.png){kind=logo}
ШИНЭ ДЕЛИ, 2025 оны зургаадугаар сарын 8 /Hindustan Times/. Энэтхэгийн хойд нутгийн Жамму ба Кашмир мужид Чинаб голын дээгүүр тавьсан дэлхийд хамгийн өндөр төмөр замын гүүрээр зорчих хөдөлгөөнийг тус улсын Ерөнхий сайд Нарендра Моди албан ёсоор нээжээ.
“Чинаб голын дээгүүр тавьсан энэхүү гүүр нь Жамму ба Кашмирыг Энэтхэгийн бусад нутагтай төмөр замаар холбож байгаа бөгөөд бүс нутгийн тээврийн дэд бүтэц болон аялал жуулчлалын салбарыг хөгжүүлэхэд томоохон түлхэц болно. Энэ бол Энэтхэгийн ард түмний эв нэгдэл, хүсэл зоригийг илтгэсэн агуу үйл явдал юм” хэмээн Ерөнхий сайд Нарендра Моди нээлтийн ёслолын үеэр мэдэгджээ.
Энэхүү гүүрийн голын голдирлоос дээш өндөр нь 359 метр бөгөөд улирлаас шалтгаалан өөрчлөгддөг усны дундаж түвшнээс тооцвол 322 метрээс доошгүй өндөр ажээ. Эдгээр үзүүлэлт нь уг гүүрийг дэлхий дээрх хамгийн өндөр төмөр замын гүүр болгож буй юм.
Шинээр баригдсан гүүр нь Кашмирын бүс нутагт байнга тохиолддог газар хөдлөлт, мөн секундэд 74 метр хүртэл хүчтэй салхинд тэсвэртэй байна. Нийт 1.3 км урттай уг байгууламжийн гулдан хэсэг нь 467 метрийн урттай бөгөөд түүнийг угсрахдаа дэлхийд хамгийн уртад тооцогддог краныг ашигласан байна.
Уг гүүрийг 2019 онд ашиглалтад оруулахаар төлөвлөж байсан ч коронавирусний цар тахал зэрэг хэд хэдэн шалтгааны улмаас барилгын ажил саатаж, хойшилжээ.
Сүүлийн жилүүдэд Энэтхэгийн засгийн газар энэхүү уулархаг бүс нутагт төмөр зам, авто замуудыг тавьж, тээврийн дэд бүтцийг хөгжүүлэхэд ихээхэн анхаарч байгаа юм.
Энэтхэгийн хяналтад байдаг Кашмирын нутагт тээврийн сүлжээг бий болгосноор эдийн засгийн хөгжилд нь түлхэц өгч, исламын зэвсэгт бүлэглэлүүд идэвхтэй үйл ажиллагаа явуулдаг тус бүс нутагт үүсээд буй хурцадмал байдлыг намжаахад тус болно гэж эрх баригчид найдаж байна.
Эх сурвалж: МОНЦАМЭ Агентлаг Д.Жаргал
