Хятад улс газрын ховор металлд тавих хяналтыг чангатгажээ

БЭЭЖИН, 2025 оны наймдугаар сарын 26 /Синьхуа/. Газрын ховор металлуудыг олборлох, хайлуулах, ялган боловсруулах үйл явцад тавьж буй хяналтыг чангатгахад чиглэсэн түр дүрэм журмуудын эмхэтгэлийг Хятад улсын төрийн байгууллагууд гаргалаа.

Уг баримт бичгийг Аж үйлдвэр, мэдээлэлжүүлэлтийн яам, Хөгжил, шинэчлэлийн улсын хороо, Байгалийн нөөц баялгийн яам хамтран боловсруулсан байна.

Журмын дагуу газрын ховор металлуудыг олборлох, хайлуулах, ялган боловсруулах хэмжээнд жил тутам квот тогтоох бөгөөд цаашдаа квотуудыг уурхай, үйлдвэрүүдэд хуваарилах ажээ. Ингэхдээ үндэсний эдийн засгийн хөгжлийн зорилтууд, газрын ховор элементүүдийн нөөц, тус салбарын хөгжил, байгаль орчинд үзүүлэх нөлөөлөл, зах зээлийн эрэлт зэрэг хүчин зүйлүүдийг харгалзан үзэх ажээ.

Үйлдвэр аж ахуйн газрууд батлагдсан квотын хүрээнд олборлох, хайлуулах, ялган боловсруулах үйл ажиллагаа явуулах бөгөөд ингэхдээ хуулиуд, захиргааны дүрэм журмуудыг чанд мөрдөх ёстой. Газрын ховор элементүүдийг олборлогчид, үйлдвэрлэгчид нь бүтээгдэхүүний урсгалын талаарх мэдээллийг үнэн шударгаар гарган өгч, холбогдох мэдээллийн системд оруулах үүрэг хүлээж байна. Квотыг мөрдөх явцад тавих хяналтыг чангатгаж, зөрчлүүдийг хуулийн хүрээнд таслан зогсоохыг орон нутгийн эрх баригчдад даалгажээ.

Газрын ховор металлуудын жагсаалтад 17 элемент ордог бөгөөд тэдгээрийг хавтгай дэлгэцтэй телевизороос эхлээд хос тэжээлтэй автомашин зэрэг өндөр технологийн бүтээгдэхүүнүүдийг үйлдвэрлэхэд ашигладаг.

Эх сурвалж: МОНЦАМЭ Агентлаг Б.Адъяахүү