Дархан хотод үргэлжилж байна.
Энэхүү арга хэмжээнд МАА-н ЭЗЭН төслийн хүрээнд хэрэгжиж буй “Шинэлэг шийдэл” хөтөлбөрийн дэд төслүүд оролцож байгаа бөгөөд өнөөдрийг хүртэлх үр дүнгээ сонирхогч талууд болон олон нийтэд танилцуулж байна. Тэдгээр нь мах, сүүний чиглэлийн үхрийн аж ахуйн амжилтыг хангах үндэс болсон баталгаатай, чанартай тэжээл үйлдвэрлэх, тариалах, хураах, хадгалах технологийг нэвтрүүлэхэд чиглэж байгаа юм.
Түүнчлэн “Мал бордох технологийг нэвтрүүлж махны үйлдвэрлэлийг нэмэгдүүлэх”, “Махны экспортод чиглэсэн нэмүү өртгийн сүлжээг хөгжүүлэх”, “Махны экспорт ба малын эрүүл мэнд”, “Хамгаалалттай аж ахуйн хувилбарууд” зэрэг сэдвээр туршлага солилцох, хамтран ажиллах боломжуудын талаар хэлэлцүүлэг боллоо. Хэлэлцүүлэгт ХХААХҮ-ийн сайд Жадамбын Энхбаяр, МАА-н ЭЗЭН төслийн зохицуулагч Л.Баяртулга, Майнд Теч ХХК, Баян Эрдэс ХХК, Стандарт мах ХХК, Түмэн шувуут ХК-ийн төлөөлөл болон албаны хүмүүс оролцов.
Сайд Ж.Энхбаяр махны үхрийн салбарын хөгжлийг стратегийн чиглэлээр дэмжих шаардлагатайг онцолж, энэ салбар нь хөдөө аж ахуйн олон талт байдлыг хангах, хүнсний хангамжийг сайжруулах, экспортын шинэ боломжийг бүрдүүлэх, орон нутгийн амьжиргааг дээшлүүлэх чухал ач холбогдолтойг тэмдэглэлээ. Үүний тулд хамгийн түрүүнд тэжээлийн үйлдвэрлэлийг бэхжүүлэх нь нэн чухал юм. Өндөр ургацтай, тэжээлийн таримлуудыг нутагшуулах, хадлан, дарш, ногоон тэжээл үйлдвэрлэлийн үндэс суурийг бий болгох хэрэгтэй.
Малын эрүүл мэндийн үйлчилгээ, мал эмнэлгийн салбарыг орчин үеийн шаардлагад нийцүүлэн хөгжүүлэх шаардлагатай байна. Үүнд өвчнөөс урьдчилан сэргийлэх тогтолцоог бэхжүүлэх, вакцинжуулалт, лабораторийн чадавхыг нэмэгдүүлэх, малын гарал үүслийг мөрдөн тогтоох, эрүүл мэндийн баталгаажуулалтын тогтолцоог бүрдүүлэх нь гол чиглэл болж байгаа. Мөн төр-хувийн хэвшлийн түншлэлийг өргөжүүлэн, мал эмнэлгийн үйлчилгээг хүртээмжтэй болгох бодлого хэрэгжүүлэх шаардлагатай. Экспортын зах зээлд өрсөлдөхүйц бүтээгдэхүүн гаргахын тулд боловсруулалт, хүйтэн сүлжээ, баталгаажуулалтын системд анхаарал хандуулах ёстойг нэмж хэллээ.
Салбарын шинэчлэл, үр ашгийг нэмэгдүүлэхэд инновацийн шийдлүүд онцгой үүрэгтэй. Үүлдэр угсаа сайжруулалт, хиймэл үржил, генетикийн дэвшилтэт арга зүйг нэвтрүүлэх, ухаалаг мал аж ахуйн менежмент, дижитал платформуудыг ашиглах, малын тэжээлийн үр ашиг, махны чанар, уур амьсгалд дасан зохицох зэрэг чиглэлээр судалгаа, хөгжүүлэлтийг дэмжих, залуус, шинэ санаачлагчдыг энэ салбарт татан оролцуулах бодлого хэрэгжүүлэх шаардлагатай байгааг онцолсон юм
