“Монгол-Хятадын V экспо” үргэлжилж байна

Улаанбаатар, 2025 оны наймдугаар сарын 26 /МОНЦАМЭ/. “Монгол-Хятадын V экспо” БНХАУ-ын Өвөр Монголын Өөртөө Засах Орон (ӨМӨЗО)-ы Хөх хотноо өчигдөр нээлээ.

Экспод Монгол Улсаас 350 гаруй аж ахуйн нэгж ноос, ноолуур, арьс шир, гоо сайхан, бэлэг дурсгал, арьсан эдлэл, хүнс зэрэг 700 гаруй нэр төрлийн органик бараа бүтээгдэхээр оролцож байна. Монгол Улсын үндэсний үйлдвэрлэгчид экспогийн үеэр бараа бүтээгдэхүүнээ таниулж, онцлог, давуу талаа сурталчилж байгаа юм. Мөн Монгол Улсаас экспортод гаргахад олон улсын шаардллага стандартыг хангах экспортын өрсөлдөх чадвар, уламжлалт үйлдвэрлэлийн өв соёлыг харуулж, үндэсний брэндийг олон улсад гаргах, бүтээгдэхүүний экспортыг нэмэх, харилцан туршлага солилцох, хөрөнгө оруулалтыг дэмжиж байгаа юм.

Хоёр жил тутам зохион байгуулдаг “Монгол-Хятадын экспо” нь хоёр улсын төр, хувийн хэвшлийн төлөөлөгчдөд харилцан туршлага солилцох, шинэ хөрөнгө оруулалт, бизнесийн боломжийг эрэлхийлэх, инноваци, дэвшилтэт технологийг нутагшуулах, соёл, нийгэм, техник технологийн олон талт харилцааг хөгжүүлэх, бараа бүтээгдэхүүний борлуулалтын зах зээлийг тэлэх, хамтарсан үйлдвэр, гэрээ хэлэлцээр байгуулах боломжийг нээж байна.

ХХААХҮЯ-ны ТНБД Т.Жамбалцэрэн экспог нээж хэлэхдээ, “Хоёр улсын хооронд дипломат харилцаа тогтоосны 75, “Иж бүрэн стратегийн түншлэлийн харилцаа” тогтоосны 10 жилийн ой өнгөрсөн онд тохиосон. Монгол, Хятадын найрсаг харилцаанд суурилан, хоёр орны харилцааг итгэлтэй, өргөн хүрээтэй, тогтвортой, харилцан ашигтай хамтын ажиллагаагаар гүнзгийрүүлэхэд “Монгол-Хятадын экспо” үр дүнтэй чухал түншлэл болж ирсэн. Монгол Улс 2024 онд 163 улстай гадаад худалдаа хийхэд БНХАУ манай хамгийн том худалдааны түнш хэвээр байгаа. Хоёр улсын худалдааны эргэлт 18.6 тэрбум ам.долларт хүрсэн нь худалдааны эргэлтийг 20 тэрбум ам.долларт хүргэх Төрийн тэргүүнүүдийн дэвшүүлсэн зорилтод ойртсоныг харуулж байна. 2015 онд анхны экспог хоёр орны худалдаа, аж үйлдвэр, соёлын хамтын ажиллагааг өргөжүүлэх үзэсгэлэн, форумыг зохион байгуулж эхэлсэн. Дараагийн экспо эрчим хүч, цахим эдийн засаг, уур амьсгалын өөрчлөлт, “Бүс ба зам” санаачилгын хүрээнд бүс нутгийн, олон улсын хамтын ажиллагааг хөгжүүлэхэд чиглэж байна. Энэ экспог худалдаа, үзэсгэлэн төдийгүй хөдөө аж ахуйн салбарын хамтарсан шинжлэх ухаан, технологи, инновацийн чуулган, хөрөнгө оруулалтын форумын чиглэлээр, ногоон хөгжил, хөдөө аж ахуйн тогтвортой байдал, хүнсний аюулгүй байдал, уур амьсгалын өөрчлөлтийн эсрэг хамтын ажиллагааг, мөн харилцан ашигтай, тэнцвэртэй хөгжүүлэх нь чухал. Мал аж ахуй, газар тариалан, хүнс, хөнгөн үйлдвэрлэл, дагалдах үйлчилгээний салбарын уялдаа холбоог бэхжүүлж, ханган нийлүүлэлтээс эхлээд үйлдвэрлэл, худалдааны сүлжээг цахим технологиор нэгтгэх зорилгоор “Мал аж ахуй, үйлдвэрлэл, технологийн эко парк” цогцолбор байгуулахаар ажиллаж байна. Хөдөө аж ахуйн салбарт блокчэйн, хиймэл оюун зэрэг технологид тулгуурлан олон улсын хамтын ажиллагааны шинэ платформ бий болгоход экспог өргөжүүлж, чухал түлхэц үзүүлнэ гэж итгэж байна” хэмээсэн юм.

“Монгол-Хятадын V экспо” ӨМӨЗО-ы Хөх хотод наймдугаар сарын 29 хүртэл үргэлжилнэ.

Эх сурвалж: МОНЦАМЭ Агентлаг Б.Оюундэлгэр