.png){kind=logo}
ВАШИНГТОН, 2025 оны наймдугаар сарын 31 /DW/. Палестины Ерөнхийлөгч Махмуд Аббасыг Нью-Йорк хотноо ирэх сард болох НҮБ-ын Ерөнхий Ассамблейн чуулганд оролцохыг зөвшөөрөхгүй гэж АНУ мэдэгджээ. Уг чуулганы үеэр АНУ-ын хэд хэдэн холбоотон улс Палестины тусгаар тогтнолыг хүлээн зөвшөөрөх төлөвтэй байгаа юм.
Палестиныг чөлөөлөх байгууллага болон Баруун эрэгт төвтэй Палестины эрх баригчдад виз олгохоос татгалзаж, визийг хүчингүй болгох шийдвэр нь М.Аббас болон бусад 80 орчим палестин хүнд хамаарна гэж Төрийн департаментын төлөөлөгч мэдэгдсэн байна.
М.Аббас жил тутам болдог НҮБ-ын дээд түвшний чуулганд, мөн түүний дараа болох Франц, Австрали, Канад улсууд Палестиныг албан ёсоор хүлээн зөвшөөрөхөө амласан дээд хэмжээний уулзалтад оролцохоор төлөвлөж байжээ. Түүнчлэн Израилын тал тодорхой болзлуудыг биелүүлэхгүй бол Палестины тусгаар тогтнолыг Ерөнхий Ассамблейн чуулганаар хүлээн зөвшөөрнө гэдгээ Их Британийн эрх баригчид мэдэгдсэн билээ.
М.Аббасын ажлын албанаас АНУ-ын шийдвэрт гайхаж байгаагаа илэрхийлж, энэ нь Нью-Йорк дахь НҮБ-ын төв байранд гадаадын дипломатчдыг нэвтрүүлэхийг зөвшөөрөх шаардлагыг АНУ-д тавьсан 1947 оны НҮБ-ын “төв байрны тухай гэрээ”-г зөрчсөн үйлдэл болж байна хэмээн мэдэгджээ.
Харин Д.Трампын засаг захиргааны зүгээс мэдэгдэхдээ, аюулгүй байдал, хэт даврах үзэл, гадаад бодлогын шалтгаанаар виз олгохоос татгалзаж болно гэсэн байна. Үүний дараа Европын хэд хэдэн орны Гадаад хэргийн сайд нар М.Аббаст виз олгохыг хориглосон Вашингтоны шийдвэрийг шүүмжилжээ. Мөн НҮБ-ын хэвлэлийн төлөөлөгч Стефан Дюжаррик НҮБ визийн асуудлыг АНУ-ын Төрийн департаменттай хэлэлцэнэ гэж мэдэгдсэн байна.
Эх сурвалж: МОНЦАМЭ Агентлаг Э.Хулан
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!