Амьдрахад таатай хотуудын шинэ жагсаалтыг танилцуулжээ

ЛОНДОН, 2025 оны зургаадугаар сарын 17 /CNN/. Австрийн нийслэл Вена хот амьдрахад хамгийн таатай хот байхаа больсныг албан ёсны тайлан харуулжээ. Тус хот нь “Economist Intelligence Unit” байгууллагаас /EIU/ жил бүр гаргадаг жагсаалтыг гурван жил тэргүүлсний эцэст Данийн нийслэл Копенхагенд байр сууриа алдсан байна.

Тодруулбал, мягмар гарагт танилцуулсан амьдрахад хамгийн таатай дэлхийн хотуудын энэ оны жагсаалтын нэгдүгээрт Данийн нийслэл бичигдсэн байна. EIU дэлхийн 173 хотыг эрүүл мэндийн үйлчилгээ, боловсрол, тогтвортой байдал, дэд бүтэц болон хүрээлэн буй орчин зэрэг хэд хэдэн шалгуур үзүүлэлтээр үнэлэн эрэмбэлжээ.

Ингэхэд Копенхаген хот тогтвортой байдал, боловсрол, дэд бүтцийн хувьд “төгс” оноо авснаар уг жагсаалтыг тэргүүлсэн бол Вена хот Швейцарын Цюрихтэй хамт хоёрдугаар байрт шалгарчээ. Харин Австралийн Мельбурн дөрөвдүгээр байраа хадгалсан бол Швейцарын Женев хот жагсаалтын тавдугаарт бичигдлээ.

Түүнчлэн Австралийн Сидней хот долоодугаар байраас зургаадугаар байр луу ахисан бол Японы Осака, Шинэ Зеландын Окленд долоодугаар байрт бичигджээ. Есдүгээр байрт Аделаида орсноор эхний 10-т багтсан Австралийн гурав дахь хот болсон бол Канадын Ванкувер 10 дугаарт жагссан байна.

Тэгвэл Вена яагаад энэ жил тэргүүн байраа хадгалж чадсангүй вэ? Хэдийгээр Австрийн хот ихэнх ангилалд өндөр үнэлгээ авсан боловч тогтвортой байдлын үзүүлэлтээр оноо нь мэдэгдэхүйц буурсан бол Копенхаген бүх шалгуур үзүүлэлтээр өндөр оноо авчээ. Вена хотын тогтвортой байдлын оноо “огцом буурсан” нь сүүлийн үед болсон үйл явдлууд, тэр дундаа өнгөрсөн зун Тейлор Свифтийн тоглолтын үеэр халдлага үйлдэхээр зэхэж байсан этгээдүүдийг баривчилж, уг арга хэмжээг цуцлахад хүрч байсантай холбоотой байна.

Мөн 2024 оныхтой адил Баруун Европ, Ойрх Дорнод, Хойд Африкт тогтвортой байдлын оноо буурчээ. Түүнчлэн Энэтхэгийн хотууд, Тайваньд цэргийн мөргөлдөөн гарах эрсдэл нэмэгдсэнтэй холбоотойгоор Азийн орнуудад ч мөн энэ үзүүлэлт буурсан байна. Ингэснээр зарим хот олон байраар ухарсан бол Саудын Арабын Эль-Хубар хот 13 байраар дээшилж, 148-аас 135-д бичгджээ. Тус улс эдийн засгаа төрөлжүүлж, газрын тосноос хараат байдлаа бууруулах өргөн цар хүрээтэй төлөвлөгөө болох “Vision 2030” хөтөлбөрийн хүрээнд эрүүл мэнд, боловсролын хүртээмжийг сайжруулахад ихээхэн хөрөнгө оруулж байна.

Индонезийн Жакарта хот мөн тогтвортой байдлын үндсэн үзүүлэлтээ сайжруулсны үр дүнд 142-оос 132 хүртэл 10 байраар ахижээ. Харин жагсаалтын сүүлийн байруудад төдийлөн өөрчлөлт гараагүй бөгөөд Ерөнхийлөгч асан Башар аль-Асадын дэглэм нуран унаснаас хойш зургаан сарын хугацаа өнгөрч буй энэ үед Сирийн Дамаск жагсаалтын сүүлийг мушгисан хэвээр байна.

Амьдрахад хамгийн таатай хотуудын 2025 оны жагсаалт:

1. Копенхаген, Дани